နန်းဆုပန်ခန့်
ဧပြီ ၂၈ ၊ ၂၀၂၃ ။
ကရင်အမျိုးသားလွတ်မြောက်ရေးတပ်မတော် KNLA အမှတ်၅ တပ်မဟာပူးပေါင်းတပ်များတိုက်ခိုက်သိမ်းပိုက်ထားခဲ့သည့် သံလွင်မြစ်ကမ်းဘေးရှိ မယ်တရိထာ(ခေါ်)မယ်ခါးထာစခန်းပြန်လည်ရရှိရန် စစ်ကောင်စီတပ်ကစစ်ကြောင်းထိုးနေသောကြောင့် တိုက်ပွဲများပြင်းထန်ဖြစ်ပွားနေသည်။
ပြီးခဲ့သည့်မတ်လ ၂၈ရက်တွင် တိုက်ခိုက်သိမ်းပိုက်ခံထားရသည့် အဆိုပါစခန်းဘက်သို့ စစ်ကောင်စီတပ်က ယခုဧပြီလ ၂၃ ရက်တွင် ဝေဟင်၊ မြေပြင်တို့မှထိုးစစ်ဆင်လာသောကြောင့် တိုက်ပွဲများနေ့စဥ်နီးပါးဖြစ်ပွားနေသည်။
စစ်ကောင်စီတပ်၏ အင်အား၂၀၀ ဝန်းကျင်ရှိမြေပြင်ကြောင်းနှင့် KNLA တပ်ဖွဲ့ဝင်များထိတွေ့ တိုက်ပွဲဖြစ်ပွားနေသည့်အပြင် တိုက်လေယာဥ်များဖြင့် နေ့စဥ်လာရောက်တိုက်ခိုက်နေသည်။
မြေပြင်စစ်ကြောင်းများနှင့်ထိတွေ့တိုက်ပွဲများ၊လေကြောင်းမှတိုက်ခိုက်မှုများကြောင့် မယ်ခါးထာကျေးရွာအပါအဝင်အနီးနားရှိ ကျေးရွာ၆ရွာခန့်မှ ဒေသခံ ၈၀၀ ကျော်ဘေးလွတ်ရာထွက်ပြေးနေကြရသည်။
” အခက်အခဲအရမ်းလိုအပ်နေတာကတော့ တောထဲမှာတိမ်းရှောင်နေရတဲ့ ပြည်သူတွေပဲ၊ သူတို့အတွက်ကအဓိကအခြေခံစားသောက်ကုန်တွေဖြစ်ကြတဲ့ ဆန်၊ ဆီ၊ ဆား၊ ငါးပိတွေပဲ၊ အဲ့ဒါတွေရှိရင်သူတို့အသက်ရှင်ရေးအတွက်မနည်းအဆင်ပြေတယ်။ မိုးတွင်းလည်းရောက်တော့မယ်ဆိုတော့ တာလပတ်တို့ကတော့အမိုးအကာအတွက်လိုအပ်တယ် ” ဟု စစ်ရှောင်များကိုကူညီနေသည့် Daw Kalu Network ဥက္ကဋ္ဌ စောယအဲ့နာက သံလွင်ခက်ကို ပြောသည်။
ကရင်အမျိုးသားလွတ်မြောက်ရေးတပ်မတော် KNLA နှင့် FFD( Force For Federal Democracy)တပ်တို့ပူးပေါင်း၍ မယ်ခါးထာစခန်းကိုတိုက်ခိုက် သိမ်းပိုက်စဥ်၌စစ်ကောင်စီတပ်ဖွဲ့ဝင် ၁၆ ဦးသေဆုံး၍ ၇ ဦးဒဏ်ရာရရှိခဲ့သည်။ ထို့ပြင် MA-1၊ MA-2၊ MA-4၊ RPG-7၊ ၆၀မမစိန်ပြောင်း၊ စက်လတ်နှင့် စနိုက်ဖာ စုစုပေါင်း လက်နက်၂၃လက်၊ ကျည် ၃၃၆၀ တောင့်၊ဆက်သွယ်ရေးစက် ၂ လုံး၊ စကားပြောစက် ၂ လုံး၊ ဖုန်း ၂ လုံး၊ ဓာတ်ခဲဗူး ၄ ဗူးနှင့် စစ်ဘောင်းဘီ ၂ ထည်တို့ကိုသိမ်းဆည်းရမိသည်။
ထိုစခန်းကို သိမ်းပိုက်ခံလိုက်ရသည့်အချိန်၌စစ်ကောင်စီတပ်က လေကြောင်းမှ ဆက်တိုက်လာရောက်တိုက်ခိုက်ခဲ့သောကြောင့် ဒေသခံများမှာ တောထဲနှင့် ဆွေမျိုးများရှိရာ ထိုင်းဘက်ခြမ်းသို့ ပြီးခဲ့သောမတ်လကုန်ပိုင်းတွင်လည်း ထွက်ပြေးတိမ်းရှောင်ခဲ့ရသည်။
နှစ်ဖက်တပ်များအတွက်အချက်အချာကျသည့် မယ်ခါးထာစခန်းကို စစ်ကောင်စီတပ်က မြေပြင်ဝေဟင်တို့မှထိုးစစ်ဆင်နေသော်လည်း စခန်းကိုပြန်မပေးရရေး KNLA တပ်များက အကောင်းဆုံးခုခံတိုက်ခိုက်နေသည်ဟု သိရသည်။
မယ်တရိထာ(ခေါ်)မယ်ခါးထာစခန်းသည် ယခင် KNLA-ကရင်အမျိုးသားလွတ်မြောက်ရေးတပ်မတော်၊တပ်ရင်း(၂၀)အခြေစိုက်ရာဒေသဖြစ်ပြီး ၁၉၉၅ခုနှစ် KNUဗဟိုဌာနချုပ်–မာနယ်ပလောကျဆုံးပြီးနောက် စစ်ကောင်စီတပ်က အလုံးအရင်းဖြင့်ထိုးစစ်ဆင်သိမ်းယူထားခဲ့သည့်KNLAစခန်းဟောင်းဖြစ်သည်။
ပုံစာ–ပြီးခဲ့သော မတ်လ၂၈ ရက်တွင်မယ်ခါးထာစခန်းအား KNLA ပူးပေါင်းတပ်က တိုက်ခိုက်သိမ်းပိုက်ခဲ့မှု။
*****************
အောက်ဖော်ပြပါလင့်တွေမှာ သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/876
YouTube -> https://youtu.be/zxRTM_OZtf4
Website -> https://thanlwinkhet.net/?p=3941
Website ->https://eng.thanlwinkhet.net
