KNU တပ်မဟာ ၃ နယ်မြေကို စစ်ကောင်စီ လေကြောင်းတိုက်ခိုက်
***************************
မေသံလွင်
မတ် ၂၊ ၂၀၂၄။
ကရင်အမျိုးသားအစည်းအရုံး – KNU၊ တပ်မဟာ ၃ နယ်မြေဖြစ်သည့် ပဲခူးတိုင်း၊ ကျောက်ကြီးမြို့နယ်၊ နတ်သံကွင်းမြို့အနီးကို စစ်ကောင်စီတပ်က လေကြောင်းဖြင့်တိုက်ခိုက်မှုများ လုပ်ဆောင်ခဲ့သည်ဟု ဒေသခံများထံက သိရ သည်။
ယနေ့ မတ်လ ၂ ရက် နံနက် ၂ နာရီကျော်တွင် နတ်သံကွင်းမြို့အနီးရှိကျေးရွာများကို စစ်ကောင်စီတပ်က လေကြောင်းဖြင့် ၂ ကြိမ်တိုက်ခိုက်ခဲ့ခြင်းဖြစ်သည်။
ဒေသခံ ၁ ဦးက ” တောင်စု၊ တမာခေါ ၊ ရန်မျိုးအောင် ၊ နတ်သံကွင်းနဲ့ နောင်ကုန်းကြားကို လာပစ်သွားတာ။ မနက် ၂ နာရီခွဲလောက်မှာ ၁ ကြိမ်၊ ၃ နာရီ မထိုးခင်မှာ ၁ ကြိမ် လာပစ်သွားတာ ” ဟုဆိုသည်။
နတ်သံကွင်းမြို့ရဲစခန်းနှင့် တံတားထိပ်များတွင် စစ်ကောင်စီတပ်ဖွဲ့ဝင်များ အထိုင်ချကာ စစ်ရေးအရအရေးပါသည့် စစ်တောင်းမြစ်ကူးတံတား ( နတ်သံကွင်းတံတား ) ကို ပြန်လည်ပြုပြင်နေသည်ဟု ဒေသခံများထံကသိရသည်။
ပြီးခဲ့သည့် ဖေဖော်ဝါရီ ၂၇ ရက်တွင်လည်း နတ်သံကွင်းမြို့အတွင်းရှိ စစ်ကောင်စီတပ်ဖွဲ့ဝင်များနှင့် ကရင်အမျိုးသားလွတ်မြောက်ရေး တပ်မတော် – KNLA၊ တပ်မဟာ ၃ ရင်း ၉ ၊ ၃၇၀၂ PDF တပ်ရင်း ပူးပေါင်းစစ်ကြောင်းများကြား တိုက်ပွဲဖြစ်ပွားခဲ့ပြီး စစ်ကောင်စီဘက်က ထိခိုက်မှုများခဲ့သည်ဟု ပဲခူးခရိုင် ၊ အမှတ် – ၂ တပ်ရင်း က ထုတ်ပြန်ထားသည်။
အထိနာခဲ့သည့်စစ်ကောင်စီတပ်ဖွဲ့ဝင်များက ဖေဖော်ဝါရီ ၂၇ ရက် ညပိုင်းတွင် နတ်သံကွင်းမြို့ပေါ်ရှိ နေအိမ်တချို့ကို မီးရှို့မှုများလုပ်ဆောင်ခဲ့သည်ဟု ထုတ်ပြန်ချက်၌ ဖော်ပြထားသည်။
ထို့ပြင် ယမန်နေ့ မတ်လ ၁ ရက် ည ၉ နာရီဝန်းကျင်တွင် ပဲနွယ်ကုန်းမြို့အရှေ့ဘက် အုန်းနှဲရိုးကျေးရွာရှိ စစ်ကောင်စီဂိတ်စခန်းအား ကာကွယ်ရေးပူးပေါင်းတပ်ဖွဲ့ဝင်များက ဝင်ရောက်ပစ်ခတ်ခဲ့သည့်အတွက် နှစ်ဖက်ထိတွေ့ တိုက်ပွဲဖြစ်ပွားခဲ့သည်။
