နယ်စပ်နှစ်ဖက်လုံးရှိပြည်သူ့အရေး KNU အထူးအလေးထားဆောင်ရွက်မည်
*****
နန်းဆုပန်ခန့်
ဧပြီ ၁၃၊ ၂၀၂၄။
မြဝတီဒေသနှင့် ထိုင်း – ကရင်နယ်စပ် တည်ငြိမ်အေးချမ်းရေးကဏ္ဍများအတွက် ကရင်အမျိုးသားအစည်းအရုံး – KNU က အထူးအလေးထားဆောင်ရွက်မည်ဖြစ်သည်ဟု ယမန်နေ့ညတွင် ကေအဲန်ယူဗဟိုက ထုတ်ပြန်သည်။
ထိုင်း – ကရင် နယ်စပ်မျဉ်းတွင်နေထိုင်သော ပြည်သူလူထု၏ ဘေးကင်းလုံခြုံရေး၊ နယ်စပ်တည်ငြိမ်ရေးနှင့် လူသားချင်း စာနာထောက်ထားမှုအကူအညီများ ရရှိရေးဆိုင်ရာကဏ္ဍများအတွက် အထူးအလေးထား၍ အတတ်နိုင်ဆုံး ကြိုးပမ်းအားထုတ်လုပ်ဆောင်သွားမည်ဟု ထုတ်ပြန်ချက်ကဆိုသည်။
ပြီးခဲ့သည့် ဧပြီလ ၅ ရက်တွင် အရှေ့တောင်တိုင်း စစ်ဌာနချုပ်လက်အောက်ခံ သင်္ဃန်းညီနောင်ဗျူဟာကို လည်းကောင်း၊ ဧပြီလ ၁၁ ရက်၌ မြဝတီမြို့ရှိ ခြေလျင်တပ်ရင်း ခလရ – ၂၇၅ တပ်ရင်းကိုလည်းကောင်း ကရင် ပူး ပေါင်းတပ်များက သိမ်းပိုက်နိုင်ခဲ့သည်။
ထိုသို့သိမ်းပိုက်နိုင်ခဲ့မှုကြောင့် စစ်ကောင်စီကလည်း အဆိုပါစခန်းများ လက်မလွှတ်စေရေးအတွက် စစ်ကောင်စီ တပ်၏ တပ်မ ၅၅ က ကော့ကရိတ်၊ မြဝတီသို့ စစ်ကြောင်းထိုးလာနေပြီး ကာကွယ်ရေးပူးပေါင်းတပ်ဘက်ကလည်း ယင်းစစ်ကြောင်းအား ကြားဖြတ်ပိတ်ဆို့တိုက်ခိုက်ခြင်းများ ပြုလုပ်နေသောကြောင့် တိုက်ပွဲများ မကြာခဏ ဖြစ်ပွားလျက်ရှိသည်။
ယမန်နေ့ ကေအဲန်ယူထုတ်ပြန်ချက်တွင်လည်း မြဝတီဒေသကို လုံခြုံရေးအရ စိတ်ချရသည့် အနေအထားအောက် သို့ ရောက်ရှိပါက KNU သည် မြဝတီမြို့ကို ၎င်းဒေသရှိဒေသခံများ၏ ပူးပေါင်းပါဝင်မှုဖြင့် အုပ်ချုပ်ရေးလုပ်ငန်းများ ချမှတ်ခြင်း၊ လူကုန်ကူးမှု၊ တရားမဝင်စီးပွားရေးလုပ်ငန်းများ၊ တားမြစ်ပစ္စည်းကုန်သွယ်မှုများ ပိတ်ပင်တားဆီးရေး နှင့် မြို့တည်ငြိမ်ရေး၊ တရားဥပဒေစိုးမိုးရေးလုပ်ငန်းများ ဖော်ဆောင်ခြင်း၊ မရှိမဖြစ်လိုအပ်သော ပြည်သူ့ဝန်ဆောင်မှုများနှင့် ကုန်စည်စီးဆင်းရေးလုပ်ငန်းများကို စိန်ခေါ်မှုများကြားကပင် ဖြစ်နိုင်သည့် အနေအထားများဆောင်ရွက်သွားမည်ဖြစ်သည်ဟု ဖော်ပြထားသည်။
ယင်းအပြင် နှစ်နိုင်ငံအတွင်းနေထိုင်သည့်ပြည်သူများ လူသားချင်း စာနာထောက်ထားမှုဆိုင်ရာအကူအညီများ ရရှိရေး၊ နယ်မြေတည်ငြိမ်အေးချမ်းရေးကို ပြန်လည်တည်ဆောက်နိုင်ရေးအတွက် ထိုင်းနိုင်ငံအစိုးရ နှင့် နယ်စပ်အခြေစိုက် ကရင်အဖွဲ့အစည်းများအပါအဝင် ပြည်တွင်းပြည်ပ မဟာမိတ်အဖွဲ့အစည်းများအားလုံးနှင့်ချိတ် ဆက်ပြီး ပူးပေါင်းဆောင်ရွက်မှုပြုလုပ်နိုင်ရေး ကြိုးစားသွားမည်ဖြစ်သည် ဟု ဆိုသည်။
စစ်တပ်ကအာဏာသိမ်းလိုက်သည့် ၂၀၂၁ ခုနှစ်ကစ၍ ၂၀၂၃ ခုနှစ်အထိ ၃ နှစ်နီးပါးကာလအတွင်း ကရင်ပြည်နယ် ရှိ ခရိုင် ၇ ခုတွင် ပဋိပက္ခများကြောင့် နေရပ်စွန့်ခွာရှောင်တိမ်းနေထိုင်ရသည့် စစ်ဘေးရှောင် ၇၀၀,၀၀၀ ကျော် ရှိပြီဟု ကရင်အမျိုးသားအစည်းအရုံး၏ ဇန်နဝါရီလ ၁၈ ရက်ထုတ်ပြန်ချက်အရသိရသည်။
၂၀၂၄ ခုနှစ် နှစ်ဦးပိုင်းကစ၍ ကရင်ပြည်နယ်တွင် တိုက်ပွဲများပိုမိုပြင်းထန်လာသောကြောင့် စစ်ရှောင်အရေအတွက် တိုးလာနေသည်။
ဓာတ်ပုံ – ပေးပို့။
ပုံစာ – သောင်ရင်းမြစ်ကမ်းဘေးတစ်နေရာ၌ စစ်ရှောင်နေရသူများ။
