နေအိမ် ၂၀၀ ကျော်မီးရှို့ခံရသည့် သက္ကယ်ကျင်းကျေးရွာတွင် ဒေသခံအလောင်း ၃ လောင်းတွေ့ရှိ

နေအိမ် ၂၀၀ ကျော်မီးရှို့ခံရသည့် သက္ကယ်ကျင်းကျေးရွာတွင် ဒေသခံအလောင်း ၃ လောင်းတွေ့ရှိ

***************************

နန်းဆုပန့်ခန့်

မတ် ၁၅၊ ၂၀၂၄။

စစ်ကိုင်းတိုင်း၊ မုံရွာမြို့နယ် ၊ သက္ကယ်ကျင်းကျေးရွာကို ယမန်နေ့တွင် စစ်ကောင်စီတပ်က နေအိမ် ၂၀၀ ဝန်းကျင် မီးရှို့ခဲ့ပြီး မီးလောင်သည့်အထဲတွင် ဒေသခံအလောင်း ၃ လောင်း တွေ့ရှိခဲ့သည်ဟု ဒေသခံများထံက သိရသည်။

စစ်ကောင်စီတပ်ဖွဲ့ဝင်များသည် မုံရွာမြို့ပေါ်မှ သက္ကယ်ကျင်းကျေးရွာသို့ စစ်ကားအကြီး ၈ စီးခန့်ဖြင့် စတင်ဝင်ရောက်ကာ သေနတ်များပစ်ဖောက်ခဲ့ပြီးနောက် ဒေသခံများ၏ နေအိမ်များကို မီးရှို့ခဲ့ခြင်းဖြစ်သည်ဟု မီးငြှိမ်းသတ်ခဲ့သော ဒေသခံအမျိုးသား ၁ ဦးက ပြောသည်။

၎င်းက “ ၁၁ နာရီလောက်မှာ ဝင်ပစ်ကြရင်း ၁ နာရီခွဲမှာ ရွာကိုမီးရှို့တယ်။ ကျွန်တော်တို့ကတော့ သူတို့ထွက်သွားမှ သွားပြီးမီးငြှိမ်းလို့ရတာပေါ့။ ၇ နာရီကျော်လောက်မှ မီးစငြှိမ်းရတာ။ ၁၁ ခွဲမှ မီးငြှိမ်းနိုင်ခဲ့တာ။ မီးသတ်ကားတွေပါလို့ အဲ့အချိန်ပြီးတာ” ဟု ဆိုသည်။

စစ်ကောင်စီတပ်၏မီးရှို့မှုကြောင့် သက္ကယ်ကျင်းကျေးရွာရှိ နေအိမ်အလုံး ၂၀၀ ခန့်မီးလောင်ပျက်စီးခဲ့သည့်အပြင် ဒေသခံ ၃ ဦးလည်း မီးလောင်သေဆုံးခဲ့သည်ဟု ဒေသခံများထံက သိရသည်။

မီးလောင်သေဆုံးခဲ့သည့် ဒေသခံများသည် အသက် ၂၂ နှစ်အရွယ် ၁ ဦး ၊ အသက် ၃၂ နှစ်ဝန်းကျင်အရွယ် ၁ ဦးနှင့် အသက် ၃၄ နှစ်အရွယ် ၁ ဦးတို့ဖြစ်ကြသည်။

ဒေသခံ ၁ ဦးက “ နေအိမ် ၂၀၀ နီးပါးပဲ။ မီးလောင်တဲ့အထဲမှာ ညက အလောင်း ၂ လောင်းက ပြာကျနေပြီး ၁လောင်းက နည်းနည်းပဲကျန်တော့တယ်။ မီးလောင်သွားတဲ့ဒေသခံတွေက အမျိုးသမီး ၁ ယောက်နဲ့ အမျိုးသား ၂ ယောက်ပါတယ် ” ဟု ဆိုသည်။

စစ်ကောင်စီတပ်ဖွဲ့ဝင်များသည် သက္ကယ်ကျင်းကျေးရွာကိုမီးရှို့သွားသည့်အပြင် ဒေသခံ ၅၀ ဦး ခန့်ကိုလည်း ဖမ်းဆီးခေါ်ဆောင်သွားသည်ဟု ဒေသခံများထံက သိရသည်။

မီးရှို့ဖျက်ဆီးမှုများကြောင့် သက္ကယ်ကျင်းကျေးရွာတွင် နေအိမ်အလုံး ၃၀ ခန့်သာကျန်ရှိပြီး ဒေသခံများသည်လည်း မုံရွာမြို့နယ်ရှိ မိုးညှင်းသမ္ဗုဒ္ဓေ ဘုရားတွင် သွား ရောက်ခိုလှုံနေကြရသည်ဟု သိရသည်။

မိုးညှင်းသမ္ဗုဒ္ဓေဘုရားတွင် လာရောက်တိမ်းရှောင်နေသည့် စစ်ဘေးရှောင်ပြည်သူ ၃,၀၀၀ နီးပါးရှိပြီး အများအားဖြင့် နေအိမ်မီးလောင်သည့်ကျေးရွာက ဒေသခံများဖြစ်သည်ဟုလည်း တပိုင်တနိုင်ကူညီသူ ၁ ဦးကဆို သည်။

၎င်းက “ နဂါးတွင်းရွာ၊ ကံပြားလေးရွာ၊ ကြာပိုင်ရွာ၊ ထနောင်းတော၊ ကံဇီ၊ ကနီ၊ သက္ကယ်ကျင်း၊ ကူတော၊ မုံရွေး-ကြေးမုံ၊ ညောင်ကန် တွေပေါ့။ အတိအကျဆိုရင် ကျောက္ကာဘက်က ၄ ရွာ၊ မုံရွာတောင်လတ်က ၆ ရွာ၊ ကနီက ၃ ရွာ စုစုပေါင်း ၁၃ ရွာပေါ့။ အဲဒီဘုရားမှာက စစ်ရှောင်တွေက တော်တော်များများ နေအိမ်မီးလောင်သွားတဲ့ ဒေသခံတွေပဲများတယ်” ဟု ဆိုသည်။

အဆိုပါ စစ်ဘေးရှောင်များကို အခြားကူညီသူအဖွဲ့အစည်းများက လာရောက်ကူညီပေးခြင်းမရှိဘဲ မြို့ပေါ် ကဒေသခံပြည်သူများက အလှည့်ကျကူညီနေခြင်းဖြစ် သည်ဟု ကူညီသူများထံက သိရသည်။

လက်ရှိအချိန်တွင် စစ်ရှောင်များသည် အဝတ်အစား၊ ဖိနပ်၊ စားနပ်ရိက္ခာ စသည့်အကူအညီများလိုအပ်လျက်ရှိသည်ဟု ကူညီသူများကဆိုသည်။

ဓာတ်ပုံ –  Commando Force

ပုံစာ – စစ်ကောင်စီတပ်ဖွဲ့ဝင်များက သက်ကယ်ကျင်းရွာကို ဝင်ရောက်မီးရှို့ပြီးနောက်မြင်ကွင်း။

************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – >  https://t.me/newstlk/3765

YouTube – > https://youtu.be/6X9AvN2FnIw?si=BGNM7eyxs7ZtJG7d

Website – >   https://thanlwinkhet.net/?p=8357