စစ်ကြောင်းဝင်ရောက်ပြီးနောက် ကော့ဘိန်းနှင့်ကော့ပလိုင်ဒေသခံ ၆ ဦးသတ်ဖြတ်ခံထားရ
*****
သဇင်
ဧပြီ ၂၉၊ ၂၀၂၄။
ကရင်ပြည်နယ်၊ ကော့ကရိတ်မြို့နယ်၊ ကော့ဘိန်းရွာသို့ စစ်ကြောင်းထိုးဝင်ရောက်လာသည့် စစ်ကောင်စီစစ်ကြောင်းထွက်ခွာသွားပြီးနောက် သတ်ဖြတ်ခံထားရသော ဒေသခံရုပ်အလောင်း ၆ လောင်းခန့်တွေ့ရှိခဲ့သည် ဟု ဒေသခံများထံကသိရသည်။
တော်လှန်ရေးပူးပေါင်းအဖွဲ့များက ကော့ဘိန်းနယ်မြေရဲစခန်းကိုတိုက် ခိုက်သိမ်းပိုက်ပြီးနောက် ဧပြီလ ၂၅ ရက်၊ မနက်ပိုင်းတွင် စစ်ကောင်စီအင်အား ၃၀၀ ခန့်ဖြင့် ကော့ဘိန်းရွာတွင်း စစ်ကြောင်းထိုးဝင်ရောက်လာခဲ့သည်။
ထိုသို့စစ်ကြောင်းထိုးဝင်ရောက်မှုကြောင့် ရွာလုံးကျွတ်ထွက်ပြေးတိမ်းရှောင်နေရပြီး စစ်ကောင်စီတပ်က စစ်ကြောင်းထိုးရာလမ်းတလျှောက်တွေ့ရှိသူများကို ဖမ်းဆီးရိုက်နှက်မှုများလုပ်ဆောင်ခဲ့သည်ဟု သိရသည်။
ယင်းနောက် ဧပြီလ ၂၅ ရက်ညနေပိုင်းတွင် စစ်ကြောင်းပြန်ဆုတ်ခဲ့ပြီး စစ်ကြောင်းပြန်လည်ဆုတ်ခွာရာလမ်းရှိ ကော့ဘိန်းနှင့် ကော့ပလိုင်ရွာရှိ ဒေသခံ ၆ ဦးကိုသတ်ဖြတ်ခဲ့သည်ဟု စစ်ရေးနီးစပ်သူ ၁ ဦးက သံလွင်ခက်ကို ပြောသည်။
“စစ်ကြောင်းက မနက်ပိုင်း၀င်လာပြီး ညနေပိုင်း အကုန်ပြန်ထွက်သွားကြတယ်။ ကော့ပလိုင်မှာတော့ ၄ လောင်း တွေ့ရတယ်။ ၃ လောင်းက ကော့ပလိုင်ရွာသား။ နောက် ၁ လောင်းက ဘယ်ရွာကလူလည်းတော့မသိဘူး။ ပြီးတော့ ကော့ဘိန်းစျေးတန်းမှာ ၁ လောင်း အလောင်းကပုပ်နေပြီ။ ရွာအပြင်မှာ ၁ လောင်းတွေ့ရတယ်”ဟု ဆို သည်။
လက်ရှိတွင် ကော့ဘိန်းရွာရှိဒေသခံများ နေရပ်မပြန်နိုင်သေးသည့်အပြင် နယ်မြေရှင်းလင်းရေးမလုပ်ဆောင်ရသေးသည့်အတွက် သေဆုံးသူများထပ်ရှိနိုင်သေးသည်ဟုလည်း ၎င်းကဆိုသည်။
ယင်းအပြင် ကော့ဘိန်းနှင့် ကော့ပလိုင်ရွာနေအိမ်များရှိ တန်ဖိုးရှိပစ္စည်းများနှင့် ဆိုင်ကယ်များကိုလည်း အဆိုပါ စစ်ကြောင်းက ယူဆောင်သွားသေးသည်ဟု ဒေသခံအမျိုးသား ၁ ဦးက ပြောသည်။
၎င်းက “အိမ်တွေဖောက်ခံရတယ်။ တန်ဖိုးရှိပစ္စည်း အများကြီးပျောက်တယ်။ အများဆုံး သူတို့ယူသွားတာဆိုရင် ရွာထဲကဆိုင်ကယ်တွေပါ။ ကော့ပလိုင်ရွာနဲ့ ကော့ဘိန်းရွာကနေ ယူခံထိတာ ဆိုင်ကယ်အစီး ၂၀၀ ပျောက်ဆုံးသွားပါတယ်” ဟုဆိုသည်။
ကော့ဘိန်းနယ်မြေရဲစခန်းကို တော်လှန်ရေးပူးပေါင်းတပ်များက ပြီးခဲ့သည့် မတ်လ ၂၅ ရက်တွင်ဝင်ရောက်တိုက်ခိုက်သိမ်းပိုက်ခဲ့ပြီး တိုက်ပွဲအတွင်း စစ်သား ၂ ဦးသေဆုံးကာ ၂၃ ဦး အရှင်ဖမ်းဆီးမိခဲ့ပြီး လက် နက်အများအပြားလည်း သိမ်းဆည်းရရှိခဲ့သည်။
ဓာတ်ပုံ – Crd
ပုံစာ – စစ်ကောင်စီစစ်ကြောင်းဝင်ရောက်လာပြီးနောက် ကော့ဘိန်းကျေးရွာမြင်ကွင်း။
