မိုးဗြဲမြို့တိုက်ပွဲစစ်ကောင်စီတပ်ဖွဲ့ဝင်၂၀ ကျော် သေဆုံး၍ လက်နက်ခဲယမ်းများ သိမ်းဆည်းရရှိ

Saw Smith

ဧပြီ ၂၇ ၊ ၂၀၂၃ ။

ရှမ်းပြည်နယ်တောင်ပိုင်း၊ ရှမ်း–ကယားနယ်စပ်ဖယ်ခုံမြို့နယ်ရှိ မိုးဗြဲမြို့တွင် တပ်စွဲထားသောစစ်ကောင်စီတပ်ကိုကရင်နီပူးပေါင်းတပ်များ သွားရောက်တိုက်ခိုက်ခဲ့ရာ တပ်စွဲထားသည့်နေရာအား သိမ်းပိုက်နိုင်ခဲ့သည်။

မိုးဗြဲမြို့အဝင် အနီးရပ်ကွက်ဖြစ်သည့် ညောင်ဝိုင်းရပ်ကွက်တွင် တပ်စွဲထားသော စစ်ကောင်စီတပ်ကို မိုးဗြဲပြည်သူ့ကာကွယ်ရေးတပ် MBPDF (၁၀၀၁) တပ်ရင်းမှလင်းယုန်နက်တပ်ခွဲ၊ရွှေလင်းယုန်တပ်ခွဲ၊ကျွဲဂျိုတပ်ခွဲ၊ပြောက်ကျားတပ်ခွဲတို့နှင့် ကရင်နီအမျိုးသားများကာကွယ်ရေးတပ် KNDF B-03၊  KNDF B-01 ၊ မြို့ပြတော်လှန်ရေးတပ်ဦး (URF)တို့ပူးပေါင်း၍ တိုက်ခိုက်ခဲ့သည်။

ယမန်နေ့ ဧပြီလ ၂၆ရက် နံနက် ၅နာရီခွဲမှ၁၀:၁၀ နာရီအထိ အချိန်၄နာရီခွဲအကြာ ထိတွေ့တိုက်ပွဲဖြစ်ပွားပြီးနောက်တပ်စွဲထားသည့်နေရာအားသိမ်းပိုက်နိုင်ခဲ့သည်ဟု MBPDF လင်းယုန်တပ်ခွဲက ယနေ့တွင်ထုတ်ပြန်ထားသည်။

ထိုစခန်းသိမ်းတိုက်ပွဲ၌ စစ်ကောင်စီတပ်ဖွဲ့ဝင် ၂၀ ဦးထက်မနည်းသေဆုံးပြီး ၂ဦးကိုအရှင်ဖမ်းမိခဲ့သည်။ ထို့ပြင်တချို့စစ်ကောင်စီတပ်ဖွဲ့ဝင်များမှာ ဒဏ်ရာများဖြင့်ထွက်ပြေးခဲ့ကြပြီး RPG(၁)လက်၊MA-1 (၄)လက်၊MA-2(၄)လက်၊MA-3(၂)လက်၊MA-4(၁)လက်၊၆၀mmစိန်ပြောင်း(၂)လက်နှင့်ခဲယမ်းမီးကျောက်အမြောက်အများကိုကရင်နီပူးပေါင်းတပ်များက သိမ်းဆည်းရရှိခဲ့သည်။

တိုက်ပွဲအတွင်းအထိနာသောစစ်ကောင်စီတပ်က လေယာဥ်ဖြင့်၄ ကြိမ်လာရောက်တိုက်ခိုက်ခဲ့သည့်အပြင် ဖယ်ခုံအမြောက်တပ်၊လွိုင်ကော်အ‌မြောက်တပ်၊မိုးဗြဲ ခမရ(၄၂၂)တပ်နှင့် ဝါရီဆူးဖလိုင်ဘက်တို့လက်နက်ကြီးများဖြင့်ပစ်ကူပေးခဲ့သည်။

