ယမင်းဖူးပွင့်အောင်
ဇွန် ၁၊ ၂၀၂၃။
စစ်ကိုင်းတိုင်း၊ ချောင်းဦးမြို့နယ်တွင် ကာကွယ်ရေးတပ်ဖွဲ့စခန်းတစ်ခု ဝင်ရောက်စီးနင်းခံခဲ့ရပြီး ပြည်သူတစ်ဦးကိုစခန်းနှင့်အတူ မီးရှို့ အလောင်းဖျောက်သွားခဲ့သည်ဟု ဒေသခံကာကွယ်ရေးတပ်ဖွဲ့များထံက သိရသည်။
ယမန်နေ့ နံနက်၈နာရီခန့်တွင် Jammer များတပ်ဆင်ထားသည့် စစ်ကောင်စီကားနှစ်စီးသည်
မုံရွေးကျေးရွာ၊ ကြေးမုံကျေးရွာအနီး အင်အား ၁၀၀ ခန့်ဖြင့် ခြေလျင်စစ်ကြောင်းထိုးဝင်ရောက်ကာ စခန်းကို ဝင်ရောက်စီးနင်းခဲ့ခြင်းဖြစ်သည်ဟု Area 71 People Defense Force Monywa ပြန်ကြားရေးတာဝန်ခံ ရဲဘော်Theoက သံလွင်ခက်ကိုပြောသည်။
“လက်နက်ကြီးတွေ လက်နက်ငယ်တွေ တောက်လျှာက်ပစ်ဝင်လာတာဗျ။ လက်နက်ချင်း အင်အားမမျှလို့ အသာလေးရှောင်ထွက်လာကြတာ။ ကင်းစောင့်နေတဲ့ရဲဘော်တွေကြောင့် စခန်းကသူတွေအကုန်လုံး အပွန်းပဲ့မရှိ ဆုတ်လာနိုင်ခဲ့တယ်“ဟု ၎င်းကဆိုသည်။
စစ်ကောင်စီတပ်ဖွဲ့ဝင်များ၏ မီးရှို့ဖျက်ဆီးမှုကြောင့် သိန်း၃၀၀ခန့်တန်ဖိုးရှိသည့် လက်လုပ်မိုင်း၊ လက်လုပ် ၄၀ မမလက်နက်ကြီးများနှင့် ကုန်ကြမ်းပစ္စည်းများ ဆုံးရှုံးခဲ့သည်ဟု သိရသည်။
ထို့ပြင် လူသားဒိုင်းအဖြစ် ခေါ်ဆောင်လာခဲ့သည့် ဒေသခံတစ်ဦးကို မီးရှို့အလောင်းဖျောက်သွားပြီး သေဆုံးသူကိုဆက်လက်စုံစမ်းနေဆဲဖြစ်သည်ဟု ရဲဘော် Theoကဆက်ပြောသည်။
“ဘယ်သူဘယ်ဝါမှန်းကို မသိရတော့ဘူး ခေါင်းပွင့်ထားတာပဲမြင်ရတာ။ ကျွန်တော်တို့စခန်းက ပစ္စည်းတွေနဲ့ရောပြီးပုံရှို့ထားခဲ့တာပဲတွေ့ရတာ။ ကျန်တာတော့ ဘယ်လိုဖြစ်ပျက်ခဲ့သလဲဆိုတာ ပြောရခက်တယ်ဗျ“ဟု ပြောသည်။
အဆိုပါ စစ်ကောင်စီတပ်ဖွဲ့ဝင်များသည် မုံရွေးနှင့် ကြေးမုံရွာအနီး စစ်ဆေးရှာဖွေမှုများပြုလုပ်ခဲ့ပြီး မြို့ပြပြောက်ကျားအဖွဲ့စခန်းတစ်ခုကိုလည်း ထပ်မံစီးနင်းခဲ့သောကြောင့် လက်နက်များဆုံးရှုံးခဲ့ရသည်ဟု Youth Revolution Attack Fore-YRAF အဖွဲ့၏တာဝန်ခံကပြောသည်။
“ခြေလျင်စစ်ကြောင်းက ကျွန်တော်တို့စခန်းကိုအရင်ရောက်လာတာ အထိုင်စခန်းမဟုတ်ဘူး။ ထုတ်လုပ်ရေးစခန်းပါ။ Shotgun နှစ်လက်သိမ်းခံရတယ်။ ပြီးမှ Area 71 စခန်းဆီသွားတာ“ဟုဆိုသည်။
ပြီးခဲ့သည့် မေလ၁၅ရက်နေ့ကလည်း Monywa NightKing အဖွဲ့၏ နောက်တန်းစခန်းကို စစ်ကောင်စီတပ်များကဝင်ရောက်စီးနင်းခဲ့သောကြောင့် လက်လုပ်လက်နက်များ၊ ယူနီဖောင်းများ ဆုံးရှုံးခဲ့ရသည်။
ပုံစာ−မီးရှို့ဖျက်စီးခံရသည့် ကာကွယ်ရေးတပ်စခန်း။
Photo-Crd
*******
အောက်ဖော်ပြပါလင့်တွေမှာ သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/1290
YouTube -> https://youtu.be/Fuwj7S3m10U
Website -> https://thanlwinkhet.net/?p=4819
Website ->https://eng.thanlwinkhet.net
