“၁၀၂၇ စစ်ဆင်ရေး” ၁၉ ရက်မြောက်နေ့တွင် စစ်စခန်း ၃ ခု သိမ်းပိုက်နိုင်ခဲ့ဟု TNLA ထုတ်ပြန်
*************************************
သံလွင်ခက်
နိုဝင်ဘာ ၁၅၊ ၂၀၂၄။
“၁၀၂၇ စစ်ဆင်ရေး – Operation 1027” ၁၉ ရက်မြောက်ဖြစ်သည့် နိုဝင်ဘာလ ၁၄ ရက် ၁ ရက်တည်းမှာပင် ကိုးကန့်ဒေသနှင့် တအာင်းဒေသက စစ်စခန်း ၃ ခုကို သိမ်းပိုက်နိုင်ခဲ့သည်ဟု PSLF/TNLA သတင်းနှင့် ပြန်ကြားရေးဌာနက ယနေ့ နိုဝင်ဘာလ ၁၅ ရက်တွင် ထုတ်ပြန်ထားသည်။
နိုဝင်ဘာ ၁၄ ရက်တွင် ညီနောင်မဟာမိတ် ၃ ဖွဲ့က ကိုးကန့်ဒေသနှင့် တအာင်းဒေသရှိ ဟွာရှိပန်စခန်း၊ “ပွိုင့် ၆၄၃ – တာဆိုင်းလျံ စစ်ဆင်ရေးခြေကုတ်စခန်း၊ လွယ်ကန်ကျေးရွာရှိ စစ်ကောင်စီနှင့် ၎င်းတို့လက်အောက်ခံ ပြည်သူ့ စစ်ပူးပေါင်းစခန်းစသည့် စခန်း ၃ ခုကို သိမ်းပိုက်နိုင်ခဲ့ခြင်းဖြစ်သည်ဟု ဖော်ပြထားသည်။
နိုဝင်ဘာ ၁၄ ရက် နံနက်ပိုင်းတွင် မြန်မာအမျိုးသားဒီမိုကရက်တစ်မဟာမိတ်တပ်မတော် – MNDAA တပ်ဖွဲ့ဝင်များ သည် ကိုးကန့်ခရိုင်၊ ရှီးရှမ်းဒေသ၊ ဟွာရှိပန်ကျေးရွာအနီးရှိ ရန်သူ့တပ်စခန်းအား လက်နက်ကြီးများဖြင့် စတင် ပစ်ခတ်ခဲ့သည်။
ထို့နောက် ခြေလျင်စစ်ကြောင်းဖြင့် ဆက်လက်ထိုးစစ်ဆင်ခဲ့ပြီးနောက် နံနက် ၁၁ နာရီခွဲဝန်းကျင်တွင် “ဟွာရှိပန် စခန်း”ကို အပြီးသတ်သိမ်းပိုက်နိုင်ခဲ့သည်ဟု ထုတ်ပြန်ချက်တွင်ဖော်ပြထားသည်။
နိုဝင်ဘာ ၁၄ ရက် နံနက် ၄ နာရီဝန်းကျင်တွင်လည်း တအာင်းအမျိုးသားလွတ်မြောက်ရေးတပ်မတော် – TNLA တပ်ဖွဲ့ဝင်များသည် ကွတ်ခိုင်မြို့နယ်၊ လွယ်ကန်ကျေးရွာရှိ စစ်ကောင်စီတပ်ဖွဲ့ဝင်များနှင့် ၎င်းတို့လက်အောက်ခံ ပြည်သူ့စစ်များ၏ ပူးပေါင်းစခန်းကိုသိမ်းပိုက်နိုင်ခဲ့ကာ စစ်အသုံးအဆောင်နှင့် ရိက္ခာပစ္စည်းအချို့ သိမ်းဆည်းရမိ ခဲ့သည်ဟု PSLF/TNLA သတင်းနှင့်ပြန်ကြားရေးဌာနက ထုတ်ပြန်သည်။