စစ်ကောင်စီတပ်မှ လေယာဥ်အပြင်လက်နက်ကြီးများ အမြောက်အများသုံး၍ ပစ်ကူပေးတိုက်ခိုက်ခဲ့သော်လည်းပူးပေါင်းတပ်ဖွဲ့ဘက်မှကျဆုံးမှုမရှိဘဲ ထိခိုက်ဒဏ်ရာများသာရရှိခဲ့သည်ဟု MBPDF လင်းယုန်တပ်ခွဲကဖော်ပြထားသည်။

စစ်ကောင်စီတပ်၏ လေကြောင်းမှတိုက်ခိုက်မှုနှင့်လက်နက်ကြီးများဖြင့်ပစ်ခတ်မှုကြောင့် ပြည်သူများ၏နေအိမ်အဆောက်အဦးများစွာပျက်စီးခဲ့သည်ဟု MBPDF တပ်ရင်း ၁၀၀၁ ကဖော်ပြထားသည်။

” စစ်ကောင်စီတပ်စွဲထားတဲ့ရပ်ကွက်မှာက သူတို့နဲ့နီးတဲ့အခြမ်းက စစ်ရှောင်ကြတယ်။ တစ်ချို့ကဘုန်းကြီးကျောင်းမှာပြောင်းနေကြတယ်။ သတင်းတောင်ထုတ်ဖို့မလိုလောက်တဲ့ ဒဏ်ရာနည်းနည်းရတာ ပြည်သူ၃ဦးတော့ရှိတယ် ။ အခြားထိခိုက်ဒဏ်ရာရတဲ့ဟာတွေတော့ ကျွန်တော်တို့ဆီအခုထိဆက်သွယ်လာတာမရှိသေးပါဘူး “ဟု မိုးဗြဲမြို့ကူညီကယ်ဆယ်ရေးအဖွဲ့တာဝန်ခံက ယနေ့နံနက်ပိုင်းတွင် သံလွင်ခက်ကိုပြောသည်။

ယနေ့နံနက်ပိုင်းတွင်လည်း လွိုင်ကော်–မိုးဗြဲလမ်းမ၌တိုက်ပွဲဖြစ်ပွားမှုရှိသည်ဟု ဒေသခံတချို့ကဖော်ပြထားပြီး ထိုအခြေအနေနှင့်ပတ်သက် ၍ မိုးဗြဲပြည်သူ့ကာကွယ်ရေးတပ် MBPDF ၁၀၀၁ တပ်ရင်း နှင့်သက်ဆိုင်ရာ MBPDF တပ်ခွဲများထံဆက်သွယ်မေးမြန်းခဲ့သော်လည်း လက်တလော၌ ပြန်လည်ဖြေကြားခြင်းမရှိသေးပေ။

မိုးဗြဲမြို့တိုက်ပွဲ၌အထိနာခဲ့သော စစ်ကောင်စီတပ်က ပြည်သူ့အပေါ်အညိုးထားလက်စားခြေမှုတို့အား နည်းလမ်းအမျိုးမျိုးဖြင့်ဆောင်ရွက်လာနိုင်‌သဖြင့် မြို့နေမိဘပြည်သူများ၊စစ်ရှောင်မိဘပြည်သူများ သတိထားကာသွားလာနေထိုင်ကြပါရန် MBPDFက သတိပေးထားသည်။

ပြီးခဲ့သည့်ရက်ပိုင်း ဧပြီလ၂၅ရက် နေ့လည်ပိုင်းတွင်လည်းစစ်ကောင်စီတပ်က မိုးဗြဲအနောက်ခြမ်းရှိ စစ်ဘေးရှောင်များစခန်းနှင့်ဒေသခံများကို ကျန်းမာရေးစောင့်ရှောက်မှုပေးနေသည့် ဆောင်းဖွေးဆေးရုံတို့ကို တိုက်ပွဲဖြစ်ပွားခြင်းမရှိဘဲ  လေကြောင်းမှဗုံးကြဲတိုက်ခိုက်ခဲ့သည်။

*****************

အောက်ဖော်ပြပါလင့်တွေမှာ သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – > https://t.me/newstlk/847

YouTube -> https://youtu.be/zxRTM_OZtf4

Website -> https://thanlwinkhet.net/?p=3873

Website ->https://eng.thanlwinkhet.net