စစ်ကောင်စီကို လေယာဉ်ဆီမရောင်းရန် ကုလလူ့အခွင့်ကောင်စီအဖွဲ့ဝင်နိုင်ငံများ သဘောတူ
******
ကောင်းချစ်အောင်
ဧပြီ ၅၊ ၂၀၂၄။
အာဏာသိမ်းစစ်ကောင်စီကို လေယာဉ်လောင်စာဆီတင်ပို့ရောင်းချခြင်းမပြုရန် အဖွဲ့ဝင် ၄၇ နိုင်ငံပါဝင်သည့် ကုလသမဂ္ဂလူ့အခွင့်ရေးကောင်စီက သဘောတူခဲ့သည်ဟု သိရသည်။
စစ်ကောင်စီသည် မြန်မာပြည်သူများအပေါ် လူ့အခွင့်အရေးချိုးဖောက်ရာတွင် ဂျက်လေယာဉ်များကို အသုံးပြု နေသည်ဆိုလျှင် လေယာဉ်ဆီတင်ပို့ခြင်းမလုပ်ဆောင်သင့်တော့ဟု အဖွဲ့ဝင်နိုင်ငံများက တညီတညွတ်တည်း သဘောတူခဲ့ခြင်းဖြစ်သည်။
ထို့အပြင် လက်နက်ခဲယမ်းမီးကျောက်နှင့် အခြားစစ်လက်နက်ပစ္စည်းများ တရားမဝင်လွှဲပြောင်းပေးနေခြင်းကို လည်း ရပ်ဆိုင်းကြရန်တိုက်တွန်းထားသည်။
၂၀၂၂ ခုနှစ် ဒီဇင်ဘာ ၂၁ ရက်တွင် ကုလသမဂ္ဂလုံခြုံရေးကောင်စီက မြန်မာ့အရေးနှင့်ပတ်သက်သည့် မူကြမ်း အမှတ် ၂၆၆၉ ကို ပထမဦးဆုံးချမှတ်ခဲ့သည်။
ယခုအကြိမ် တံခါးဖွင့်အစည်းအဝေးတွင်လည်း အကြမ်းဖက်မှုလုပ်ဆောင်နေသည့် အီရန်နှင့် မြန်မာနိုင်ငံ စစ်တပ် များအပေါ် ဖိအားပေးမှုများတိုးမြှင့်လုပ်ဆောင်လာခဲ့ခြင်း ဖြစ်သည်။
၂၀၂၁ ခုနှစ် ဖေဖော်ဝါရီလကနေ ၂၀၂၃ ဒီဇင်ဘာလအထိ မြန်မာနိုင်ငံတွင် လေကြောင်းတိုက်ခိုက်မှုဖြစ်စဥ် စုစုပေါင်း ၁,၆၅၂ ခု ဖြစ်ပွားခဲ့သည်။
လေကြောင်းတိုက်ခိုက်မှုများကိုတားဆီးရန် မြန်မာနိုင်ငံကို လေယာဉ်လောင်စာဆီတင်သွင်းသည့် ကုမ္ပဏီများအား အမေရိကန်၊ ဗြိတိန်အပါအဝင် အနောက်နိုင်ငံအများစုက ကန့်သတ်ပိတ်ဆို့မှုများ ဆက်တိုက်လုပ်ဆောင်ခဲ့သည်။
ပိတ်ဆို့မှုများရှိနေသည့်ကြားကပင် ၂၀၂၃ ခုနှစ် ဧပြီလကနေ ဩဂုတ်လအတွင်း မြန်မာနိုင်ငံတွင်းကို လောင်စာဆီ သင်္ဘော ၆ စီး ဝင်ရောက်ခဲ့သည်ဟု Amnesty International အဖွဲ့က ဂြိုဟ်တုဓာတ်ပုံများနှင့်တကွ ဖော်ပြထား သည်။
ယင်းအပြင် အိန္ဒိယလေတပ်သည် ၂၀၂၄ ခုနှစ် ဇန်နဝါရီလတွင် စစ်အုပ်စု၏လေတပ်ထံ ကုန်ပစ္စည်းအမျိုးပေါင်း ၅၂ မျိုးပေးပို့ခဲ့သည်ဟု Justice Myanmar အဖွဲ့က ထုတ်ပြန်ထားသည်။
ထို့ကြောင့် စစ်ကောင်စီ၏လေကြောင်းတိုက်ခိုက်မှုများလျော့နည်းမသွားဘဲ၂၀၂၃ ခုနှစ် ၁ နှစ်တည်းမှာပင် လေကြောင်းတိုက်ခိုက်မှုပေါင်း ၁,၂၂၈ ခုထိရှိခဲ့ပြီး လေကြောင်းတိုက်ခိုက်မှုဖြစ်စဥ်စုစုပေါင်း၏ ၇၄ ရာခိုင်နှုန်းအထိ ရှိလာခဲ့သည်။
ပုံစာ – ၇၆ နှစ်မြောက် လေတပ်နှစ်ပတ်လည်အခမ်းအနားသို့ အာဏာသိမ်းစစ်ခေါင်းဆောင်တက်ရောက်စဉ်။
************
Telegram– > https://t.me/ThanLwinKhetNews/4190
YouTube – > https://youtu.be/6X9AvN2FnIw?si=BGNM7eyxs7ZtJG7d
Website – > https://thanlwinkhet.net/?p=8970
