ပေါက်တောတွင် စစ်ကောင်စီက စစ်အင်အားထပ်မတိုးနိုင်တော့ကြောင်း ရက္ခိုင့်တပ်တော်ပြော

ပေါက်တောတွင် စစ်ကောင်စီက စစ်အင်အားထပ်မတိုးနိုင်တော့ကြောင်း ရက္ခိုင့်တပ်တော်ပြော

*****************************

မိခိုင်

ဒီဇင်ဘာ ၂၂ ၊ ၂၀၂၃။

တကျော့ပြန်တိုက်ပွဲအတွင်း ပထမဆုံးမြို့ပြတိုက်ပွဲဖော်ဆောင်ခဲ့သည့် ပေါက်တောတွင် စစ်ကောင်စီတပ်အနေဖြင့် စစ်အင်အားထပ်မံမတိုးနိုင်ကြောင်း ယမန်နေ့ ဒီဇင်ဘာလ ၂၁ ရက်တွင် ရက္ခိုင့်တပ်တော် – AA က ထုတ်ပြန်လိုက်သည်။

စစ်ကောင်စီတပ်အနေဖြင့် စစ်အင်အားဖြည့်တင်းရန်ကြိုးပမ်းနေသည်မှာ ၁ ပတ်ခန့် ကြာမြင့်ခဲ့ပြီဖြစ်သော်လည်း လက်ရှိအချိန်ထိ ဖြတ်တောက်ထားနိုင်ခဲ့သည်ဟု ရက္ခိုင့်တပ်တော် က ထုတ်ပြန်သည်။

ထုတ်ပြန်ချက်တွင်” စစ်ကောင်စီသည် ပေါက်တောမြို့သို့ လူအင်အား၊ လက်နက်အင်အား ဖြည့်တင်းရန် ကြိုးစားနေခဲ့သည်မှာ ၁ ပတ်ခန့်ကြာမြင့်ပြီဖြစ်သော်လည်း ရက္ခိုင့်တပ်တော်က ဆက်လက်ဖြတ်တောက်ထားဆဲပင်ဖြစ်သည်” ဟု ဖော်ပြထားသည်။

စစ်ကောင်စီက စစ်သင်္ဘော ၃ စင်းဖြင့် အင်အားဖြည့်တင်းရန်လာခဲ့သော်လည်း ရက္ခိုင့်တပ်တော် က ပြန်လည်ပစ်ခတ်ခဲ့ရာ စစ်သင်္ဘော ၁ စင်းထိမှန်၍ ရန်သူစစ်ကူအချို့သေဆုံး၊ ဒဏ်ရာရခဲ့ပြီး ၎င်းစစ်သင်္ဘောလည်း နောက်လှည့်ပြန်ခဲ့ရသည်ဟု သိရသည်။

ဒီဇင်ဘာလ ၂၁ ရက်၊ နေ့လယ် ၁ နာရီဝန်းကျင်တွင် ရခိုင်ပြည်နယ်၊ ပေါက်တောမြို့တွင်း၌ ရက္ခိုင့်တပ်တော်- AA နှင့် စစ်ကောင်စီ၏ လက်ကျန်တပ်ဖွဲ့ဝင်တချို့ တိုက်ပွဲဖြစ်ပွားခဲ့သည့်အပြင် ည  ၉နာရီဝန်းကျင်တွင်လည်း Navy  ၃ စင်းက လက်နက်ကြီးများဖြင့်ပစ်ခတ်၍ ကမ်းတက်ရန် ကြိုးပမ်းခဲ့ကြောင်း ပေါက်တောဒေသခံ ၁ ဦးက ပြောသည်။

” ည ၉ နာရီ ၁၅ မိနစ်လောက်မှာ လက်နက်ကြီးတွေ ၁၀ ချက်လောက် ဆက်တိုက်ပစ်တယ်။ စစ်တပ်က ပေါက်တောကို အင်အားထပ်တိုးဖို့အတွက် ကြိုးပမ်းတယ်လို့ သိရတယ်။ ခဏနေတော့ လက်နက်ငယ်သံတွေ ကြားရတယ်။ စက်သေနတ်တွေနဲ့လည်း ပစ်တယ်။ မိနစ် ၂၀ လောက်ကို တရစပ်ပစ်သံကြားရတယ် “ဟု ၎င်းက ပြောသည့်အပြင် ည ၁၁ နာရီ လောက်အထိ လက်နက်ကြီးသံများကြားရကြောင်းကိုလည်း ၎င်းက ဆက်ပြောသည်။

ပေါက်တောမြို့တွင်ကျန်ရှိနေသေးသည့် စစ်ကောင်စီတပ်သားများက မြို့ပေါ်ရပ်ကွက်များဖြစ်သည့် ပန်းသီးရပ်ကွက်နှင့် ရပ်ကွက် ၃ ထဲရှိ လူနေအိမ်များကို မီးရှို့ဖျက်ဆီးခဲ့သည်ဟု AA က ဆိုသည်။

နိုဝင်ဘာလ ၁၆ရက်ကစတင်၍ စစ်ကောင်စီတပ်နှင့် AA တို့ကြား တိုက်ပွဲဖြစ်ပွားနေခဲ့သည်မှာ ယနေ့တွင် ၃၇ ရက် အထိ ကြာမြင့်လာပြီဖြစ်သည့်အတွက် ဒေသခံသောင်းချီ အိုးအိမ်စွန့်ခွာပြီး စစ်ဘေးဒုက္ခသည်များအနေဖြင့် နီးစပ်ရာကျေးရွာများတွင် ခိုလှုံနေကြရသည်။

စစ်ကောင်စီတပ်ကပေါက်တောမြို့၏ ကုန်းလမ်းရေလမ်းများကို ပိတ်ဆိုထားသည့်အတွက် ကုန်စျေးနူန်းကြီးမြင့် ခြင်း၊ အင်တာနက်လိုင်းပြတ်တောက်ခြင်းများ ကြုံနေကြရသည်။

ဓာတ်ပုံ – Twitter

******

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – > https://t.me/newstlk/2774

YouTube – > https://youtu.be/LsSx5mAIttA?si=cQ389gohgAYNfmVR

Website – >  https://thanlwinkhet.net/?p=6682