ဖျာပုံအကျဉ်းထောင် နိုင်/ကျဉ်းများအပါဝင် အကျဥ်းသားများအား ထောင်ဒဏ်ထပ်တိုး

ဖျာပုံအကျဉ်းထောင် နိုင်/ကျဉ်းများအပါဝင် အကျဥ်းသားများအား ထောင်ဒဏ်ထပ်တိုး
*****************

သဇင်
ဧပြီ ၂၊၂၀၂၄။

ဧရာဝတီတိုင်း၊ ဖျာပုံအကျဉ်းထောင်တွင် ‌ထောင်ဖောက်ရန်ကြံစည်သည်ဟူသောစွပ်စွဲချက်ဖြင့် နိုင်ငံရေးအကျဥ်းသားအပါအဝင် အကျဥ်းသား ၁၇ ဦးကို ထောင်ဒဏ် ၆ လ ထပ်မံချမှတ်လိုက်သည်ဟု အကျဥ်းထောင်နှင့် နီးစပ်သူများထံက သိရသည်။

မတ်လ ၃၁ ရက် ညနေပိုင်းတွင် အကျဥ်းထောင်ဝန်ထမ်းက သက်ကြီးပိုင်းနိုင်ငံရေးအကျဉ်းသား ၁ ဦးကို ဆဲဆိုခဲ့ပြီး ထိုသို့ဆဲဆိုခဲ့သည်ကို ကျန်ရှိနေသည့် နိုင်ငံရေးအကျဥ်းသားများကမကျေနပ်သည့်အတွက် အချင်းများကြရာကနေ ခိုက်ရန်ဖြစ်ပွားမှုအထိဖြစ်ခဲ့သည်ဟု မြန်မာနိုင်ငံလုံးဆိုင်ရာနိုင်ငံရေးအကျဥ်းသားများ ကူညီစောင့်ရှောက်ရေးကွန်ရက် ဦးဆောင်ကော်မတီဝင် ကိုသိုက်ထွန်းဦး က ဆိုသည်။

ထိုသို့ခိုက်ရန်ဖြစ်ပွားခဲ့သည်ကို ထောင်အာဏာပိုင်များက အကျဥ်းထောင်ဖောက်ပြေးရန်ကြိုးစားခဲ့သည်ဟုဆိုကာ ရဲနှင့် စစ်သားများခေါ်ပြီး ပစ်ခတ်ဖြိုခွင်းခိုင်းခဲ့သည်ဟု သိရသည်။

ထို့နောက် ဖျာပုံအကျဉ်းထောင်သို့ ရဲနှင့်စစ်ကား ၃ စီးခန့် ရောက်ရှိလာခဲ့ပြီး သေနတ်ဖြင့်ပစ်ခတ်ဖြိုခွင်းခဲ့သည်။

ယင်းအပြင် ခိုက်ရန်ဖြစ်ပွားသည့်ဖြစ်စဉ်အတွင်းပါဝင်ခဲ့သည့် နိုင်ငံရေးအကျဉ်းသားအပါအဝင် အကျဉ်းသား ၁၇ ဦးကို အချုပ်ခန်းပြင်ပခေါ်ထုတ်ကာ ရိုက်နှက်နှိပ်စက်စစ်ဆေးခဲ့ပြီး ထိုအထဲက ၃ ဦးသည် ပြင်းထန်ဒဏ်ရာရရှိ ထားသည်ဟု အကျဥ်းထောင်နှင့် နီးစပ်သူများထံက သိရသည်။

အကျဥ်းသားများကို ခေါ်ယူစစ်ဆေးပြီးနောက် တိုက်ပိတ်မည်ဟုသတင်းများထွက်ပေါ်ခဲ့ပြီး ယမန်နေ့ ဧပြီလ ၁ ရက်တွင် အဆိုပါ အကျဉ်းသားများအား ထောင်ဒဏ် ၆ လ ထပ်မံချမှတ်ခဲ့သည်ဟု အကျဉ်းထောင်နှင့် နီးစပ်သူ ၁ ဦးက ပြောသည်။

