လေကြောင်းပစ်ခတ်မှုကြောင့် ရေတာရှည်မြို့နယ်က နေအိမ်အချို့ပျက်စီး
*****
သဇင်
မတ် ၂၆၊ ၂၀၂၄။
ပဲခူးတိုင်း၊ ရေတာရှည်မြို့နယ်ရှိ ကျေးရွာအချို့ကို စစ်ကောင်စီတပ်က လေကြောင်းဖြင့်ပစ်ခတ်ခဲ့သည့်အတွက် နေအိမ် ၂ လုံးနှင့် တင်းကုပ် ၁ လုံး မီးလောင်ပျက်စီးခဲ့သည်ဟု သိရသည်။
ယမန်နေ့ မတ်လ ၂၅ ရက်တွင် မနက် ၁၀ နာရီခွဲခန့် မှ နေ့လယ် ၂ နာရီကျော်အထိ ရေတာရှည်မြို့နယ်ရှိ ပိတောက်ကုန်း၊ ရေငန်၊ ရေတာရှည်လေး နှင့် ကျွန်းကုန်း စသည့် ကျေးရွာအစပ်များကို တိုက်ပွဲဖြစ်ပွားခြင်းမရှိဘဲ စစ်ကောင်စီက လေကြောင်းဖြင့်ပစ်ခတ်ခဲ့ခြင်းဖြစ်သည်။
လေကြောင်းတိုက်ခိုက်မှုကြောင့် ရေငန်ရွာနေ ဦးချစ်ပြုံး၏ လယ်တဲအိမ် ၁ လုံး၊ အင်းကြီးပေါက်ရွာက ဦးတုတ်တို ၏ နေအိမ် ၁ လုံးနှင့် အင်းကြီးပေါက်ရွာနေ ဦးကျော်မိုး၏ တင်းကုပ် ၁ လုံးမီးလောင်ပျက်စီးခဲ့ပြီး နွား ၁ ကောင် သေဆုံးခဲ့သည်ဟု ဒေသခံ ၁ ဦးကပြောသည်။
၎င်းက ” Mi-35 ဂျက်ဖိုက်တာ ၃ စီး၊ ဟက်စကီး ၂ စီးနဲ့လာပစ်တာ အင်းကြီးပေါက်ရွာအစွန်ပိုင်းနဲ့ ကျန်တဲ့ရွာတွေရဲ့ ရွာခြေတွေကို ဖိပစ်သွားတာပါ။ အိမ် ၂ လုံး၊ တင်းကုပ် ၁ လုံးမီးလောင်တယ်။လူထိခိုက်မှုတော့ မရှိဘူး”ဟု ဆို သည်။
လေကြောင်းတိုက်ခိုက်ခဲ့သော လေယာဉ်များသည် နေပြည်တော်လေတပ်က ဂျက်ဖိုက်တာ ၃ စီးနှင့် တောင်ငူလေ တပ်က ၂ စီး စုစုပေါင်း ၅ စီးဖြစ်သည်ဟု သိရသည်။
လေကြောင်းတိုက်ခိုက်မှုအပြင် တောင်ငူမြို့သစ်ကနေလည်း ၁၂၀ မမ လက်နက်ကြီးဖြင့် ၄ ကြိမ်ပစ်ခတ်ခဲ့သေး သည်ဟု ဒေသခံများထံက သိရသည်။
လေကြောင်းတိုက်ခံရသည့်ကျေးရွာများတွင် ၎င်းကျေးရွာတာဝန်ရှိသူများနှင့် ကာကွယ်ရေးတပ်ဖွဲ့ဝင်များက ကျေးရွာဒေသခံများအား ဗုံးခိုကျင်းတူးရန် ကြိုတင်သတိပေးမှုများလုပ်ဆောင်ထားသည်ဟု စစ်ရေးနီးစပ်သူ ၁ ဦး က ပြောသည်။
၎င်းက “ဒီမှာက ရွာသားတွေကို ဗုံးခိုကျင်းတွေတူးခိုင်းထားတော့ များသောအားဖြင့် ဗုံးခိုကျင်းမှာရှောင်နေကြ တော့ နည်းနည်းတော့ သက်သာတာပေါ့”ဟု ဆိုသည်။
ရေတာရှည်မြို့နယ်၊ စစ်တောင်းမြစ်အရှေ့ဘက်ကမ်းရှိကျေးရွာများကို တိုက်ပွဲဖြစ်ပွားခြင်းမရှိဘဲ စစ်ကောင်စီတပ် က လက်နက်ကြီးဖြင့်ပစ်ခတ်တိုက်ခိုက်မှုများလည်း ဆက်တိုက်လုပ်ဆောင်နေသည်ဟု သိရှိရသည်။
ပြီးခဲ့သည့် မတ်လ ၁၇ ရက်တွင် ရေတာရှည်မြို့နယ်၊ ခင်တန်းကြီးကျေးရွားအား တိုက်ပွဲဖြစ်ပွားခြင်းမရှိဘဲ လက်နက်ကြီးဖြင့်ပစ်ခတ်မှုကြောင့် ဒေသခံ ၇ ဦး ထိခိုက်ဒဏ်ရာရရှိခဲ့သည်။
ဓာတ်ပုံ – ပေးပို့။
ပုံစာ – ၂၀၂၄ ခုနှစ် မတ်လ ၂၅ ရက် လေကြောင်းပစ်ခတ်မှုကြောင့် အင်းကြီးပေါက်ရွာက မီးလောင်ပျက်စီးခဲ့သည့် နေအိမ်မြင်ကွင်း။
