စစ်တပ်ဖမ်းဆီးထားသည့် ကချင်ဘာသာရေးခေါင်းဆောင် ပြန်လွတ်
******************
ထွယ်
ဧပြီ ၁၇၊ ၂၀၂၄။
စစ်ကောင်စီတပ်ဖွဲ့ဝင်များက ဖမ်းဆီးပြီး ပုဒ်မ သုံးခုဖြင့် ထောင်ဒဏ် ခြောက်နှစ် ချမှတ်ခံထားရသည့် ကချင်ဘာသာရေးဆရာ သိက္ခာတော်ရ ဒေါက်တာခလမ်ဆမ်ဆွန် ယနေ့ ပြန်လည်လွတ်မြောက်လာပြီဟု သိရသည်။
ဒေါက်တာခလမ်ဆမ်ဆွန်ကို စစ်ကောင်စီတပ်ဖွဲ့ဝင်များက ၂၀၂၂ ခုနှစ် ဒီဇင်ဘာ ၅ ရက်တွင် မန္တလေး တံတားဦးလေဆိပ်၌ ဖမ်းဆီးခဲ့ခြင်းဖြစ်သည်။ ဖမ်းဆီးခံရပြီးနောက် တစ်နှစ်ခွဲခန့် အကြာတွင် ပြန်လည်လွတ်မြောက်ခဲ့ခြင်းဖြစ်သည်။
စစ်ကောင်စီတပ်သည် ဒေါက်တာခလမ်ဆမ်ဆွန်ကို ထိုင်းနိုင်ငံသို့ သွားရောက်ဆေးကုသမှုခံယူရန် ထွက်ခွာမည့်အချိန် မန္တလေး တံတားဦးလေဆိပ်တွင် ဖမ်းဆီးကာ ကချင်ပြည်နယ် မြစ်ကြီးနားမြို့သို့ လေယာဉ်ဖြင့် ခေါ်ဆောင်ခဲ့သည်။ ၂၄ ရက်အကြာ စစ်ကြောရေးတွင် ထားရှိပြီးနောက် မြစ်ကြီးနားမြို့နယ် အမှတ် (၁) ရဲစခန်းတွင် ပုဒ်မ ၅၀၅-က၊ မတရားအသင်းအက် ဥပဒေ ပုဒ်မ ၁၇ (၁)၊ အကြမ်းဖက်တိုက်ဖျက်ရေး ပုဒ်မ ၅၂ စသည့် ပုဒ်မ သုံးခုဖြင့် အမှုဖွင့် တရားစွဲဆိုခဲ့ကာ မြစ်ကြီးနားအကျဉ်းထောင်သို့ ပို့ဆောင်ခဲ့သည်။
အမှုဖွင့် တရားစွဲဆိုခဲ့ပြီးနောက် ထောင်ဒဏ် ၆ နှစ် ချမှတ်ခံခဲ့ရသော်လည်း ယနေ့ ပြန်လည် လွတ်မြောက်ခဲ့ပြီဖြစ်သည်။ ကချင်ဘာသာရေးခေါင်းဆောင် ဒေါက်တာခလမ်ဆမ်ဆွန်သည် ကချင်နှစ်ခြင်းခရစ်ယာန်အသင်းတော် (KBC) ၏ ဥက္ကဋ္ဌဟောင်း တစ်ဦးဖြစ်ကာ ကချင်အတိုင်ပင်ခံအဖွဲ့၏ ဥက္ကဋ္ဌလည်း ဖြစ်သည်။
ဒေါက်တာခလမ်ဆမ်ဆွန်သည် ၂၀၁၉ ခုနှစ်က အမေရိကန်သမ္မတ ဒေါ်နယ်ထရမ့်နှင့် တွေ့ဆုံစဉ်က ခရစ်ယာန်ဘာသာဝင်များ ကြုံတွေ့နေရသော ဘာသာရေးဆိုင်ရာ ခွဲခြားဖိနှိပ်ခံရမှုများအကြောင်းကို တင်ပြပြောဆိုခဲ့သူလည်း ဖြစ်သည်။
ပုံ – ကချင်နှစ်ခြင်း ခရစ်ယာန် အဖွဲ့ချုပ် KBC
