ခလရ ၂၇၅ မှ စစ်ကောင်စီတပ်ဖွဲ့ဝင်များ မြဝတီအမှတ် ၂ တံတားတွင် ပိတ်မိနေဆဲ
***********
သံလွင်ခက်။
ဧပြီ ၁၂၊ ၂၀၂၄။
ကရင်ပြည်နယ်၊ မြဝတီမြို့စောင့်တပ်ဖြစ်သည့် စစ်ကောင်စီ ခြေလျင်တပ်ရင်း ခလရ ၂၇၅ မှ စစ်ကောင်စီတပ်ဖွဲ့ဝင်များသည် မြဝတီ – မဲဆောက် ချစ်ကြည်ရေးတံတားအမှတ် ၂ တွင် ပိတ်မိနေဆဲဖြစ်သည်ဟု ဒေသတွင်းသတင်းရင်းမြစ်များထံမှ သိရသည်။
ဒေသခံအမျိုးသားတစ်ဦးက “မြဝတီ အမှတ် ၂ ကုန်သွယ်ရေးဇုန် ဝင်ဝင်ချင်းအပေါက်ဘေးက အဆောက်အဦးမှာ ရှိနေတုန်းပဲ။ ထိုင်းဘက်ခြမ်းကို ခိုလှုံဖို့ ညှိမရသေးလို့ဖြစ်မယ်“ ဟုဆိုသည်။
မြဝတီမြို့တွင် နောက်ဆုံးကျန်ရှိသော စစ်ကောင်စီတပ် ခလရ−၂၇၅ တပ်စခန်းအား လက်နက်ချအညံ့ခံရန် ကရင်အမျိုးသားလွတ်မြောက်ရေးတပ်မတော် (K.N.L.A) မှ ဦးဆောင်ပြီး ကရင်အမျိုးသားကာကွယ်ရေးတပ်ဖွဲ့ (K.N.D.O) နှင့် တော်လှန်ရေးပူးပေါင်းတပ်ဖွဲ့များက အခွင့်အရေးပေးခဲ့သော်လည်း ထိုတပ်စခန်းမှ လက်နက်ချအညံ့ခံခြင်းမရှိဘဲ စစ်ကူများလာရောက်နိုင်ရန်အတွက်ခုခံ တိုက်ခိုက်ခဲ့သည်။
ထို့ကြောင့် KNLA ၊ KNDO နှင့် တော်လှန်ရေးပူးပေါင်းတပ်များက ခလရ−၂၇၅ တပ်စခန်းအား ဧပြီလ ၈ ရက်တွင် စတင်ထိုးစစ်ဆင်ခဲ့ကာ ဧပြီ ၁၁ ရက် မနက် ၄း၂၀ နာရီတွင် အပြီးသတ် သိမ်းပိုက်နိုင်ခဲ့ပြီး လက်နက်ခဲယမ်းအမြောက်အများအား သိမ်းဆည်းရမိခဲ့သည်။ ခလရ−၂၇၅ တပ်စခန်းအား တိုက်ခိုက်သိမ်းပိုက်နိုင်ခဲ့ပြီးနောက် စစ်ကောင်စီတပ်ဖွဲ့ဝင်များသည် မြဝတီတံတားအမှတ် (၂) တွင် သွားရောက် ပုန်းရှောင်လျက်ရှိသည်ဟု KNU က ယမန်နေ့တွင် ထုတ်ပြန်ထားသည်။
မြဝတီတံတားအမှတ် (၂) တွင် သွားရောက်ပုန်းရှောင်သော စစ်ကောင်စီတပ်ဖွဲ့ဝင်များအနေဖြင့် ထိုင်းနိုင်ငံသို့ သွားရောက်ခိုလှုံရန် စီစဉ်လျက်ရှိသော်လည်း ယခုအချိန်အထိ သွားရောက်နိုင်ခြင်းမရှိဘဲ ပိတ်မိနေခြင်း ဖြစ်သည်။
စစ်ကောင်စီတပ်ဖွဲ့ဝင်များက ပြည်သူလူထုကို ရမ်းသန်း ပစ်ခတ်မှုများ ဖြစ်ပေါ်လာနိုင်သည့်အတွက် ပြည်သူများအနေဖြင့် ထိုနေရာအနီးတစ်ဝိုက်သို့ သွားရောက်ခြင်း မပြုလုပ်ရန်လည်း KNU က သတိပေးထုတ်ပြန်သည်။
ထို့အပြင် ထိုင်း – ကရင်နယ်စပ် မြဝတီမြို့၊ အမှတ် ၂ တံတားတွင် ပုန်းအောင်းနေသည့် စစ်ကောင်စီတပ်ဖွဲ့ဝင်အချို့သည် ယမန်နေ့၌ Honda fit ကားဖြင့် ထိုင်းနိုင်ငံဘက်ခြမ်းသို့ ဝင်ရောက်လာသည်ကို သံလွင်ခက်က မျက်မြင်တွေ့ရှိခဲ့သည်။ ယမန်နေ့ နံနက် ၁၂ နာရီခန့်အချိန်ထိ Honda Fit ကားဖြင့် ထိုင်းနိုင်ငံဘက်ခြမ်းသို့ စုစုပေါင်း ၈ ဦး ဝင်ရောက်လာခဲ့ခြင်းဖြစ်သည်။
လက်ရှိတွင် မြဝတီမြို့အနီး၌ တိုက်ပွဲများ ငြိမ်သက်လျက်ရှိပြီး ဒေသခံအများစုသည်လည်း မြို့တွင်း ပုံမှန်သွားလာလျက်ရှိသည်ဟု ဒေသခံများထံမှ သိရသည်။
ပုံစာ – မြဝတီ အမှတ် ၂ တံတားအပေါက်ဝအနီးတွင် မြင်တွေ့ရသည့် ခလရ ၂၇၅ မှ စစ်ကောင်စီတပ်ဖွဲ့ဝင်များ။ (ဓာတ်ပုံ – သံလွင်ခက်)
