ရေး – ထားဝယ်ပြည်ထောင်စုလမ်းမကို တော်လှန်ရေးအဖွဲ့များထိန်းချုပ်

ရေး – ထားဝယ်ပြည်ထောင်စုလမ်းမကို တော်လှန်ရေးအဖွဲ့များထိန်းချုပ်

****************

သဇင်

မတ်လ ၂၀၊ ၂၀၂၄။

မွန်ပြည်နယ်နှင့် တနင်္သာရီတိုင်းအစပ် ရေး-ထားဝယ် အမှတ် ၈ ပြည်ထောင်စုလမ်းမကို တော်လှန်ရေး ပူးပေါင်းတပ်ဖွဲ့များက နယ်မြေစိုးမိုးရေးလုပ်ငန်းများလုပ်ဆောင်နေသည်ဟု ဒေါနစစ်ကြောင်းထံက သိရသည်။

တော်လှန်ရေးပူးပေါင်းတပ်ဖွဲ့များက မတ်လ ၁၉ ရက်တွင် ပြည်သူ့ကာကွယ်ရေးတပ်မတော် ဗျူဟာ ၃၃ နယ်မြေအတွင်းပါရှိသည့် အမှတ် ၈ ပြည်ထောင်စုလမ်းမ ရေး – ထားဝယ်လမ်းပိုင်း မလွဲတောင်နှင့် ကလိန် အောင်ကြား နယ်မြေစိုးမိုးမှုရယူရန် လုပ်ဆောင်နေခြင်းဖြစ်သည်။

ယင်းသို့ဆောင်ရွက်ရာတွင် ပြည်သူ့ကာကွယ်ရေးတပ်မတော် ဒေါနစစ်ကြောင်းနှင့် ကံပေါက်ဒေသ ပြည်သူ့ကာကွယ်ရေးအဖွဲ့ – KBDF၊ ဒေါနတပ်ခွဲ ၄၊ ထားဝယ်ကာကွယ်ရေးအဖွဲ့ – DDT ၊ ဒေါနတပ်ခွဲ ၇၊ ဝေဟင်ဒေါနတပ်ခွဲ ၆ ၊ တနင်္သာရီတပ်ရင်း ၁ ၊ရေးသိမ်းငှက်၊ YDF၊ ရေးပြောက်ကျားတပ် ဒေါနတပ်ခွဲ ၃ မဟာမိတ် တပ်များဖြစ်သည့် မွန်ပြည်တော်လှန်ရေးတပ် MSRF၊ABSDF ကျောင်းသားတပ်မတော်တပ်ရင်း ၁ ၊YAF၊  KNLA တပ်ရင်း ၂၇ များက အမှတ် ၈ လမ်းမပေါ်တွင် ဖြတ်သန်းသွားလာနေသော ပြည်သူများနှင့်တွေ့ဆုံခဲ့ပြီး စစ်ကောင်စီဒေါက်တိုင်များ ဖြတ်သန်းသွားလာမှုများကိုလည်း စစ်ဆေးမှုများပြုလုပ်ခဲ့သည်ဟု သိရသည်။

တော်လှန်ရေးပူးပေါင်းတပ်များ စတင်စစ်ဆေးချိန်တွင်  မလွဲတောင်ဂိတ်က စစ်ကောင်စီတပ်ဖွဲ့ဝင်များသည် ခရီးသွားပြည်သူများ၏ သွားလာမှုလမ်းကြောင်းများကို ပိတ်ဆို့ဖြတ်တောက်မှုများ ပြုလုပ်ခဲ့သည်ဟု ဒေါနစစ်ကြောင်းမှူး စောဒါးကို က သံလွင်ခက်ကိုပြောသည်။

“မနက် ၈ ကနေ ညနေ ၃ နာရီခွဲထိ နယ်မြေရှင်းလင်းတယ်။ အဲ့ဒီမှာ စကစတွေ မနက် ၈ နာရီလောက်ထဲက မလွဲတောင်ဂိတ်တံခါးကို သော့ခတ်ပြီး ထွက်ပြေးသွားတယ်။ တစ်ယောက်မှမရှိတော့ဘူး ။ ဂိတ်တံခါးပိတ်လိုက်တော့ ပြည်သူတွေ သွားရေးလာရေးတော်တော်ခက်ခဲသွားတယ်”ဟု ဆိုသည်။

စစ်ကောင်စီဘက်ကလည်း Mi -35 ရဟတ်ယာဉ် ၁ စင်းဖြင့် ၂ ကြိမ်ကင်းထောက် ပျံသန်းမှုများလုပ်ဆောင်ခဲ့သည်ဟု ကာကွယ်ရေးတပ်ဖွဲ့ဝင်များထံက သိရသည်။

ထို့အပြင် နယ်မြေစိုးမိုးရန်လုပ်ဆောင်နေမှုကို  သတင်းထောက်လှမ်းရန်လာသော စစ်ကောင်စီဒေါက်တိုင် အမျိုးသား ၁ ဦးသည် တော်လှန်ရေးတပ်ဖွဲ့ဝင်များကိုတွေ့ကာ အစစ်ဆေးမခံဘဲ ပြန်လှည့်ပြေးသွားခဲ့သည်ဟု သိရသည်။

ဒေါနစစ်ကြောင်းမှူး စောဒါးကို က” သတင်းလာယူတဲ့ ၁ ယောက်က ဆိုင်ကယ်နဲ့ အရပ်ဝတ်နဲ့ ပစ္စတိုခါးထိုးထားတယ်။ လက်ပစ်ဗုံး ၁ လုံးပါတယ် ။ ပြန်လှည့်ပြေးလို့ ကျွန်တော်တို့ ပစ်ပြီး ဖမ်းပေမယ့် လွတ်သွားတယ်။ သူထွက်ပြေးတဲ့နေရာမှာ သွေးကွက်တွေကျန်နေခဲ့တာ တွေ့ရတယ်” ဟုဆိုသည်။

စစ်ရေးအရှိန် မြှင့်တင်သွားမည်ဖြစ်သောကြောင့် ရေး – ထားဝယ်လမ်းပိုင်းကို ခရီးသွားပြည်သူများအနေဖြင့် မလိုအပ်ဘဲ ခရီးသွားလာခြင်းမပြုလုပ်ရန်နှင့် စစ်ကောင်စီတပ်များ အနီးဝန်းကျင်တွင်နေထိုင်သော ပြည်သူများကိုလည်း ကြိုတင်ရှောင်ရှားမှုပြုလုပ်ရန် တော်လှန်ရေးအဖွဲ့ဝင်များက သတိပေးပြောဆိုထားသည်။

ဓာတ်ပုံ – KBPDF

ပုံစာ – နယ်မြေစိုးမိုးရေးလုပ်ဆောင်နေသည့် တော်လှန်ရေးပူးပေါင်းတပ်ဖွဲ့ဝင်များ။

************

Telegram– > https://t.me/newstlk/3887

YouTube – > https://youtu.be/6X9AvN2FnIw?si=BGNM7eyxs7ZtJG7d

Website – > https://thanlwinkhet.net/?p=8524