မြောက်ဦးတွင် လေကြောင်းတိုက်ခိုက်မှုကြောင့် ကလေးငယ် ၄ ဦးအပါအဝင် ပြည်သူ ၅ ဦးသေဆုံး
**********************
ယမင်းဖူးပွင့်အောင်
မတ် ၂၁၊ ၂၀၂၄။
ရခိုင်ပြည်နယ် မြောက်ဦးမြို့နယ်တွင် စစ်ကောင်စီ၏ လေကြောင်းတိုက်ခိုက်မှုကြောင့် ပြည်သူ ၅ ဦးသေဆုံးပြီး ၁၀ဦးခန့်ထိခိုက်ဒဏ်ရာရရှိခဲ့သည်ဟု ဒေသခံများထံက သိရသည်။
မြောက်ဦးမြို့နယ် လေညှင်းတောင်ကျေးရွာကို ယနေ့နံနက် ၉နာရီခန့်တွင် စစ်ကောင်စီက လေကြောင်းတိုက်ခိုက်ခဲ့ပြီး အသက်၂နှစ်၊ ၅နှစ်၊ ၉နှစ်နှင့် ၁၂ နှစ်အရွယ် ကလေးငယ် ၄ဦးအပါအဝင် အသက် ၃၈ နှစ် အရွယ်အမျိူးသမီး ၁ဦးတို့ သေဆုံးခဲ့ရသည်ဟု မြောက်ဦးဒေသခံ ၁ဦးက သံလွင်ခက်ကိုပြောသည်။
၎င်းက ” တိုက်ပွဲ ဖြစ်တာလည်း မရှိဘူး ။ ဒီတိုင်း လာပစ်တာပေါ့။ နံနက်ပိုင်းဆိုတော့ လူတွေက ပုံမှန် သွားလာနေကြတယ်။ ရွာထဲကို ဂျက်လေယာဉ် နဲ့ ၄ ချက်လောက် ဆက်တိုက်ချခဲ့တယ် ”ဟု ဆိုသည်။
ကလေးငယ် ၄ဦးအပါအဝင် ပြည်သူ ၅ဦးသေဆုံးခဲ့သည့်အပြင် ၄ နှစ်အရွယ် ကလေးငယ်တစ်ဦးနှင့် ၁၀ နှစ်အရွယ် ကလေးငယ် ၂ ဦးအပါအဝင် ၁၀ ဦးထိခိုက်ဒဏ်ရာရရှိခဲ့သည်ဟု ဒေသခံများထံက သိရသည်။
လေကြောင်းတိုက်ခိုက်ခံခဲ့ရသည့် လေညှင်းတောင်ကျေးရွာသည် အိမ်ခြေ ၂၀၀ခန့်ရှိသည့် ကျေးရွာဖြစ်ပြီး လေကြောင်းတိုက်ခိုက်မှုကြောင့် အိမ်ခြေအများအပြားထိခိုက်ပျက်စီးခဲ့ရသည်ဟု သိရသည်။
မြောက်ဦးမြို့နယ်တွင် နောက်ဆုံးကျန်ရှိသည့် စစ်ကောင်စီ ခမရ-၃၇၇တပ်ရင်းကို ဖေဖော်ဝါရီ ၆ရက်နေ့တွင်သိမ်းပိုက်နိုင်ခဲ့ပြီးနောက် မြောက်ဦးမြို့နယ် ၁ခုလုံးကို ရက္ခိုင့်တပ်တော်-AA က အပြီးသတ်သိမ်းပိုက်နိုင်ခဲ့ခြင်းဖြစ်သည်။
ပုံစာ – လေကြောင်းတိုက်ခိုက်ခံခဲ့ရသည့် လေညှင်းတောင်ကျေးရွာမြင်ကွင်း။
Photo – DMG
