သံလွင်ခက်
နိုဝင်ဘာ ၂၊၂၀၂၄။
ထိုင်း-မြန်မာနယ်စပ် ကရင်ပြည်နယ် ဘုရားသုံးဆူမြို့တွင် တရုတ်လူမျိုးများ ရောက်ရှိအခြေချပြီး စီးပွားရေးလုပ်ငန်းများစွာလုပ်ကိုင်လာကြသည်ဟု ဒေသခံများထံမှ သိရသည်။
ယခုနှစ် နှစ်ဆန်းပိုင်းမှစပြီး ဘုရားသုံးဆူမြို့ထဲသို့ တရုတ်လူမျိုးများ ဝင်ရောက်လာပြီးနောက် ကာစီနိုလောင်းကစားရုံ ဆောက်လုပ်ရန်အတွက် မြို့နှင့်အနီးပတ်ဝန်းကျင်ရှိ မြေလွတ်မြေရိုင်းများကို ငွေအဆမတန်ပေးကာ ဝယ်ယူလာကြသည်ဟု ဒေသခံအမျိုးသားတစ်ဦးက သံလွင်ခက်ကို ပြောသည်။
၎င်းက “ ဘုရားသုံးဆူမြို့ရဲ့ ပတ်ဝန်းကျင်မှာရှိတဲ့ မြေလွတ်မြေရိုင်းတွေကို ပိုင်ရှင်တွေရောင်းတဲ့ထိ ဈေးတွေအဆမတန်ပေးဝယ်တယ် ။အဆောက်အအုံတွေ ဟိုတယ်တွေဆောက်နေတယ်။ အခုဆိုရင် တရုတ်တွေက အချက်အချာကျတဲ့ နေရာတွေမှာ အိမ်လုံးချင်းတွေ တိုက်ခန်းတွေကို မတရားဈေးနဲ့ လှမ်းပြီးတော့ စားသောက်ဆိုင်တွေဖွင့်တယ် ။ဒီလိုလုပ်ငန်းတွေပါ နယ်ချဲ့လာတဲ့ အခါကျတော့ ဒီမြို့ခံလုပ်ငန်းရှင်တွေ ၊ သာမန်လူတွေရော အခက်အခဲဖြစ်လာတာပေါ့ ”ဟု ဆိုသည်။
ဘုရားသုံးဆူမြို့သည် ဒီမိုကရေစီအကျိုးပြုကရင်တပ်မတော် (DKBA) ထိန်းချုပ်နယ်မြေတွင်ရှိနေပြီး ထိုင်း-မြန်မာနယ်စပ်ထွက်ပေါက်ရှိသော ဒေသဖြစ်သည်။
ဘုရားသုံးဆူ ဒေသခံတစ်ဦးက “တရုတ်တွေက ဘုရားသုံးဆူဘက်ကို ဖေဖော်ဝါရီလထဲက အခြေချလာတာ။ အခုဆိုရင် လူဦးရေ ၅ထောင်လောက်ရှိပြီ။ တရုတ်တွေက သူတို့စရောက်လာတဲ့အချိန်ထဲကိုက လက်နက်ကိုင် အဖွဲ့တွေကို ကပ်ထားတာလေ၊ ကျွန်တော့်မြို့မှာက KNU ၊ DKBA ၊ BGF (KNA) တွေရော မြို့အုပ်ချုပ်ရေးလုပ်နေတယ်ဆိုတော့ သူတို့ကို ကပ်ထားပြီးတော့ နေနေကြတယ်” ဟု ဆိုသည်။
လက်ရှိအချိန်တွင် ဘုရားသုံးဆူမြို့နှင့် အနီးတဝိုက်၌ အဆိုပါ တရုတ်လူမျိုးဖွင့်လှစ်ထားသော Hotpot ဆိုင်များ၊ အဝတ်အထည်ဆိုင်များ၊ ကားအရောင်းပြခန်းအပါအဝင် ကာစီနိုလုပ်ငန်းများကို လုပ်ကိုင်လျှက်ရှိသည်။
“ စီးပွားရှာတယ်ဆိုပေမယ့်လည်း ကျွန်တော်တို့ ဆိုလိုတဲ့သဘောက ဘုရားသုံးဆူမှာ အုပ်ချုပ်နေတဲ့ KNU၊ DKBA၊ PC၊ MNSP၊ BGF၊ နောက်ဆုံးဒီမှာရှိနေတဲ့ လက်တစ်ဆုပ်စာ စစ်တပ်လည်း ပါရင်ပါမယ် ။ သူတို့က ပြည်သူတွေရဲ့ အခက်အခဲကိုမကြည့်ဘဲနဲ့ တရုတ်တွေရဲ့ အလိုကိုပဲ လိုက်နေမယ်ဆိုရင် တရုတ်တွေရဲ့ စိုးမိုးမှုက ကျွန်တော်တို့ ခန့်မှန်းတာကတော့ မကြာခင်မှာ ဘုရားသုံးဆူမြို့က တရုတ်မြို့ကြီးဖြစ်သွားနိုင်တယ်လို့ပဲ မြင်တယ်ဗျ”ဟု အဆိုပါ ဒေသခံက ဆိုသည်။
ပြီးခဲ့သည့် မေလတွင် မြဝတီမြို့နယ်အတွင်းရှိ ကျားဖြန့်တရုတ်ငွေလိမ်လုပ်ငန်းလုပ်ကိုင်နေသူများအား အောက်တိုဘာလကုန်နောက်ဆုံးထား၍ ထွက်ခွာရန် ကရင်နယ်ခြားစောင့်တပ် BGF ခေါ် ကရင်အမျိုးသားကာကွယ်ရေးတပ်မတော် KNA က သတိပေးလိုက်ပြီးနောက်ပိုင်းတွင် ဘုရားသုံးဆူမြို့သို့ ရောက်ရှိလာခဲ့သည်ဟု ဒေသခံများက ပြောသည်။
ဓါတ်ပုံ – ဘုရားသုံးဆူမြို့ လမ်းမမြင်ကွင်း(သံလွင်ခက်)