ယင်းနေ့ နေ့လယ် ၁၁ နာရီခွဲဝန်းကျင်တွင်လည်း တအာင်းအမျိုးသားလွတ်မြောက်ရေးတပ်မတော် – TNLA တပ် ဖွဲ့ဝင်များသည် တန့်ယန်းမြို့နယ်ရှိ စစ်ကောင်စီတပ် “ပွိုင့် ၆၄၃ – တာဆိုင်းလျံ စစ်ဆင်ရေးခြေကုတ်စခန်း”အား ထပ်မံသိမ်းပိုက်နိုင်ခဲ့သည်ဟု ဖော်ပြထားသည်။
နိုဝင်ဘာ ၁၄ ရက်တွင် ကွတ်ခိုင်မြို့နယ်ရှိ စစ်ကောင်စီလက်အောက်ခံ “မုံးဟွမ်ပြည်သူ့စစ်” တပ်ဖွဲ့ဝင်များသည် တအာင်းအမျိုးသားလွတ်မြောက်ရေးတပ်မတော် – TNLA ထံ လက်နက် ၇ လက် လာရောက်အပ်နှံခဲ့သည့်အပြင် “မုံးပေါ်ပြည်သူ့စစ်” တပ်ဖွဲ့ဝင်များသည်လည်း လက်နက် ၃ လက် လာရောက်အပ်နှံခဲ့သည်ဟု PSLF/TNLA သတင်းနှင့်ပြန်ကြားရေးဌာန၏ ထုတ်ပြန်ချက်အရသိရသည်။
နိုဝင်ဘာလ ၁၄ ရက် ၁ ရက်တည်းမှာပင် ကျောက်မဲမြို့နယ်ရှိ စစ်ကောင်စီ ခမရ – ၅၀၂ တပ်ရင်းကို တအာင်း အမျိုးသားလွတ်မြောက်ရေးတပ်မတော် – TNLA တပ်ဖွဲ့ဝင်များက လက်နက်ကြီးဖြင့် ၁၁ ကြိမ်ပစ်ခတ်ခဲ့ပြီး နမ့်ခမ်း မြို့ရှိ စစ်ကောင်စီတပ် “စခန်းသစ်ကုန်း”ကိုလည်းတိုက်ခိုက်ခဲ့ကြသည်။
ထို့ပြင် နိုဝင်ဘာလ ၁၃ ရက်၊ ည ၉ နာရီခွဲခန့်ကစ၍ နိုဝင်ဘာလ ၁၄ ရက်၊ နံနက် ၆: နာရီခွဲခန့်အထိ နောင်ချို မြို့နယ်၊ ဂုတ်ထိပ်တံတားအနီးတွင် တအာင်းအမျိုးသားလွတ်မြောက်ရေးတပ်မတော် – TNLA ၊ မန္တလေး ပြည်သူ့ ကာကွယ်ရေးတပ် – MDY PDF နှင့် စစ်ကောင်စီတပ်ကြား ထိတွေ့တိုက်ပွဲများဖြစ်ပွားခဲ့ကြသည်ဟု ကာကွယ်ရေး တပ်ဖွဲ့ဝင်များထံက သိရသည်။
နောင်ချိုမြို့နယ်၊ ဂုတ်တွင်းအနီးတဝိုက်ကို စစ်ကောင်စီက နိုဝင်ဘာ ၁၄ ရက် ၁ ရက်တည်းမှာပင် လေကြောင်း တိုက်ခိုက်မှု ၃ ကြိမ် ပြုလုပ်ခဲ့သည်ဟု PSLF/TNLA ကထုတ်ပြန်ထားသည်။
ပုံစာ – သိမ်းပိုက်ခဲ့ပြီးနောက် မြင်တွေ့ရသည့် စစ်ကောင်စီစစ်စခန်းများ။
Photo – PSLF/TNLA သတင်းနှင့်ပြန်ကြားရေးဌာန။
***
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/2453
YouTube- > https://youtu.be/SpxIBpTYop8
Website _> https://thanlwinkhet.net/?p=6275
