ကော့ကရိတ်မြို့အလုံးစုံပျက်စီးအောင် စစ်ကောင်စီဖျက်ဆီး
**********************************
နန်းဆုပန်ခန့်
ဇန်နဝါရီလ ၂၇၊ ၂၀၂၄။
ကော့ကရိတ်မြို့ကို စစ်ကောင်စီက လက်နက်ကြီးများ၊ ဟောင်ဝှစ်ဇာအမြောက်များဖြင့် အချိန် ၄နာရီခန့်အကြာ တောက်လျှောက်က်ပစ်ခတ်ခဲ့ပြီးနောက် ယမန်နေ့ ညသန်းခေါင်ကျော်ချိန်မှ ယနေ့နံနက်ပိုင်းထိ တိုက်လေယာဥ်များဖြင့်ဗုံးကြဲခဲ့သည် ။
ကော့ကရိတ်မြို့ရှိ နေအိမ်များကို စစ်ကောင်စီတပ်ဖွဲ့ဝင်များက မကြာခဏ မီးရှို့ဖျက်ဆီးနေသလို လက်နက်ကြီး၊ လေယာဥ်တို့ဖြင့်လည်း ပစ်ခတ်၊ဗုံးကြဲမှုများကို ယမန်နေ့ညပိုင်းနှင့်ယနေ့နံနက်ပိုင်းတို့၌ ဆက်တိုက်ပြုလုပ်နေသည်ဟု ဒေသခံများနှင့်တော်လှန်ရေးပူးပေါင်းတပ်များထံက သိရသည် ။
ယမန်နေ့ညသန်းခေါင်ကျော်ချိန် ၁နာရီ ၃၀ မိနစ်နောက်ပိုင်းမှစ၍ ယနေ့ နံနက် နံနက်ပိုင်း ၇နာရီဝန်းကျင် အချိန်အထိ စစ်ကောင်စီက Y-12 Military Transport လေယာဉ် ၂စီး ဖြင့် မြို့တွင်းသို့ ၆၀ ဗုံးသီးများ ၊ ၈၁ ဗုံးသီးများဖြင့် ကြဲချလျက် ကော့ကရိတ်မြို့ အလုံးစုံပျက်စီးရန် ရည်ရွယ်ချက်ရှိရှိ ဖျက်ဆီးနေသည်ဟု ကျားဖြူစစ်ကြောင်းက သတင်းထုတ်ပြန်သည်။
ယမန်နေ့၌ စစ်ကောင်စီတပ်၏ ခလရ ၂၇၅ နှင့် ခမရ ၁၂ တပ်မှ ည ၆ နာရီမှ ၁၀နာရီဝန်းကျင်ထိ ၁၂၀ လက်နက်ကြီးအပါအဝင် ဟောင်ဝှစ်ဇာများဖြင့်ပစ်နေခဲ့ပြီး ည ၁၂ နာရီနောက်ပိုင်း၌ Y-12 တိုက်လေယာဥ်ဖြင့် ဗုံးကြဲခဲ့သည်ဟု ကျားဖြူစစ်ကြောင်းတာဝန်ရှိသူတစ်ဦးက ပြောသည် ။
၎င်းက ” တစ်ခါကြဲရင် ဗုံး ၁၀ လုံးကနေပြီးတော့ ၁၅ လုံးကြားကြဲပြီးတော့မှ လေယာဉ်တစ်ခါတက်ရင် ၆ ကြိမ်လောက်ကြဲတယ်ပေါ့နော်။ အခုမနက်ထိ သူတို့တောက်လျှောက်ကြဲနေပါတယ် ” ဟု ပြောသည် ။
လက်နက်ကြီးပစ်ခတ်မှုနှင့်ဗုံးကြဲခံရမှုများရှိခဲ့သည့် ကော့ကရိတ်မြို့တွင် ယမန်နေ့ညပိုင်း၌ နေအိမ်များ ယနေ့နံနက်ပိုင်းထိ မီးလောင်မှုများရှိသည်ဟု ဒေသခံများထံမှသိရသည်။
” ဂျူလီယားတန်းက ၂၀ ဝန်းကျင်လောင်တယ်။ အိမ်ကောင်းတွေ၊ ပစ္စည်းအကောင်းတွေပဲ။ တံတားဦးဘက်ကတော့ တစ်ရက်ကို တစ်အိမ် နှစ်အိမ် အဲ့လိုပုံမှန်လောင်တယ်” ဟု ဒေသခံအမျိုးသားတစ်ဦးက ပြောသည်။
KNLA နှင့် PDF ပူးပေါင်းစစ်ကြောင်းများက ကော့ကရိတ်မြို့နှင့် မြို့အနီးဝန်ကျင်ရှိ စစ်ကောင်စီတပ်စွဲထားသည့် နေရာများကို ပြီးခဲ့သည့်ဒီဇင်ဘာလ ၁ရက်မှစ၍ ထိုးစစ်ဆင်တိုက်ခိုက်နေရာ ယနေ့ချိန်ထိစစ်ရေးတင်းမာနေပြီး ထိတွေ့တိုက်ပွဲများလည်း မကြာခဏဖြစ်ပွားနေသည် ။
လက်ရှိတိုက်ပွဲကာလအတွင်း၌ စစ်ကောင်စီတပ်ဖွဲ့ဝင်များက ကော့ကရိတ်မြို့ပေါ်ရှိ နေအိမ် ၁၀၀ ကျော်ကိုမီးရှို့ဖျက်ဆီးထားသည့်အပြင် လက်နက်ကြီးပစ်ခတ်မှု၊ လေကြောင်းမှ ဗုံးကြဲမှုနှင့် ကင်းထောက်ဒရုန်းများဖြင့် မီးလောင်ဗုံးကြဲချမှုများကို ဆက်တိုက်ပြုလုပ်လာခြင်းဖြစ်သည်ဟု ဒေသခံများထံမှ သိရသည်။
ပုံစာ-ယခုလ တတိယအပတ်တွင်း၌ ကော့ကရိတ်မြို့နေအိမ်များကို စစ်ကောင်စီတပ် မီးရှို့ဖျက်ဆီးခဲ့မှု ။
*****************
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/3159
YouTube – > https://youtu.be/cZ9bsHWX2EU
Website – > https://thanlwinkhet.net/?p=7307
