လေကြောင်း၊ လက်နက်ကြီးများကြောင့် ဝှေ့ရှမ်းကျေးရွာက နေအိမ်နှင့် ဆိုင်များပျက်စီး

လေကြောင်း၊ လက်နက်ကြီးများကြောင့် ဝှေ့ရှမ်းကျေးရွာက နေအိမ်နှင့် ဆိုင်များပျက်စီး

****

နန်းဆုပန်ခန့်

မတ် ၂၉၊ ၂၀၂၄။

ကရင်ပြည်နယ်၊ မြဝတီမြို့ကုန်သွယ်ရေးဇုန်အနီးရှိ ဝှေ့ရှမ်းကျေးရွာကို စစ်ကောင်စီတပ်က လေကြောင်းဖြင့်ဗုံးကြဲတိုက်ခိုက်ခြင်း၊ လက်နက်ကြီးများဖြင့်ပစ်ခတ်ခြင်းတို့ကြောင့် ဆိုင်နှင့် လူနေအိမ်များ ပျက်စီးခဲ့ရသည်ဟု ဒေသခံများထံက သိရသည်။

မတ်လ ၂၈ ရက် ညနေ ၆ နာရီခွဲကစတင်၍ စစ်ကောင်စီတပ်က လက်နက်ကြီးများဖြင့်ပစ်ခတ်ခဲ့ပြီး ဝှေ့ရှမ်း ကျေးရွာအတွင်းကျရောက်ပေါက်ကွဲခဲ့သည့် အတွက် ဆိုင်ခန်း ၁ ခန်းနှင့် လူနေအိမ်များပျက်စီးခဲ့ရသည်ဟု ဆိုင်ကယ်ပြင်ဆိုင်ပိုင်ရှင် ကိုဘောင်း က ပြောသည်။

၎င်းက “ ၆ နာရီခွဲလောက်ကစပြီး ပစ်တာ။ ကျွန်တော့်ဆိုင်ကို လက်နက်ကြီး ၂ လုံးကျတယ်။ လူတွေတော့ မထိခိုက်ဘူး။ ဆိုင်ပတ်ပတ်လည်း ၄ လုံးလောက်လည်း ပျက်စီးသွားတယ်” ဟု ဆိုသည်။

ယမန်နေ့ ည ၁၁ နာရီခန့်တွင်လည်း စစ်ကောင်စီတပ်က Y – 12 ထောက်ပို့လေ ယာဉ်ဖြင့် လာရောက်ပစ်ခတ်ခဲ့သေးသည်ဟု ဒေသခံများထံကသိရသည်။

ဒေသခံ ၁ ဦးက  “  မနေ့ကည  ၁၁ နာရီလောက်က လေယာဉ်ပျံ Y – 12 နဲ့ လာပစ်တယ်။ ရွာထဲတော့ မကြဲဘူး။ ရွာအပြင်မှာကြဲတာ ၈ လုံးလောက်ရှိမယ်။  လက်နက်ကြီးပဲရွာထဲမှာကျတာ” ဟု ဆိုသည်။

ယခု မတ်လ ၇ ရက်ကစပြီး သင်္ဃန်းညီနောင်ဒေသရှိ ခမရ – ၃၅၅ ကို စတင်တိုက်ခိုက်နေစဉ် စစ်ကောင်စီတပ်က အနီးဝန်းကျင်ရှိကျေးရွာများကို နေ့စဉ်နီးပါး လက်နက်ကြီးများ၊ လေယာဉ်များဖြင့် ပစ်ခတ်နေသည်ဟု ကာကွယ်ရေးရဲဘော်များထံက သိရသည်။

မည်သည့်အဖွဲ့အစည်းက လက်နက်ကြီးဖြင့်ပစ်ခတ်သည်ဟု ဒေသခံများအတိအကျမသိရှိသော်လည်း မြဝတီမြို့ တွင်တာဝန်ထမ်းဆောင်နေသော BGF ဘက်တံဆိပ်ပြောင်းထားသည့် ကရင်အမျိုးသားတပ်မတော် – KNA တပ်ဖွဲ့ ဝင် ၁ ဦးကတော့ စစ်ကောင်စီတပ်သားများက လုပ်ဆောင်နေခြင်းဖြစ်သည်ဟု ပြောသည်။

“ ညီနောင်၊ ရွာသစ်၊ မြို့သစ် က လူနေအိမ်တွေမှန်သမျှကို စစ်တပ်ဘက်က အကုန်လိုက်ပြီး လေယာဉ်နဲ့ နေ့တိုင်းလိုက်ပစ်တာ၊ အခုလည်း သူတို့မပစ်ရင် ဘယ်သူပစ်မလဲ” ဟု ဆိုသည်။

ဝှေ့ရှမ်းတွင် အိမ်ထောင်စု ၁,၀၀၀ ကျော်ရှိသည်ဟု ၂၀၁၄ သန်းခေါင်စာရင်းအရသိရပြီး လက်နက်ကြီးနှင့် လေကြောင်းပစ်ခတ်မှုများကြောင့် မတ်လအတွင်း နေအိမ်အလုံး ၂၀ ကျော်ပျက်စီးခဲ့ကာ ဒေသခံ ၃ ဦး သေဆုံးခဲ့ရသည်။

ထို့ပြင် မတ်လ ၂၆ ရက် ည ၈ နာရီကနေ နံနက် ၅ နာရီအထိ စစ်ကောင်စီတပ်က လက်ခတ်တောင်ဒေသကို တိုက်ပွဲဖြစ်ပွားခြင်းမရှိဘဲ လေကြောင်းဖြင့် ၂၅ ကြိမ်ထက်မနည်း ဗုံးကြဲတိုက်ခိုက်ခဲ့သည်။

ဓါတ်ပုံ – ပေးပို့။

ပုံစာ – မတ်လ ၂၈ ရက်၊ ညပိုင်းတွင် လက်နက်ကြီးကျရောက်ပေါက်ကွဲမှုကြောင့် ပျက်ဆီးသွားသည့် ဆိုင်ကယ်ပြင်ဆိုင်။

************

Telegram– > https://t.me/newstlk/4059

YouTube – > https://youtu.be/6X9AvN2FnIw?si=BGNM7eyxs7ZtJG7d

Website – > https://thanlwinkhet.net/?p=8799