ထို့နောက် ပဲနွယ်ကုန်းမြို့၊ ရွှေဝါကျေးရွာအခြေစိုက် စစ်ကောင်စီ ခမရ – ၃၀၇ တပ်က တပ်ဖွဲ့ဝင်များသည် အုန်းနှဲရိုးကျေးရွာဘက်သို့ လက်နက်ကြီးများဖြင့် ပစ်ခတ်မှုများလုပ်ဆောင်ခဲ့သည်ဟု ဒေသခံများထံက သိရသည်။
ဒေသခံ ၁ ဦးက ” ညက လက်နက်ငယ်သံတွေ အရင်ကြားရတာ။ ပြီးတော့ လက်နက်ကြီးတွေနဲ့ ပစ်တာပဲ။ လက်နက်ကြီးကျလို့ အုန်းနှဲရိုးက အိမ် ၂ လုံး မီးလောင်သွားတယ် ” ဟုဆိုသည်။
၂၀၂၄ ခုနှစ် ဖေဖော်ဝါရီလ ၂၄ ရက်ကနေ ၂၉ ရက်အထိ ၆ ရက်တာအတွင်း ကေအဲန်ယူ-ကရင် အမျိုးသားအစည်းအရုံး၊ ကော်သူးလေအုပ်ချုပ်နယ်မြေ၊ ညောင်လေးပင်ခရိုင် ( ခလယ်လွီထူခရိုင် ) ၊ ကျောက်ကြီး မြို့နယ် ( လယ်ဒိုမြို့နယ် ) တွင် စစ်ကောင်စီတပ်က လေကြောင်းတိုက်ခိုက်မှုဖြစ်သော လေယာဉ်ဖြင့် ပစ်ခတ်ခြင်းနှင့် ဒရုန်းဖြင့်ပစ်ခတ်ခြင်း ၃၆ ကြိမ်အပြင် လက်နက်ကြီး ၃၀၃ လုံး ပစ်ခတ်ခဲ့သည်ဟု KNU က မတ်လ ၂ ရက် ၌ ထုတ်ပြန်သည်။
စစ်ကောင်စီတပ်က ထိုကဲ့သို့ လေကြောင်း၊ ဒရုန်းအပါအဝင် လက်နက်ကြီးများဖြင့် ပစ်ခတ်ခဲ့သည့်အတွက် ကျောက်ကြီးမြို့နယ် ( လယ်ဒိုမြို့နယ် ) အတွင်းက နေအိမ် ၇ လုံး၊ ဆေးခန်း ၁ လုံးထိခိုက်ပျက်စီးခဲ့ပြီး အရပ်သား ၁၃ ဦး ၊ ကာကွယ်ရေးတပ်ဖွဲ့ဝင် ၅ ဦး ထိခိုက်ဒဏ်ရာရရှိခဲ့ကာ အရပ်သား ၁ ဦးနှင့် နွား ၂ ကောင်သေဆုံးခဲ့ရသည်ဟု ထုတ်ပြန်ချက်တွင် ဖော်ပြထားသည်။
ဓာတ်ပုံ – ကရင်အမျိုးသားအစည်းအရုံး KNU ။
ပုံစာ – ဖေဖော်ဝါရီလတွင် ကျောက်ကြီးမြို့နယ်အတွင်းကို စစ်ကောင်စီတပ်က လေကြောင်းတိုက်ခိုက်ပြီးနောက် မြင်တွေ့ရသည့် မြင်ကွင်း။ ( ပုံ/ အဟောင်း )
************
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/3605
YouTube – > https://youtu.be/eEaLA1Cu5r0
Website – > https://thanlwinkhet.net/?p=8063
