စစ်ကြောင်းထိုးလာသည့်အတွက် ဇရပ်ကြီးဒေသခံများ ထပ်မံတိမ်းရှောင်နေရ၊ ဒေသခံ တချို့ ဖမ်းဆီးခံနေရမှုများ ရှိနေ

စစ်ကြောင်းထိုးလာသည့်အတွက် ဇရပ်ကြီးဒေသခံများ ထပ်မံတိမ်းရှောင်နေရ၊ ဒေသခံ တချို့ ဖမ်းဆီးခံနေရမှုများ ရှိနေ

****************************************************

ယမင်းဖူးပွင့်အောင်

မတ် ၁၂၊ ၂၀၂၄။

စစ်ကောင်စီတပ်က ပဲခူးတိုင်း၊ ထန်းတပင်မြို့နယ်၊ ဇရပ်ကြီးဒေသရှိကျေးရွာများအား လက်နက်ကြီးများဖြင့် ပစ်ခတ်ဝင်ရောက်ပြီး စစ်ကြောင်းထိုးလာသည့်အတွက် ဒေသခံပြည်သူများ ထပ်မံထွက်ပြေးတိမ်းရှောင်နေကြရသည်။

ယခုရက်ပိုင်းအတွင်း စစ်ကောင်စီတပ်သည် ဇရပ်ကြီးမြို့အရှေ့ဘက်ရှိ ဂွအိုင်၊ တလိုင်းအိုင်၊ သရက်တန်းစသည့်ကျေးရွာများသို့ စစ်ကြောင်းထိုးဝင်ရောက်ခဲ့ခြင်းဖြစ်သည်ဟု ဒေသခံများထံက သိရသည်။

စစ်ကောင်စီတပ်သည် ထိုကဲ့သို့ ကျေးရွာများအတွင်း လက်နက်ကြီးဖြင့် ပစ်ခတ်ဝင်ရောက်နေသည့်အပြင် ဒေသခံများကိုလည်း ဓားစာခံအနေဖြင့် ဖမ်းဆီးမှုများလုပ်ဆောင်နေသည်ဟု သိရသည်။

မတ်လ ၂၀ ရက်တွင် တလိုင်းအိုင်ရွာက ဒေသခံ ၂၀ ဦးခန့် နေရပ်စွန့်ခွာနေစဉ် အင်အား ၅၀ ခန့်ပါသည့် စစ်ကောင်စီစစ်ကြောင်းက လူသားဒိုင်းအဖြစ်ဖမ်းဆီးသွားသည်ဟု ဇရပ်ကြီးဒေသခံ ၁ ဦးက သံလွင်ခက်ကို ပြောသည်။

၎င်းက ” တလိုင်းအိုင်ရွာထဲမှာပဲ ဖမ်းထားတာ။ ရွာသားတွေက အစားအစာလည်းမစားရဘူး။ လက်နက်ကြီးနဲ့ ရွာထဲကိုပစ်ဝင်ပြီး ပြည်သူတွေကိုမတရားဖမ်းထားတာ။ တောင်ငူကို ပြေးတဲ့သူကလည်း ပြေးကုန်ပြီ။ တောင် တွေပေါ်မှာ ထမင်းငတ်တဲ့သူကလည်း ငတ်ပေါ့နော်” ဟုဆိုသည်။

တလိုင်းအိုင်ရွာ၊ ဂွအိုင်ရွာနှင့် သရက်တန်းရွာများသည် ဇရပ်ကြီးမြို့အရှေ့ဘက်တွင်တည်ရှိပြီး ရွာအနီးတဝိုက်တွင် စစ်ကောင်စီတပ်က အင်အားဖြည့်တင်းစစ်ကြောင်းထိုးနေကာ ကရင်အမျိုးသားလွတ်မြောက်ရေးတပ်မတော် – KNLA အပါအဝင် ပူးပေါင်းတပ်ဖွဲ့နှင့် စစ်ကောင်စီတို့ကြား ၃ ရက်ဆက်တိုက် နှစ်ဖက်ထိတွေ့တိုက်ပွဲပြင်းထန်လျက်ရှိ သည်။

စစ်ကောင်စီ၏ လက်နက်ကြီးကြောင့် ဂွအိုင်ရွာနှင့် တလိုင်းအိုင်ရွာတွင် ထိခိုက်ပျက်စီးမှုများရှိနေပြီး မသန်စွမ်းသူ များနှင့် သက်ကြီးရွယ်အိုများသည် ထွက်ပြေးတိမ်းရှောင်ရာ၌ အခက်အခဲများရှိနေသည်ဟု လူမှုကူညီရေးအသင်းဝင် ၁ ဦးက ပြောသည်။

