လွယ်ဂျယ်မြို့ကို KIA အပြီးသတ်သိမ်းပိုက်
********
ထွယ်
ဧပြီ ၉၊ ၂၀၂၄။
ကချင်ပြည်နယ်၊ မိုးမောက်မြို့နယ်ရှိ တရုတ် – မြန်မာ နယ်စပ် လွယ်ဂျယ်မြို့ကို ကချင်လွတ်လပ်ရေးတပ်မတော် KIA နှင့်ပူးပေါင်းတပ်က ၁၂ ရက်ကြာ ထိန်းချုပ်ထားပြီးနောက် ယနေ့နံနက်တွင် မြို့ကို အပြီးတိုင် သိမ်းပိုက်လိုက် ပြီဟု ရှေ့တန်းရဲဘော်များထံက သိရသည်။
လွယ်ဂျယ်မြို့တွင်ကျန်ရှိနေသည့် မြို့စောင့်တပ်ရင်း ခလရ – ၁၄၂ ရှိ စစ်ကောင်စီဖွဲ့ဝင်များနှင့် Non – CDM ဝန်ထမ်းများသည် ယမန်နေ့ည ၁၀ နာရီခန့်တွင် ကားအကြီး ၂ စီးဖြင့် တရုတ်ပြည်ဘက်ခြမ်းသို့ ထွက်ခွာသွား သည်ဟု လွယ်ဂျယ်ဒေသခံ ၁ ဦးက သံလွင်ခက်ကို ပြောသည်။
၎င်းက “ကားအကြီးနဲ့ တရုတ်ပြည်ဘက်ခြမ်းကို ဝင်သွားကြတာ။ အခု မနက်ရှင်းလင်းရေးလုပ်နေကြပြီ။ အရင်ပိတ်ထားတဲ့လမ်းတွေကိုလည်း ရှင်းလင်းရေးလုပ်နေပြီ” ဟု ပြောသည်။
ကချင်ပြည်နယ်တွင်တပ်စွဲထားသည့် စစ်ကောင်စီတပ်ဖွဲ့ဝင်များသည် စခန်းဆုတ်ခွာမှုနှင့် အလံဖြူထောင် လက်နက်ချခြင်းများ ပြုလုပ်လာကြသည်။
လွယ်ဂျယ်မြို့တွင်ကျန်ရှိနေသည့် စစ်ကောင်စီတပ်ဖွဲ့ဝင်များ စခန်းစွန့်ခွာသကဲ့သို့ ၂၀၂၃ ခုနှစ်၊ နိုဝင်ဘာ ၂၀ ရက် အင်ဂျန်းယန်မြို့နယ်၌တပ်စွဲထားသည့် စစ်ကောင်စီတပ်စခန်း ၂ ခုနှင့် ရဲစခန်း အပါအဝင် စစ်ကောင်စီရုံးများသည် လည်း စခန်းမှဆုတ်ခွာသွားသဖြင့် KIA ပူးပေါင်းတပ်က တိုက်ခိုက်ခြင်းမပြုရဘဲ မြို့ကို သိမ်းပိုက်နိုင်ခဲ့သည်။
ယင်းအပြင် ကချင်ပြည်နယ်တွင် တပ်စွဲထားသည့် စစ်ကောင်စီတပ်စခန်းများကို KIA နှင့်ပူးပေါင်းတပ်က မတ်လ ၇ ရက်ကစ၍ တပြိုင်နက်ထိုးစစ်ဆင်တိုက်ခိုက်ခဲ့ပြီး လိုင်ဇာမြို့အနီးရှိ ဒေါ့ဖုန်းယန်မြို့တွင်တပ်စွဲထားသော စစ်ကောင်စီ ခလရ – ၁၄၂ တပ်ရင်းသည်လည်း မတ်လ ၈ ရက် နံနက်ပိုင်းတွင် အလံဖြူထောင် လက်နက်ချခဲ့ သည်။
စစ်ကောင်စီတပ်က နှစ် ၄၀ ခန့် တပ်စွဲခဲ့သည့် လွယ်ဂျယ်မြို့အနီးရှိ ယောရုံတောင် – Yaw Yung Bum နှင့် ၎င်းစခန်းအနီး တပ်စွဲထားသည့် စစ်ကောင်စီတပ်စခန်းများကို KIA ပူးပေါင်းတပ်က တိုက်ခိုက်သိမ်းပိုက်ပြီးနောက် မတ်လ ၂၉ ရက်တွင် ထိန်းချုပ်ထားနိုင်ခြင်းဖြစ်သည်။
ထို့နောက် KIA နှင့်ပူးပေါင်းတပ်က ဧပြီလ ၁ ရက်တွင် လွယ်ဂျယ်မြို့တွင်းဝင်ရောက်ပြီး လွယ်ဂျယ်မြို့ရှိ စျေးနှင့် ဆေးရုံတို့တွင် ကချင်အမျိုးသားအလံလွှင့်ထူကာ မြို့ရှိ ရုံးများကို ဝင်ရောက်နေရာယူခဲ့သည်။
လွယ်ဂျယ်မြို့သည် ကချင်ပြည်နယ်၊ မိုးမောက်မြို့နယ်ရှိ မြို့တစ်မြို့ဖြစ်ပြီး တရုတ်နိုင်ငံ၊ ယူနန်ပြည်နယ်၊ လုံးချွန်းကောင်တီနှင့် နယ်နိမိတ်ချင်းထိစပ်နေသည့် မြို့ဖြစ်သည်။
အဆိုပါ လွယ်ဂျယ်မြို့သည် မြန်မာနိုင်ငံနှင့် တရုတ်နိုင်ငံကြား ကူးသန်းကုန်သွယ်ရန် ၂၀၀၂ ခုနှစ်က ဖွင့်လှစ်ခဲ့သည့် နယ်စပ်ကုန်သွယ်ရေးဂိတ်တည်ရှိရာ မြို့လည်းဖြစ်သည်။
ပုံစာ – လွယ်ဂျယ်မြို့စောင့်တပ် ခလရ – ၁၄၂ တပ်စခန်းကို ဝင်ရောက်ရှင်းလင်းနေသည့်မြင်ကွင်း။
