ဆွာမြို့အရှေ့ဘက်တွင် စစ်ရေးပြင်းထန်နေ

ဆွာမြို့အရှေ့ဘက်တွင် စစ်ရေးပြင်းထန်နေ
******

သဇင်
ဧပြီ ၁၉၊ ၂၀၂၄။

ပဲခူးတိုင်း ၊ ရေတာရှည်မြို့နယ် ၊ ဆွာမြို့အရှေ့ဘက် စစ်တောင်းမြစ်အရှေ့ခြမ်းရှိကျေးရွာများတွင် နှစ်ဖက်တိုက်ပွဲ ပြင်းထန်ခဲ့ပြီး စစ်ကောင်စီကလေကြောင်းသုံးတိုက်ခိုက်မှုများပါပြုလုပ်ခဲ့သည်ဟု ဒေသခံများထံက သိရသည်။

ပြီးခဲ့သည့် ဧပြီလ ၁၇ ရက် မနက် ၅ နာရီခန့်တွင် စစ်ကောင်စီတပ်က အင်အား ၈၀ ဝန်းကျင်ဖြင့် ဆွာမြို့ အရှေ့ဘက်ရှိ ဂွေးပျောက်ကုန်းကျေးရွာကို စတင်စစ်ကြောင်းထိုးဝင်ရောက်လာခဲ့ပြီး ဂွေးပျောက်ကုန်းကျေးရွာ ထိပ်တွင် တေ်လှန်ရေးပူးပေါင်းအဖွဲ့များနှင့် ထိတွေ့တိုက်ပွဲစတင်ခဲ့သည်။

ဧပြီလ ၁၇ ရက် မနက် ၅ နာရီဝန်းကျင်ကနေ ညနေ ၃ နာရီအထိ တစ်နေကုန်နီးပါးတိုက်ပွဲပြင်းထန်ခဲ့သည့်အပြင် ယင်းနေ့မနက် ၁၀ နာရီဝန်းကျင်တွင်လည်း စစ်ကောင်စီက ဂျက်ဖိုက်တာ ၁ စီးဖြင့် ဆွာမြို့အရှေ့ခြမ်းရှိ ကျေးရွာ တဝိုက်အား ပစ်ခတ်ခဲ့သည့်အတွက် ရွာသစ်ကျေးရွာရှိနေအိမ်တချို့ ထိခိုက်ပျက်စီးခဲ့သည်ဟု ရေတာရှည်မြို့နယ် ပကဖ တာဝန်ရှိသူ ၁ ဦးကဆိုသည်။

၄င်းက “ဂျက်ဖိုက်တာ ၁ စီးနဲ့ မိနစ် ၄၀ လောက်ပတ်ပြီးတော့ ၄ ကြိမ်လောက်လာပစ်သွားတာ။ ပေါင် ၂၅၀ ဗုံး ၆ လုံးချသွားတာ ရွာသစ်ရွာ အရှေ့ပိုင်းကို နေအိမ် ၃ လုံးထိသွားတယ်။ မနက်အစာပိုင်းတိုက်ပွဲစတာနဲ့ ဒရုန်း ၃ စီး လောက်သုံးပြီး ပစ်သေးတယ်” ဟုဆိုသည်။

နှစ်ဖက်ထိတွေ့တိုက်ပွဲပြင်းထန်ခဲ့သဖြင့် စစ်ကောင်စီတပ်ဖွဲ့ဝင် ၂၀ ဦးခန့်သေဆုံးပြီး ၁၅ ဦး ထိခိုက်ဒဏ်ရာရရှိခဲ့ ကာ တော်လှန်ပူးပေါင်းအဖွဲ့များဘက်ကလည်း ကျဆုံးထိခိုက်မှုရှိခဲ့သည်ဟု စစ်ရေးနီးစပ်သူ ၁ ဦးက ဆိုသည်။

၄င်းက “တိုက်ပွဲကပြင်းထန်တော့ သူတို့ဘက်က ၂၀ လောက်သေတယ်။ ၁၅ ယောက် ဒဏ်ရာရတယ်။ တိုက်ပွဲ ဖြစ်နေတဲ့အချိန်အတွင်းမှာ သူတို့ဘက်က ၁၂၀ မမ လက်နက်ကြီးပစ်ကူတွေလည်းသုံးတော့ ကျွန်တော်တို့ ကာကွယ်ရေးတပ်ဖွဲ့က ၄ ယောက်ကျပြီး ဒဏ်ရာရတာ ၈ ဦးရှိတယ်” ဟု ဆိုသည်။

တိုက်ပွဲပြင်းထန်နေသည့်အတွက်ကြောင့် သေဆုံးရဲဘော် ရုပ်အလောင်း ၃ လောင်းကိုသာရရှိခဲ့ပြီး ကျန် ၁ ဦး ၏ ရုပ်အလောင်းမှာမူ စစ်မြေပြင်တွင်ကျန်ရစ်နေခဲ့သည်ဟု ၄င်းက ဆက်လက်ပြောဆိုသည်။

ယင်းနောက် ဧပြီလ ၁၇ ရက် ညနေ ၄ နာရီခန့်တွင် တိုက်ပွဲငြိမ်သက်သွားသော်လည်း ရွာသစ်ကျေးရွာနှင့် ၁ မိုင် ခန့်ဝေးသည့် ဂွေးဗောက်ကုန်းကျေးရွာရှိနေအိမ် ၃ လုံးအား စစ်ကောင်စီတပ်ဖွဲ့ဝင်များက မီးရှို့ဖျက်ဆီးခဲ့သေး သည်။

လက်ရှိတွင် ဆွာမြို့အရှေ့ခြမ်းရှိ ဆွာရွာမကျေးရွာနှင့် ကျိပ်ပတီး၊ ခင်တန်းကြီးကျေးရွာများတွင် စစ်ကောင်စီတပ်က အင်အား ထပ်မံဖြည့်တင်းထားပြီး စစ်ရေးတင်းမာနေသည်ဟု ရေတာရှည်ပကဖ တာဝန်ရှိသူက ပြောသည်။

ပြီးခဲ့သည့် မတ်လ ၂၆ ရက်တွင်လည်း စစ်ကောင်စီတပ်က ရေတာရှည်မြို့နယ် စစ်တောင်းမြစ် အရှေ့ဘက်ကမ်း ကျေးရွာများကို လေကြောင်းတိုက်ခိုက်မှုများ ပြုလုပ်ခဲ့သည်။

ဓာတ်ပုံ – ပေးပို့။

ပုံစာ – စစ်ကောင်စီ၏ လေကြောင်းတိုက်ခိုက်မှုကြောင့်ပျက်စီးခဲ့သည့် ရွာသစ်ကျေးရွာ နေအိမ်မြင်ကွင်း။