၎င်းက “ရွာအခြေအနေကလည်း တော်တော်ကြီးပျက်စီးသွားတယ်။ ထန်းတပင်နဲ့ ဇရပ်ကြီးကြားက ရွာလေးကို သွားခေါ်ရတာ။ ပြေးလာတဲ့အချိန် တွားသွားပြီးလာရတာ။ သက်ကြီးရွယ်အိုတွေလည်းပါတယ်။ မသန်စွမ်းတွေ လည်းပါတယ်။ ဒုက္ခရောက်ကြတာပေါ့” ဟုဆိုသည်။

တလိုင်းအိုင်ရွာနှင့် ဂွအိုင်ရွာအပါအဝင် ရွာပေါင်း ၄ ရွာခန့်က ဒေသခံ ၁,၀၀၀ ကျော်သည် တောင်ငူမြို့ပေါ်ရှိ ဘုန်းကြီးကျောင်းများအပါအဝင် နီးစပ်ရာသို့ ထွက်ပြေးတိမ်းရှောင်နေကြရသည်။

စစ်ရှောင်အရေအတွက်ပိုမိုများပြားလာသလို အချိန်ကာလလည်းကြာမြင့်လာသဖြင့် နေရာထိုင်ခင်းနှင့် စားနပ် ရိက္ခာ အခက်အခဲများရှိလာသည်ဟု လူမှုကူညီရေးအသင်းများထံက သိရသည်။

လူမှုကူညီရေးအသင်းဝင် ၁ ဦးက “ ဘုန်းကြီးကျောင်းတွေကလည်း စာဖြေရက်နီးလာလို့ နေရာတွေမလောက်ဘူး ဆိုပြီး ပြောကြတာပေါ့။ ရက်ကြာတော့လည်း လှူတဲ့ ကူတဲ့သူတွေပန်းလာကြပြီလေ။ တချိူ့ကလည်း ပြန်ကြ တယ်။ ဒီရက်တွေက စိုက်ခင်းရိတ်တဲ့ရက်တွေလေ။ စစ်ရှောင်တွေကို ထမင်းပဲကျွေးတာ။ ပိုက်ဆံပေးတာမှ မဟုတ်တာ” ဟုဆိုသည်။

ပြီးခဲ့သည့် ၁ လ ခန့်က ဒေသတွင်းဖြစ်ပွားခဲ့သည့်တိုက်ပွဲများကြောင့် တိမ်းရှောင်နေရသောဒေသခံများသည် ယခု လပထမပိုင်းတွင်  ဇရပ်ကြီးမြို့နှင့် ကျေးရွာများသို့ ပြန်လာနေမှုများရှိနေပြီး လုံခြုံစိတ်ချရသော အခြေအနေ ရောက်မှသာနေရပ်ပြန်ရန် ကူညီသူများက တိုက်တွန်းထားကြသည်။

ကရင်အမျိုးသားလွတ်မြောက်ရေးတပ်မတော် – KNLA၊ တပ်မဟာ ၂ နှင့် မဟာမိတ်ပူးပေါင်းတပ်ဖွဲ့များက ဇရပ် ကြီးရဲစခန်း၊ မြို့စိုးတံတားစစ်ဆေးရေးဂိတ်၊ ခလရ ၇၃၊ ချောင်းချားစခန်း၊ ရှားစေလိုးစခန်းများကို ဖေဖော်ဝါရီ ၇ ရက် နံနက် ၂ နာရီခန့်တွင် တပြိုင်နက်တည်း ဝင်ရောက်တိုက်ခိုက်ခဲ့ရာကစ၍ ဇရပ်ကြီးမြို့အပါအဝင် အနီးတ ဝိုက်ကျေးရွာများ၌ တိုက်ပွဲများ ပြင်းထန်ခဲ့ခြင်းဖြစ်သည်။

ပုံစာ – ထွက်ပြေးတိမ်းရှောင်နေကြရသည့် ဇရပ်ကြီးဒေသခံများ။

************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – >  https://t.me/newstlk/3714

YouTube – >  https://youtu.be/QqbTWiv8qdA?si=t_-oGmGKSvk_jV-Z

Website – >   https://thanlwinkhet.net/?p=8272