TNLA က နမ့်ခမ်းမြို့ရှိ ပြည်သူလူထုများနှင့်တွေ့ဆုံကာ အုပ်ချုပ်ရေးဖော်ဆောင်မည့်ကိစ္စပြောဆို

TNLA က နမ့်ခမ်းမြို့ရှိ ပြည်သူလူထုများနှင့်တွေ့ဆုံကာ အုပ်ချုပ်ရေးဖော်ဆောင်မည့်ကိစ္စပြောဆို

********************

ယမင်းဖူးပွင့်အောင်

ဇန်နဝါရီ ၁၇ ၊ ၂၀၂၄။

ရှမ်းပြည်နယ်မြောက်ပိုင်း၊ တအာင်းအမျိုးသားလွတ်မြောက်ရေးတပ်မတော် – TNLA က သိမ်းပိုက်ထားသည့် ဒေသများတွင် အုပ်ချုပ်ရေးယန္တရားများဖော်ဆောင်နိုင်ရန် စီစဉ်ဆောင်ရွက်နေသည်ဟု TNLA တပ်ဖွဲ့ဝင်များထံက သိရသည်။

“၁၀၂၇ စစ်ဆင်ရေး” အတွင်း TNLA က နမ့်ခမ်းမြို့၊ နမ့်ဆန်မြို့၊ မန်တုံမြို့၊ မိုင်းလုံမြို့၊ နမ္မတူမြို့၊  မိုင်းငေါ့မြို့နှင့် ကွတ်ခိုင်မြို့ စသည့် ရှမ်းပြည်နယ်မြောက်ပိုင်းရှိ မြို့ပေါင်း ၇ မြို့ကို သိမ်းပိုက်နိုင်ခဲ့သည်။

ပထမဆုံးသိမ်းပိုက်နိုင်ခဲ့သည့် နမ့်ခမ်းမြို့ကို ယမန်နေ့ ဇန်နဝါရီလ ၁၆ ရက်၊ နံနက်ပိုင်းတွင် ပလောင်လွတ် မြောက်ရေးတပ်ဦး PSLF/TNLA ၏ တွဲဘက်အတွင်းရေးမှူး – ၁ ဗိုလ်မှူးကြီး တားအိုမ်တမာဝ်းနှင့် အုပ်ချုပ်ရေးဌာနမှူးဗိုလ်မှူးကြီး တားဂူဇား တို့ သွားရောက်ကြည့်ရှုခဲ့ကြသည်ဟု PSLF\TNLA က ထုတ်ပြန်ထားသည်။

“အဓိက လူကြီးက ရပ်ရွာမှာ ပြည်သူလူထုနဲ့တွေ့ဆုံတယ်။ အုပ်ချူပ်ရေးယန္တရားတွေဖော်ဆောင်နေတဲ့အကြောင်း ကို ပြောပြတာဖြစ်တယ်” ဟု TNLA ပြောရေးဆိုခွင့်ရုံး တာဝန်ခံ အမျိုးသမီး ၁ ဦးက သံလွင်ခက် ကိုပြောသည်။

TNLA သည် နမ့်ခမ်းမြို့ကို ရက်ပေါင်း ၃၁ ရက်ကြာ ခက်ခက်ခဲခဲ တိုက်ခိုက်ခဲ့ရပြီး နောက်ဆုံးကျန်ရှိနေသည့် စစ် ကောင်စီ၏ စခန်းသစ်ကုန်းကို ဒီဇင်ဘာလ ၁၉ ရက်တွင် သိမ်းပိုက်နိုင်ခဲ့ပြီးနောက် နမ့်ခမ်းတစ်မြို့လုံးကို အပြည့် အဝ ထိန်းချူပ်နိုင်ခဲ့ခြင်းဖြစ်သည်။

TNLA သည် မြို့ပေါင်း ၇ မြို့ကို ဆက်တိုက်သိမ်းပိုက်ထားနိုင်ခဲ့ပြီး ကျန်ရှိသည့်မြို့များနှင့် စစ်ရေးပစ်မှတ်များကို ဆက်လက်သိမ်းပိုက်မည်ဟု ကြေညာထားခဲ့သော်လည်း စစ်ကောင်စီနှင့် အပစ်အခတ်ရပ်စဲရေးကို  ရှောင်လွှဲမရ သည့်အနေအထားအောက်တွင် ပြုလုပ်ခဲ့ရသည်ဟု ညီနောင်မဟာမိတ် ၃ ဖွဲ့က ဇန်နဝါရီလ ၁၃ ရက်၊ ည ၁၂ နာရီ အချိန်တွင် ထုတ်ပြန်ခဲ့သည်။

လက်ရှိအချိန်တွင် TNLA က သိမ်းပိုက်ထားသည့်မြို့များတွင် အုပ်ချုပ်ရေးယန္တရားဖော်ဆောင်ရန် ဆောင်ရွက် နေပြီး အခြေအနေအသေးစိတ်ကို လုံခြုံရေးအရ ပြောပြနိုင်ခြင်းမရှိသေးဟု တာဝန်ခံက ဆက်ပြောသည်။

“သိမ်းထားတဲ့မြို့ ၇ မြို့ကို အုပ်ချုပ်ရေးယန္တရားတွေအကောင်အထည်ဖော်ဖို့ စတင်ပြင်ဆင်နေတဲ့အနေအထားပဲ ရှိပါသေးတယ်။ စစ်ကောင်စီရဲ့ လက်နက်ကြီးရန်နဲ့ ပြည်သူလူထုရဲ့လုံခြုံရေးကို သတိထားပြီး ဆောင်ရွက်နေ တယ်” ဟုဆိုသည်။

စစ်ကောင်စီသည် မြောက်ပိုင်းညီနောင်မဟာမိတ် ၃ ဖွဲ့နှင့် အပစ်အခတ်ရပ်စဲရေးကို ပေါ်ပေါ်တင်တင်ချိုးဖောက်ကာ ရှမ်းပြည်နယ် မြောက်ပိုင်းရှိ TNLA တပ်စခန်းနှင့် တအာင်းနယ်မြေများကို လက်နက်ကြီးအသုံးပြုတိုက်ခိုက်ခဲ့သလို လေကြောင်းတိုက်ခိုက်မှုများလည်း ပြုလုပ်လျက်ရှိသည်။

ဓာတ်ပုံ – PSLF \ TNLA

*********

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – >  https://t.me/newstlk/3045

YouTube- > https://youtu.be/SpxIBpTYop8

Website _> https://thanlwinkhet.net/?p=7091