စစ်ကောင်စီ၏ ရှေ့တန်းကာကင်းစခန်း ၄ ခုကို KIA ထပ်မံသိမ်းပိုက်

စစ်ကောင်စီ၏ ရှေ့တန်းကာကင်းစခန်း ၄ ခုကို KIA ထပ်မံသိမ်းပိုက်

****************************

ထွယ်

မတ် ၁၈၊ ၂၀၂၄။

ကချင်ပြည်နယ် မိုးမောက်မြို့နယ်အတွင်းရှိ စစ်ကောင်စီ၏ ရှေ့တန်းကာကင်းစခန်း ၄ ခုကို ယမန်နေ့ မတ်လ ၁၇ ရက်တွင် ကချင်လွတ်လပ်ရေးတပ်မတော် – KIA နှင့် ပူးပေါင်းတပ်ဖွဲ့ဝင်များက ဝင်ရောက်တိုက်ခိုက် သိမ်းပိုက်နိုင်ခဲ့သည်ဟု ရှေ့တန်းရဲဘော်များထံက သိရသည်။

အဆိုပါ တိုက်ပွဲတွင် စစ်ကောင်စီတပ်သား ၁ ဦးကို အရှင်ဖမ်းဆီးခဲ့ပြီး ကျန်စစ်ကောင်စီတပ်ဖွဲ့ဝင်များသည် စခန်းစွန့်ခွာထွက်ပြေးသွားသဖြင့် ယနေ့နံနက်ထိ လိုက်လံဖမ်းဆီးနေသည်ဟု KIA ရှေ့တန်းသတင်းရင်းမြစ် ၁ ဦးက သံလွင်ခက်ကို ပြောသည်။

၎င်းက “မန်ဒါ – Man da စခန်းက ၁ ယောက်ကို အရှင်ဖမ်းမိတယ်။ ထွက်ပြေးသွားတဲ့သူတွေကိုတော့ ကျွန်တော်တို့ အခုထိ လိုက်ဖမ်းနေတုန်းပဲ” ဟု ပြောသည်။

စစ်ကောင်စီ၏ မန်ဒါ – Man da  တပ်စခန်းကို ယမန်နေ့နံနက် ၉ နာရီခန့်က KIA ပူးပေါင်းတပ်များက တိုက်ခိုက်သိမ်းပိုက်လိုက်ခြင်းဖြစ်ပြီး အဆိုပါ တပ်စခန်းအပြင် ယင်းတပ်အနီးရှိ စစ်ကောင်စီ၏ ဂဒေါ့် ခရက် – Gadaw hkyet တပ်စခန်း၊ ဖကောန်း – (Hpakawn) တပ်စခန်းနှင့် ဘွမ်ကပေါ် – Bum Kapaw တပ်စခန်းများကိုလည်း တိုက်ခိုက်သိမ်းပိုက်နိုင်ခဲ့သည်ဟု ရှေ့တန်းသတင်းရင်းမြစ်က ပြောသည်။

ယမန်နေ့ တိုက်ခိုက်သိမ်းပိုက်ခံရသည့် စစ်ကောင်စီ၏ တပ်စခန်းများသည် မိုးမောက်မြို့ အရှေ့မြောက်ပိုင်းတွင်ရှိပြီး ပရန်ဟူးဒုန်း – Prang kadung ကျေးရွာအနီး၌ရှိသည့် တပ်စခန်းများဖြစ်သည်။

စစ်ကောင်စီတပ်စခန်းများရှိသည့် ကျေးရွာများသည် မိုးမောက်မြို့နှင့် မိုင် ၂၀ ခန့်ဝေးပြီး မိုးမောက်မြို့အခြေစိုက် စစ်ကောင်စီ၏ ခမရ – ၄၃၇ တပ်ကလည်း ယင်းနေရာများသို့ လက်နက်ကြီးများ ပစ်ခတ်ခဲ့သည်ဟု မိုးမောက်မြို့ ဒေသခံအမျိုးသား ၁ ဦးက ပြောသည်။

၎င်းက “သူတို့က လက်နက်ကြီးကို နေရာပြောင်းထားပြီး ရှယ်ပစ်နေတာ။ လယ်တောနားက ကုန်းမှာ လက်နက်ကြီးဆင်ထားတယ်။ မိုးမောက်ကနေ လှမ်းပစ်နေတာ အိမ်ပါတုန်တယ်” ဟု ပြောသည်။

ဂဒေါ့် ခရက် – Gadaw hkyet ကျေးရွာ၊ မန်ဒါ – Man da ကျေးရွာနှင့် ဖကောန်း – Hpakawn ကျေးရွာ အပါအဝင် ပရန်ဟူးဒုန်း – Prang kadung ကျေးရွာရှိဒေသခံများသည် ၎င်းတို့ကျေးရွာအနီး၌ တိုက်ပွဲဖြစ်ပွားသဖြင့် နေရပ်စွန့်ခွာ တိုက်ပွဲတိမ်းရှောင်နေသည်မှာ ၂ နှစ်ခန့်ရှိပြီဟု ဒေသခံအမျိုးသမီး ၁ ဦးက ပြောသည်။

ကချင်ပြည်နယ်တွင် တိုက်ပွဲများပြင်းထန်နေသည်မှာ ၂ ပတ်ခန့်ရှိပြီဖြစ်ပြီး ယနေ့အချိန်ထိလည်း ကချင်လွတ်လပ်ရေးတပ်မတော် – KIA ၏ တပ်မဟာ ၁ နယ်မြေ၊ တပ်မဟာ ၃ နယ်မြေ အပါအဝင် ယနေ့နံနက်တွင်လည်း တပ်မဟာ ၂ နယ်မြေ၌ တိုက်ပွဲဖြစ်ပွားလျက်ရှိသည်။

************

Telegram– >  https://t.me/newstlk/3811

YouTube – > https://youtu.be/6X9AvN2FnIw?si=BGNM7eyxs7ZtJG7d

Website – >   https://thanlwinkhet.net/?p=8430