မောင်တောမြို့ကို စစ်ကောင်စီတပ် အင်အားဖြည့်တင်းနေ

မောင်တောမြို့ကို စစ်ကောင်စီတပ် အင်အားဖြည့်တင်းနေ
*****

ခင်သရဖီဦး
ဧပြီ ၈၊ ၂၀၂၄။

ရခိုင်ပြည်နယ်၊ မောင်တောမြို့တွင် စစ်‌ကောင်စီတပ်က ယခုရက်ပိုင်းအတွင်း စစ်အင်အားဖြည့်တင်း‌နေသည်ဟု ဒေသခံများထံက သိရသည်။

မောင်တောတွင် ခရိုင်အုပ်ချုပ်ရေးမှူးနှင့် လက်အောက်ခံဝန်ထမ်းတချို့ ထွက်ပြေးသွားပြီးနောက် စစ်ကောင်စီတပ်အနေဖြင့် အင်အားဖြည့်တင်းနေခြင်းဖြစ်သည်။

မောင်တောဒေသခံ ၁ ဦးက “ရေလမ်းကနေပို့နေတာ တွေ့ရတယ်။ ပြည်မဘက်ကရော စစ်တွေကရောပို့နေ​တာလို့ ပြောကြတယ်​။ အုပ်ချုပ်ရေးမှူးထွက်ပြေးပြီးမှ အင်အားဆက်တိုက်ဖြည့်နေတယ်” ဟု ဆိုသည်။

မောင်တော ခရိုင်အုပ်ချုပ်ရေးမှူး ဦးနေဦး သည် ပြီးခဲ့သည့် ဧပြီလ ၅ ရက် ညအချိန်တွင် ထွက်ပြေးသွားခြင်းဖြစ်သည်ဟု ဒေသခံများထံက သိရသည်။

ထို့ကြောင့် လက်ရှိတွင် မောင်တောမြို့ရှိ စစ်ကောင်စီအုပ်ချုပ်ရေးယန္တရားရပ်တန့်သွားပြီး ဒေသခံအများအပြာသည်လည်း မြို့အား စွန့်ခွာထွက်ပြေးနေကြဟု မောင်တောမြို့ခံ ၁ ဦးက သံလွင်ခက်ကိုပြောသည်။

၎င်းက “မောင်တောမြို့ပေါ်မှာ ရခိုင်တွေက အိမ်စောင့်လောက်ပဲ ကျန်တော့တယ်။ တချို့ကျန်ခဲ့တာက ခရီးစရိတ်မတတ်နိုင်လို့ ကျန်တာတွေရှိတယ်။ အကုန်လုံးနီးပါး မြို့​ကို စွန့်ခွာနေကြပါတယ်။ မြို့ပေါ်ထိ တိုက်ပွဲ​တွေရှိနေ​​တော့ အကုန်လုံးက တိမ်းရှောင်နေကြပါတယ်” ဟု ဆိုသည်။

မောင်တောတွင် အင်တာနက်ပြတ်တောက်နေပြီး ကုန်စျေးနှုန်းမြှင့်တက်နေသည့်အတွက် ဒေသခံများ အခက်အခဲအမျိုးမျိုး ကြုံတွေ့နေကြသည်။

စစ်ကောင်စီတပ်က မောင်တောမြို့ပေါ်ရှိ ခရိုင်ပြည်သူ့ဆေးရုံအား ပြီးခဲ့သည့် မတ်လကစ၍ တပ်စခန်းချရန်အတွက် ဆေးရုံအားပိတ်ခဲ့သည်။

ထို့နောက် ခရိုင်ဆေးရုံအုပ်နှင့် လက်ထောက်ဆရာဝန်များကိုပါ ဖမ်း၀ရမ်းထုတ်ထားသည်ဟု ဒေသခံများထံက သိရသည်။

မောင်တောတွင် ရက္ခိုင့်တပ်တော် နှင့် စစ်ကောင်စီတပ်တို့ကြား တိုက်ပွဲများဖြစ်ပွားနေပြီး AA က နယ်ခြားစောင့် စခန်းအများအပြားအား သိမ်းပိုက်ထားသည်။

ထို့ပြင် ကျန်ရှိနေသည့် ကြိမ်ချောင်းစခန်းကဲ့သို့ လက်ကျန်စခန်းများကိုလည်း ထိုးစစ်များဖြင့် ဆက်လက် တိုက်ခိုက်နေသည်ဟု AA က ပြီးခဲ့သည့် ဧပြီလ ၅ ရက်တွင် ထုတ်ပြန်ထားသည်။

ကြိမ်ချောင်းစခန်းအား AA ကသိမ်းပိုက်ရရှိထားသည်ဟု သတင်းများထွက်ပေါ်နေသော်လည်း သံလွင်ခက် အနေဖြင့် သီးခြားအတည်မပြုနိုင်ခြင်းမရှိပေ။