စစ်ကောင်စီကဖမ်းဆီးသွားသော မဲအိုးကျေးရွာ ဒေသခံ ၅ ဦး၏ရုပ်အလောင်းများတွေ့ရှိ
**************************************
သဇင်
ဇန်နဝါရီ ၂၀ ၊၂၀၂၄။
စစ်ကိုင်းတိုင်း၊ ဒီပဲယင်းမြို့နယ်အရှေ့ခြမ်းကို စစ်ကြောင်းထိုးလာသော စစ်ကောင်စီစစ်ကြောင်းသည် မဲအိုးကျေး ရွာဒေသခံ ၅ ဦးအား ၎င်းတို့၏ကိုယ်လက်အင်္ဂါများကိုအပိုင်းပိုင်းဖြတ်ကာ သတ်ဖြတ်ခဲ့သည်ဟု ဒီပဲယင်းမြို့နယ်၊ စစ်ရှောင်ထောက်ပံ့ရေးအဖွဲ့က ထုတ်ပြန်ထားသည်။
ဇန်နဝါရီလ ၁၈ ရက် မနက် ၆ နာရီခန့်တွင် စစ်ကောင်စီတပ်ဖွဲ့ဝင်များသည် ဒီပဲယင်းမြို့နယ်ရှိ မဲအိုးကျေးရွာကို စစ်ကြောင်းထိုးဝင်ရောက်လာခဲ့ပြီ အရပ်သားပြည်သူ ၅၀ ဦးခန့်ကို ကျေးရွာဘုန်းကြီးကျောင်းအတွင်း ဖမ်းဆီးခဲ့ ခြင်းဖြစ်သည်။
ယင်းနောက် စစ်ကြောင်းပြန်ထွက်ချိန်တွင် ဒေသခံ ၁၅ ခန့်ကို ရိုက်နှက်ဖမ်းဆီးကာ စစ်ကြောင်းနှင့်အတူ ခေါ်ဆောင်သွာပြီး လက်ယက်ကုန်းရွာတွင် ညအိပ်တပ်စွဲကာ ဖမ်းဆီးခံပြည်သူများအနက် အသက် ၄၀ မှ ၅၀ ဝန်းကျင် အမျိုးသား ၃ ဦးကို ခြေ၊ လက်၊ ခေါင်းများဖြတ်ကာသတ်ဖြတ်ခဲ့ပြီး အမျိုးသမီး ၁ ဦးကိုတော့ နေအိမ် ၁ လုံးအတွင်း မီးရှို့သတ်ဖြတ်ထားခဲ့သည်။
ယနေ့မနက်ပိုင်းတွင်လည်း ရေဦးမြို့နယ်၊ ဇိန်ဇွန်းရွာတွင် နောက်ထပ်အမျိုးသား ၁ ဦးကို ထပ်မံသတ်ဖြတ်ခဲ့သည် ဟု ဒီပဲယင်းမြို့နယ် စစ်ရှောင်ထောက်ပံ့ရေးအဖွဲ့တာဝန်ရှိသူက သံလွင်ခက် ကို ပြောသည်။
“အခုလက်ယက်ကုန်းမှာ အသတ်ခံရတာဆိုရင် ၄ ယောက် အသတ်ခံရတယ်။ အဲ့ထဲက ၁ ဦးက PDF နဲ့ ဆက်စပ် တယ်။ နောက် ၁ ဦးက NLD နဲ့ ဆက်စပ်တယ်။ ကျန် ၂ ဦးကတော့ သာမန်အရပ်သားပါပဲ။ ဒီနေ့ကျတော့ ရေဦးမြို့နယ်၊ ဇိန်ဇွန်းရွာဘက်မှာ အလောင်း ၁ လောင်းထပ်တွေ့တယ်၊ စုစုပေါင်း ၅ လောင်းပေါ့”ဟု ဆိုသည်။
လက်ရှိတွင် စစ်ကောင်စီစစ်ကြောင်းသည် ရေဦးမြို့နယ်၊ မုတ်စီရွာတွင်ရောက်ရှိနေပြီး ကျန်ရှိနေသေးသည့် ဒေသခံ ၁၀ ဦးကတော့ သတင်းအစနပျောက်ဆုံးနေသည်ဟုဆိုသည်။
အဆိုပါစစ်ကြောင်းသည် ပြီးခဲ့သည့် ဇန်နဝါရီ ၁၆ရက်ကတည်းက ရေဦးမြို့နယ်ထဲကို စတင်ဝင်ရောက်လာခဲ့ပြီး တစ်ရွာဝင်တစ်ရွာထွက် စစ်ကြောင်းထိုးဝင်ရောက်နေခြင်းဖြစ်သည်။
ဒီပဲယင်းမြို့နယ်၊ မဲအိုးကျေးရွာတွင် ဖမ်းဆီးခံရသည့် အရပ်သားပြည်သူ ၁၅ ထဲက အသတ်ဖြတ်ခံရသူ ၅ ဦးမှာ မခင်နှင်းဌေး၊ ကိုဇော်ဝင်း၊ ကိုထွန်း ၊ ကိုအောင်မြင့်ကျော်(ခ)ကိုကုလား နှင့် ကိုဇင်မင်းညွန့် တို့ဖြစ်ပြီး ပျောက်ဆုံး နေသူ ၁၀ ဦးမှာ မဝေခင်၊ အောင်မျိုး၊ မခင်ဆန်းလွင် ၊ ဇွဲထက်နိုင် ၊ စိုးထွန်း ၊ လင်းထင် ၊ မလေးတင် ၊ စိုးမင်းပိုင်၊ ရဲ လင်းနိုင် နှင့် ဒေါ်တင်တို့ဖြစ်ကြောင်း သိရသည်။
ပုံစာ – ဒီပဲယင်း စစ်ဘေးရှောင်များ။
ဓာတ်ပုံ – ဒီပဲယင်းမြို့နယ် စစ်ရှောင်ထောက်ပံ့ရေးအဖွဲ့။
******
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/3090
YouTube – > https://youtu.be/LsSx5mAIttA?si=cQ389gohgAYNfmVR
Website – > https://thanlwinkhet.net/?p=7161
