ခမရ – ၃၅၆ ကို တော်လှန်ရေးတပ်များ အပြီးသတ်သိမ်းပိုက်
**********
**********
နန်းဆုပန်ခန့်
မတ် ၂၀၊ ၂၀၂၄။
ကေအဲန်ယူ-ကရင်အမျိုးသားအစည်းအရုံး တပ်မဟာ ၆ နယ်မြေ၊ ဒူးပလာယာခရိုင်၊ ကော့ကရိတ်မြို့နယ်၊ မြ၀တီမြို့အနီးရှိ သင်္ကန်းညီနောင်အခြေစိုက် ခမရ – ၃၅၆ တပ်ရင်းအား အပြီးသတ်တိုက်ခိုက်သိမ်းပိုက်နိုင်ခဲ့ပြီး လက်နက်ခဲယမ်းအများအပြား သိမ်းပိုက်နိုင်ခဲ့သည်ဟု ကေအဲန်ယူက ယနေ့တွင်ထုတ်ပြန်သည်။
ခမရ – ၃၅၆ တပ်ရင်းအား ကရင်အမျိုးသားလွတ်မြောက် ရေးတပ်မတော် – KNLA နှင့် တော်လှန်ရေးပူးပေါင်းတပ် ဖွဲ့များက ယခု မတ်လ ၁၅ ရက်၊ ညနေ ၃ နာရီခန့်ကစတင် ၍ ၀င်ရောက်တိုက်ခိုက်ခဲ့ရာ ညနေ ၇ နာရီတွင် စခန်းတစ်ခုလုံးအား အပြီးသတ်တိုက်ခိုက်သိမ်းပိုက်နိုင်ခဲ့ခြင်းဖြစ်သည်။
အဆိုပါ စခန်းသိမ်းတိုက်ပွဲတွင် စစ်ကောင်စီဘက်က ၁၁ ဦးသေဆုံးခဲ့ပြီး အများအပြားထိခိုက်ဒဏ်ရာရရှိခဲ့ကာ ထိခိုက်ဒဏ်ရာရရှိမှုစာရင်းများကို စစ်ဆေးအတည်ပြုနေဆဲဖြစ်သည်ဟု KNU ကဆိုသည်။
စခန်းသိမ်းတိုက်ပွဲအတွင်း လက်နက်ကြီးလက်နက်ငယ် ၁၀ လက်၊ ဗုံးသီး နှင့် လက်နက်ကြီးကျည် စုစုပေါင်း ၁၄၉ လုံးအပြင် MA ကျည်ဘောက် ၇ ဘောက် နှင့် MA ကျည် ၁,၂၀၀ တောင့် သိမ်းဆည်းရမိခဲ့သည်ဟု ထုတ်ပြန်ချက်တွင် ဖော်ပြထားသည်။
အဆိုပါ တိုက်ပွဲအတွင်း KNLA – ကရင်အမျိုးသားလွတ် မြောက်ရေးတပ်မတော်နှင့် တော်လှန်ရေးပူးပေါင်းတပ်ဖွဲ့များဘက်က ၅ ဦး ဒဏ်ရာရရှိခဲ့ရပြီး ၁ ဦး ကျဆုံးခဲ့သည်ဟု KNU က ထုတ်ပြန်ထားသည်။
ကေအဲန်ယူ−ကရင်အမျိုးသားအစည်းအရုံး ဒူးပလာယာခရိုင် တပ်မဟာ ၆ အတွင်း စစ်ကောင်စီတပ်စခန်းများအား စခန်းသိမ်းတိုက်ပွဲအဖြစ်သော်လည်းကောင်း၊ မြို့တွင်းတိုက်ပွဲအဖြစ်သော်လည်းကောင်း ဖော်ဆောင်လျှက်ရှိနေပြီး နေ့စဉ်နှင့်အမျှ တိုက်ပွဲများ ပြင်းထန်လျှက်ရှိသည်။
တော်လှန်ရေးပူးပေါင်းတပ်များသိမ်းနိုင်ခဲ့သည့် ခမရ – ၃၅၅ တပ်ရင်းအနီးရှိ တာဝါတိုင်စခန်းကုန်းကိုလည်း တော်လှန်ရေးပူးပေါင်းတပ်က ယနေ့နံနက်တွင် လက်နက်ခဲယမ်းနှင့်အတူ အပြီးတိုင် ထပ်မံသိမ်းပိုက်နိုင်ခဲ့သည်ဟု ကာကွယ်ရေးတပ်ဖွဲ့ဝင်များထံက သိရသည်။
သင်္ကန်းညီနောင်ဒေသအတွင်းရှိ ခမရ – ၃၅၅ တပ်ရင်းအား မတ်လ ၇ ရက် နံနက် ၁၀ နာရီတွင် KNLA ပူးပေါင်းတပ်များက စတင်တိုက်ခိုက်ခဲ့ပြီးနောက် ယခုလက်ရှိအချိန်၌ ခမရ – ၃၅၅၊ ၃၅၆ ၊ တာဝါတိုင်စခန်းကုန်းနှင့် သင်္ကန်းညီနောင်ရဲစခန်းအား သိမ်းပိုက်ထားပြီဖြစ်ပြီး ကျန်ရှိနေသည့်တပ်ရင်းများအား ဆက်လက်ထိုးစစ်ဆင် တိုက်ခိုက်လျက်ရှိသည်။
ပုံစာ – ခမရ ၃၅၆ တပ်ရင်းက သိမ်းဆည်းရမိသော လက်နက်ခဲယမ်းများ။
