KIA ပူးပေါင်းတပ်က ဝိုင်းမော်မြို့နယ်တွင် စစ်ကောင်စီ၏ တပ်စခန်း နှစ်ခုသိမ်းပိုက်
*************
(တိုက်ပွဲများကြောင့် ကန်ပိုက်တီအဆင်းကားလမ်းနှင့် ပန်ရှန်ကျေးရွာ လမ်းများကို ယာယီပိတ်ထား)
ထွယ်
ဇွန် ၁၁၊ ၂၀၂၄။
ကချင်ပြည်နယ် ဝိုင်းမော်မြို့နယ် ဆဒုံး – ကန်ပိုက်တီ ရှိ စစ်ကောင်စီတပ်စခန်းများကို ကချင်လွတ်မြောက်ရေးတပ်မတော် – KIA နှင့် ပူးပေါင်းတပ်ဖွဲ့ဝင်များ ယနေ့နံနက် အစောပိုင်းကတည်းက တစ်ပြိုင်တည်း ထိုးစစ်ဆင်တိုက်ခိုက်ရာ နံနက် ၉ နာရီခန့်က တပ်စခန်းနှစ်ခုကို တိုက်ခိုက်သိမ်းပိုက်ထားနိုင်ပြီဖြစ်သည်ဟု ရှေ့တန်းသတင်းရင်းမြစ်များထံက သိရသည်။
ဝိုင်းမော်မြို့နယ် ဝါးရှောင်ကျေးရွာအထွက်ရှိ ၁၃ မိုင် စုပေါင်းဂိတ်အပါအဝင် ဝိုင်းမော် – ကန်ပိုက်တီ ကားလမ်းပေါ်ရှိ ဘွမ်တောင် ပြည်သူ့စစ်စခန်းကို တိုက်ခိုက်သိမ်းပိုက်ထားနိုင်ခြင်းဖြစ်သည်ဟု ရှေ့တန်းသတင်းရင်းမြစ်တစ်ဦးက ပြောသည်။
“ဆဒုံးဗျူဟာကုန်းနဲ့ ၁၃ မိုင်ဂိတ်အပါအဝင် ဘေးနားဝန်းကျင်က စစ်ကောင်စီစခန်းတွေကို တစ်ပြိုင်တည်း ဝင်တိုက်နေတာ၊ ၁၃ မိုင်ဂိတ်နဲ့ အပေါ်စခန်းကိုတော့ သိမ်းလိုက်ပြီ” ဟု ပြောသည်။
ဝိုင်းမော် – ကန်ပိုက်တီ ကားလမ်းပေါ်ရှိ ဘွမ်တောင် ပြည်သူ့စစ်စခန်းကို ယနေ့နံနက် ၇ နာရီခွဲခန့်က တိုက်ခိုက် သိမ်းပိုက်နိုင်ခဲ့ခြင်းဖြစ်ပြီး ၁၃ မိုင် စုပေါင်းဂိတ်ကိုမူ ယနေ့နံနက် ၉ နာရီခန့်က တိုက်ခိုက်သိမ်းပိုက်နိုင်ခဲ့ခြင်းဖြစ်သည်ဟု သိရသည်။
ဝါးရှောင်ကျေးရွာအကျော်ရှိ အဆိုပါ ၁၃ မိုင်ဂိတ်သည် ဆဒုံးနှင့် ချီဖွေ သွားလမ်းခွဆုံတွင် တည်ရှိပြီး စစ်ကောင်စီတပ် ဖွဲ့ဝင်များနှင့် စစ်ကောင်စီလက်အောက်ခံ ဌာနပေါင်းစုံမှ ဝန်ထမ်းများ အခွန်ကောက် စစ်ဆေးသည့် ဂိတ်ဖြစ်သည်ဟု မြစ်ကြီးနား – ကန်ပိုက်တီ ကားပြေးဆွဲနေသည့် ကားဆရာတစ်ဦးက ပြောသည်။
ထို့ပြင် အဆိုပါ ဂိတ်မှ လေးဖာလုံခန့်အကွာတွင် ဂေါ်ဆက်ယန်ကျေးရွာတည်ရှိပြီး ဝါးရှောင်ကျေးရွာဒေသခံများနှင့် ဂေါ်ဆက် ယန်ကျေးရွာဒေသခံ အချို့သည် ဝိုင်းမော်မြို့နယ် မိုင်းနာကျေးရွာသို့ စစ်ဘေးတိမ်းရှောင်လျက်ရှိသည်ဟု ဒေသခံများထံက သိရသည်။
ယနေ့နံနက်ဖြစ်ပွားသည့် တိုက်ပွဲကြောင့် ဝိုင်းမော်မြို့နယ် ဝူယန်ကျေးရွာတွင် ဝူယန်ပြည်သူ့စစ်တပ်ဖွဲ့ဝင်များနှင့် စစ်ကောင်စီတပ်ဖွဲ့ဝင်များက ကားလမ်းများ ပိတ်ထားပြီး ကန်ပိုက်တီအဆင်းကားများကိုလည်း ကန်ပိုက်တီ – ဆဒုံး ကားလမ်းပေါ်ရှိ ပန်ရှန်ကျေးရွာတွင် လမ်းပိတ်ထားသည်ဟု ကားလိုင်းပြေးဆွဲနေသည့် ကားဆရာတစ်ဦးက ပြောသည်။
“လမ်းပိတ်လို့ ကျွန်တော်တို့ ကားသမားတွေလည်း မြစ်ကြီးနားကို ပြန်ခေါက်လာကြတယ်။ ဟိုဘက်မှာ တိုက်ပွဲဖြစ်နေ တယ်ဆိုပြီး ပိတ်ထားတာ။ ကန်ပိုက်တီက အဆင်းကားတွေလည်း ပိတ်ထားတာတဲ့။ ဘယ်အချိန်ထိ ပိတ်ထားမယ်၊ ဘယ်အချိန်မှ ဖွင့်ပေးမယ်ဆိုတာတော့ မပြောတတ်သေးဘူးတဲ့” ဟု ပြောသည်။
ကချင်ပြည်နယ် ဝိုင်းမော်မြို့နယ်တွင် တိုက်ပွဲများ ပြင်းထန်နေပြီး ဝိုင်းမော်မြို့နယ်အတွင်းရှိ ဆဒုံးနှင့် ကန်ပိုက်တီ ကားလမ်းပေါ်ရှိ စစ်ကောင်စီတပ်စခန်းများကို တစ်ပြိုင်တည်း ထိုးစစ်ဆင် တိုက်ခိုက်နေခြင်းဖြစ်သည်။
ကချင်ပြည်နယ်ရှိ စစ်ကောင်စီတပ်စခန်းများကို KIA နှင့် ပူးပေါင်းတပ်က ယခုနှစ် မတ်လ ၇ ရက်ကတည်းက တစ်ပြိုင် တည်း ထိုးစစ်ဆင် တိုက်ခိုက်နေခြင်းဖြစ်ပြီး တပ်စခန်း စုစုပေါင်း ၁၀၀ ခန့်ကိုလည်း တိုက်ခိုက်သိမ်းပိုက်ထားနိုင်ခဲ့ပြီ ဖြစ်သည်။
ပုံစာ – ကချင်လွတ်မြောက်ရေးတပ်မတော်မှ တပ်သားများ (ပုံအဟောင်း)
****
Telegram – > https://t.me/ThanLwinKhetNews/4771
YouTube -> https://youtu.be/64zTrEXeLCI
Website -> https://thanlwinkhet.net/?p=10467
