မြဝတီ အမှတ် ၂ တံတားအနီးသို့ ယနေ့နံနက်အထိ စစ်ကောင်စီ လေကြောင်းတိုက်ခိုက်
**************************
နန်းဆုပန်ခန့်
ဧပြီ ၂၁၊ ၂၀၂၄။
ထိုင်း – ကရင်နယ်စပ် အမှတ် ၂ ချစ်ကြည်ရေးတံတားအနီးသို့ စစ်ကောင်စီတပ်ဖွဲ့ဝင်များက လေယာဉ်ဖြင့် လာရောက် ဗုံးကြဲမှုများ ယနေ့မနက်အထိ လုပ်ဆောင်ခဲ့သည်ဟု မြေပြင်သတင်းရင်းမြစ်များထံမှ သိရသည်။
ဧပြီလ ၂၀ မနက်သန်းခေါင်ချိန်မှစ၍ ည ၁၀ နာရီကျော်အထိ လေကြောင်း ဗုံးကြဲတိုက်ခိုက်မှုများ အဆက်မပြတ် ပြုလုပ်ခဲ့သည့်အပြင် နှစ်နာရီနီးပါးသာ နား၍ ဧပြီ ၂၁ ရက် မနက် ၁၂ နာရီ ကျော်မှ စတင်ကာ ထပ်မံဗုံးကြဲတိုက်ခိုက်မှုများ ပြုလုပ်ခဲ့သည်။
ကေအဲန်ယူဗဟို၏ ယနေ့ မနက်ထုတ်ပြန်ချက်တွင်လည်း ဧပြီ ၂၁ ရက် နံနက် ၄ နာရီအချိန်ခန့်တွင် အမှတ် ၂ တံတား ဝဲယာ၌ ရှေ့၊နောက် လေယာဉ် ၄ စီး ဆက်တိုက်လာရောက်၍ ဗုံး ၁၂ လုံးအထိ ကြဲချသွားခဲ့သည်ဟု ပါရှိသည်။
မြေပြင်ရဲဘော်တစ်ဦးက “ ဒီမနက်လည်း လေယာဉ်လာသွားသေးတယ်။ ပတ်ကြဲတာ“ ဟု သံလွင်ခက်ကို အတည်ပြု ပြောသည်။
ယမန်နေ့ ဧပြီလ ၁၉ ရက်ည ၇ နာရီဝန်းကျင်ခန့်တွင် တံတား ၂ အနီးရှိ ခလရ – ၂၇၅ မှ ထွက်ပြေးလာသည့် လက်နက်မချသေးသော စစ်ကောင်စီတပ်ဖွဲ့ဝင် ၁၀၀ ကျော်ရှိရာကို ကရင်ပူးပေါင်းတပ်ဖွဲ့ဘက်မှ ဒရုန်းဖြင့် ဗုံးချပြီးနောက် နှစ်ဖက် ထိတွေ့တိုက်ပွဲ ပြန်လည် စတင်ခဲ့သည်။ ဧပြီ ၂၀ တစ်ရက်လုံးတွင် စစ်ကောင်စီဘက်မှ Y-12 လေယာဉ်၊ Mi-35 ရဟတ်ယာဉ်၊ ဂျက်ဖိုက်တာများဖြင့် အဆက်မပြတ် ပစ်ကူပေးခဲ့သည်။
ယမန်နေ့ ဧပြီ ၂၀ ရက် နံနက် ၈ နာရီကျော်အချိန်တွင် ထိုစစ်ကောင်စီတပ်သားများအား ပစ်ခတ်ခဲ့ပြီး နယ်မြေရှင်းလင်းရန် လုပ်သော်လည်း စစ်တပ်ဘက်မှ ယနေ့အချိန်အထိ လေကြောင်းသုံး တိုက်ခိုက်နေဆဲရှိသည်။
ထိုတိုက်ပွဲအတွင်း စစ်ကောင်စီဘက်မှ လက်နက်ကြီးပစ်သောကြောင့် ပူးပေါင်းတပ်ဖွဲ့စစ်ကြောင်းဖြစ်သည့် ကျားသစ်နက်မှ ရဲဘော်တစ်ဦး ကျဆုံးပြီး စစ်ကောင်စီတပ်ဘက်မှလည်း သေဆုံးမှုများ ရှိကြောင်း ကနဦး သိရသည်။
အမှတ် ၂ တံတားအနီးရှိ ပြည်သူများသည် ဧပြီ ၂၀ ရက်မှစတင်၍ ထိုင်းနိုင်ငံဘက်ခြမ်းနှင့် မြဝတီဘက်ခြမ်း သောင်းရင်းမြစ်အနီးသို့ ဘေးလွတ်ရာပြောင်းရွှေ့လျက်ရှိပြီး စစ်ကောင်စီမှ လေကြောင်းတိုက်ခိုက်မှုများကြောင့်လည်း နေအိမ်၊ အဆောက်အဦးနှင့် ပြည်သူလူထု ထိခိုက်မှုများလည်း ရှိခဲ့သည်။
ဓာတ်ပုံ- စစ်ကောင်စီ၏ လေကြောင်းတိုက်ခိုက်မှုများကြောင့် မြဝတီဘက်ခြမ်းမှ သောင်းရင်းမြစ်ဖြတ်ကူးနေရသော ဒေသခံ စစ်ဘေးရှောင်များ (သံလွင်ခက်)
