ရခိုင်အခြေစိုက်သတင်းဌာနက သတင်းထောက် ၁ ဦးကို စစ်ကောင်စီဖမ်းဆီး
*******************************************************************
မိခိုင်၊ သံလွင်ခက်
အောက်တိုဘာ ၃၀၊ ၂၀၂၃။
ရခိုင်ပြည်နယ် ၊ စစ်တွေအခြေစိုက် သတင်းဌာနတစ်ခုဖြစ်သည် Development Media Group – DMG သတင်းဌာနက သတင်းထောက် ၁ ဦးကို ယမန်နေ့ အောက်တိုဘာ ၂၉ ရက်တွင် စစ်ကောင်စီကဖမ်းဆီးသွားပြီး ကျန်သတင်းထောက်များအားလည်းရှာဖွေနေကြောင်း သိရသည်။
ယမန်နေ့ နေ့လယ် ၁၂ နာရီကျော်ဝန်းကျင်တွင် SB၊ ရဲတပ်ဖွဲ့ဝင်များနှင့် စစ်သား ၁ဝ ဦးကျော် ကား ၃ စီးဖြင့်ရောက်လာပြီး ညစောင့်နှင့် သတင်းထောက် ၁ ဦးအား ဖမ်းဆီးသွားခဲ့သည့်အပြင် ကျန်သတင်းထောက်များကို လည်း ရှာဖွေနေသည့်အတွက် သတင်းထောက်များထွက်ပြေးတိမ်းရှောင်နေရကြောင်း DMG က အမျိုးသမီး သတင်းထောက် ၁ ဦးက ပြောသည်။
“လောလောဆယ်တော့ စစ်တွေကနေ အကုန်ရှောင်သွားကြပြီ။ အခြေအနေသိပ်မကောင်းတော့ အကုန်ရှောင်နေရ တယ်။ ကျန်တဲ့လူတွေကိုလည်း ရှာနေတယ် ဘာညာကြားတော့ အကုန်ရှောင်နေတယ်”ဟု ၎င်းကပြောသည်။
စစ်ကောင်စီအဖွဲ့ဝင်များက DMG ရုံးအတွင်းရှိကာလတန်ဖိုးငွေသိန်း ၁၀၀၀ ခန့်တန်ကြေးရှိသည့် ကင်မရာ၊ ကွန်ပျူတာ စသည့်ပစ္စည်းများကိုလည်း စစ်ကား ၃ စီးဖြင့် ယူဆောင်သွားကြောင်း သိရသည်။
ဖမ်းဆီးထားသည့် သတင်းထောက်နှင့် ရုံးစောင့်တို့အား စစ်တွေမြို့၊ အမှတ် ၁ ရဲစခန်းတွင် ဖမ်းဆီးထားပြီး မည် သည့်အတွက် ဖမ်းဆီးသည်ကိုမူ မသိရသေးကြောင်း DMG က အယ်ဒီတာ ၁ ဦးက ဆိုသည်။
“လက်ရှိမှာက ရဲစခန်းမှာ ဖမ်းထားတယ်ပေါ့။ အခြေအနေက တော်တော် ဆိုးနေတယ်။ ကျွန်တော်တို့လည်း စစ်တွေမှာနေလို့ အဆင်မပြေတော့ ရှောင်နေရတယ် “ဟု ၎င်းက ပြောသည်။
စစ်ကောင်စီက DMG ရုံးကို မည်သည့်အတွက်ကြောင့် ဝင်ရောက်စီးနင်းခြင်းကိုမူ မသိသေးကြောင်း ဝန်ထမ်းများ ကပြောဆိုထားပြီး ရုံးနှင့်ဆက်စပ်ပစ္စည်းများဖြစ်ကြသည့် ကွန်ပျူတာ၊ လက်တော့ပ်၊ ကင်မရာ စသည့်ပစ္စည်းများ ကို စစ်ကောင်စီကသိမ်းယူသွားပြီး ရုံးကိုလည်းချိပ်ပိတ်ထားခဲ့ကြောင်း သိရသည်။
ကျန်ရှိနေသည့် သတင်းထောက်များအနေဖြင့်လည်း လက်ရှိတွင် သတိထားပြီးနေနေရကြောင်း ရခိုင်အခြေစိုက် သတင်းထောက် ၁ ဦးကဆိုသည်။
” ကျွန်တော်တို့ကလည်း စိုးရိမ်နေတယ်။ သူတို့ဘက်က ဖမ်းချင်သလိုဖမ်းနေတဲ့အနေအထားမှာ သတိထားနေရပါ တယ်။ ရခိုင်မှာက သတင်းထောက်တွေကို အမြဲတမ်း စောင့်ကြည့်နေတဲ့ အနေအထားမှာရှိတယ် ” ဟု ၎င်းက ပြောသည်။
DMG သတင်းဌာနသည် မြန်မာ့ရေးရာ၊ နိုင်ငံတကာရေးရာအပါအဝင် ရခိုင်ပြည်အရေးကိစ္စများနှင့် ပတ်သက်သော စစ်ရေး၊ နိုင်ငံရေး၊ စီးပွားရေး၊ လူမှုရေး၊ ဖွံ့ဖြိုးတိုးတက်ရေး၊ တရားမျှတရေးနှင့် လူ့အခွင့်အရေးချိုးဖောက်မှုများကို ဘက်လိုက်မှုမရှိဘဲ ရေးသားတင်ပြနေသော အမှီအခိုကင်းသည့် သတင်းဌာနတစ်ခုဖြစ်၍ ယခုကဲ့သို့ ရုံးအတွင်းကပစ္စည်းများအားသိမ်းဆည်းပြီး သတင်းထောက်နှင့်ညစောင့်တို့အားဖမ်းဆီးခြင်းအပေါ် ရှုတ်ချကြောင်း ယမန်နေ့ ညနေဘက်တွင် DMG က သတင်းထုတ်ပြန်ခဲ့သည်။
ရခိုင်အခြေစိုက်သတင်းဌာနများဖြစ်သည့် DMG၊ Narinjara နှင့် Western News သတင်းဌာနများက အယ်ဒီတာ ချုပ်၊ အယ်ဒီတာနှင့် သတင်းထောက်အပါအဝင် စုစုပေါင်း ၁၀ ဦးအား စစ်ကောင်စီက အမှုဖွင့်၊ တရားစွဲဆိုထား သည်။
**************
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/2256
YouTube- > https://youtu.be/SpxIBpTYop8
Website -> https://thanlwinkhet.net/?p=6009