၄င်းက “အကျဉ်းသား ၁၇ ဦးကို ထောင် ၆ လ ထပ်ချလိုက်တာ။ မနေ့က စစ်ဆေးတဲ့ချိန်မှာ သူတို့ကိုဗျင်းတယ်။ ဗျင်းတော့ သူတို့ကပြန်ခုခံတော့ ဒုထောင်ပိုင်နဲ့ ထောင်ပိုင်ကြီးက ကျွေးပြီးတော့ကြိုးတုပ်ထားတယ်” ဟု ဆိုသည်။

ဖျာပုံအကျဥ်းထောင်တွင် ပစ်ခတ်မှုဖြစ်ပွားပြီး‌နောက် ဧပြီလ ၁ ရက်ကစ၍ ပါဆယ်လက်ခံခြင်းမရှိတော့ဟု နိုင်ငံရေးအကျဉ်းသားများကွန်ရက်က ထုတ်ပြန်ထားသည်။

ယနေ့ ဧပြီလ ၂ ရက်တွင် ဖျာပုံအကျဥ်းထောင်အနီးဝန်းကျင်၌ လုံခြုံရေးတင်းကြပ်ထာပြီး ထောင်အဝင်အထွက် များ တင်းကြပ်စစ်ဆေးနေကာ လက်ရှိအချိန်ထိ အကျဉ်းသားများကို စစ်ဆေးနေဆဲဖြစ်သည်ဟု မြန်မာနိုင်ငံလုံးဆိုင်ရာနိုင်ငံရေးအကျဉ်းသားများ ကူညီစောင့်ရှောက်ရေးကွန်ရက် ဦးဆောင်ကော်မတီဝင် ကိုသိုက်ထွန်းဦး က ဆိုသည်။

၄င်းက “အဲဒီ ၁၇ ဦးအပြင် ထပ်ပြီးခေါ်ထုတ်ခံရတာ ရှိတယ်လို့ သိရတယ်။ လမ်းကြောင်းတွေကိုလည်း အကုန်လုံးကင်းယူထားတယ်။ ထောင်ကိုလည်း လုံခြုံရေးသေချာယူလိုက်တဲ့အတွက် သတင်းတွေအားလုံး ပိတ်ဆို့ခံလိုက်ရတယ်”ဟု ဆိုသည်။

ပြီးခဲ့သည့် ၂၀၂၃ ခုနှစ် ဇန်နဝါရီလ ၅ ရက်နှင့် ၆ရက်တွင်လည်း ပုသိမ်အကျဉ်းထောင်တွင်း၌ နိုင်ငံရေးအကျဉ်းသားများကို ထောင်ဆူသည်ဆိုသောအကြောင်းပြချက်ဖြင့် အကျဥ်းဦးစီးဝန်ထမ်းများနှင့် ရဲများက အကြမ်းဖက်ဖြိုခွင်းခဲ့ပြီးနောက် ဝိုင်းဝန်းရိုက်နှက်သဖြင့် နိုင်ငံရေးအကျဉ်းသား ကိုဝေယံဖြိုး သေဆုံးခဲ့ရသည်။

စစ်တပ်အာဏာသိမ်းသည့် ၂၀၂၁ ခုနှစ် ဖေဖော်ဝါရီ လ ၁ ရက်ကနေ ၂၀၂၄ ခုနှစ် ဧပြီလ ၁ ရက်အထိ မြန်မာနိုင်ငံအတွင်းရှိ အကျဉ်းထောင်များတွင်ထိန်းသိမ်းခံထားရသူ ၂၀,၂၉၆ ဦးရှိသည်ဟု နိုင်ငံရေးအကျဉ်း သားများကူညီစောက်ရှောက်ရေးအသင်း – AAPP က ထုတ်ပြန်ထားသည့်စာရင်းအရသိရသည်။

ဓာတ်ပုံ – PPNM
ပုံစာ – ဖျာပုံအကျဉ်းထောင်။