ချင်းမိုင်အစည်းအဝေးတက်ရောက်ခဲ့သည့် LDU နှင့် PNLO သည် အဖွဲ့အစည်းကိုကိုယ်စားမပြု
***********************
နန်းဆုပန်ခန့်
မတ် ၂၀၊ ၂၀၂၄။
ထိုင်းနိုင်ငံ၊ ချင်းမိုင်မြို့၌ ကျင်းပခဲ့သော တစ်နိုင်ငံလုံး အပစ်အခတ်ရပ်စဲရေး သဘောတူစာချုပ် NCA လက်မှတ် ရေးထိုးထားသည့် တိုင်းရင်းသားလက်နက်ကိုင် ၇ ဖွဲ့၏ ဆွေးနွေးပွဲအပြီး ဖွဲ့စည်းလိုက်သော 7 Ethnic Armed Organizations Alliance-7 EAO Alliance အဖွဲ့တွင် လားဟူဒီမိုကရက်တစ်အစည်းအရုံး LDU နှင့် ပအိုဝ်းအမျိုးသားလွတ်မြောက်ရေးတပ် PNLO အနေဖြင့် ပါဝင်ခြင်းမရှိဟု သက်ဆိုင်ရာအဖွဲ့အစည်းများက အသီးသီးထုတ်ပြန်ပြောဆိုထားကြသည်။
မတ်လ ၁၇ ရက်နှင့် ၁၈ရက်ဆွေးနွေးပွဲကို တက်ရောက်သောအဖွဲ့အမည်စာရင်း၌ LDU အဖွဲ့အမည်ပါပြီး LDU အနေဖြင့် တက်ရောက်ခြင်းမရှိဟု လားဟူဒီမိုကရက်တစ်အစည်းအရုံး LDU က မတ်လ ၁၉ ရက် ယမန်နေ့တွင် ထုတ်ပြန်သည်။
အဆိုပါဆွေးနွေးပွဲကိုတက်ရောက်ခဲ့သော ကျာဆော်လမွန် သည် ပြီးခဲ့သည့် ၂၀၂၂ ခုနှစ် ဇူလိုင်လ ၈ ရက်တွင် LDU ကော်မတီအဖွဲ့က ၎င်းတာဝန်ယူထားသော လုပ်ငန်းတာဝန်နှင့် ရာထူးများအား ရပ်စဲထားပြီးဖြစ်သည်။
ထို့ကြောင့် ကျာဆော်လမွန်သည် LDU အမည်နာမအားအလွဲသုံးစားပြုပြီး စစ်ကောင်စီနှင့် ပူးပေါင်းကာ NCA-s EAO အစည်းအဝေးသို့တက်ရောက်ခြင်းအပေါ် LDU နှင့်အတူ လားဟူခေါင်းဆောင်များနှင့် လားဟူပြည်သူများက ပြင်းထန်စွာ ရှုတ်ချကန့်ကွက်သည်ဟု ထုတ်ပြန်ချက်တွင် ပါရှိသည်။
ထို့အတူ ဆွေးနွေးပွဲအပြီး NCA လက်မှတ်ထိုးထားသော တိုင်းရင်းသား လက်နက်ကိုင် ၇ ဖွဲ့က မဟာမိတ်စုဖွဲ့မှုပုံစံသစ်အနေဖြင့် 7 EAO Alliance ဖွဲ့စည်းလိုက်ကြောင်း ထုတ်ပြန်ကြေညာခဲ့ပြီး ယင်း ၇ ဖွဲ့ထဲတွင် PNLO အဖွဲ့အမည်လည်း ပါဝင်ခဲ့သည်။
အစည်းအဝေးထုတ်ပြန်ချက်တွင် PNLO အား အဖွဲ့ဝင်ဟုထည့်ထားခြင်းသည် PNLO ၏သဘောထားမပါကြောင်း PNLO ဥက္ကဋ္ဌ ဗိုလ်ချုပ် ခွန်သူရိန် ကပြောသည်။
PNLO သည် လက်ရှိတွင် ရှမ်းပြည်နယ်တောင်ပိုင်း ဆီဆိုင်ဒေသ၌ စစ်ကောင်စီတပ်နှင့် တိုက်ပွဲများဖြစ်ပွားလျက် ရှိသည်။
၂ ရက်တာဆွေးနွေးပွဲသို့ PNLO နာယက ဗိုလ်မှူးကြီး ခွန်ဥက္ကာနှင့် ဗဟိုအလုပ်အမှုဆောင် ၂ ဦး တက်ရောက်ခဲ့ သည်ကိုတွေ့ရပြီး 7 EAO Alliance အတွင်းရေးမှူးအဖွဲ့တွင် အဖွဲ့ဝင်အဖြစ် PNLO က အဖွဲ့ဝင် ၁ ဦး ပါဝင်သည်ဟု ထုတ်ပြန်ထားသည်။
မျက်နှာစုံညီအစည်းအဝေးကချမှတ်ထားသော နိုင်ငံရေးလုပ်ငန်းစဉ်များအား အကောင်အထည်ဖော်နိုင်ရန် အဖွဲ့ ခေါင်းဆောင်အဖြစ် ရှမ်းပြည်ပြန်လည်ထူထောင်ရေးကောင်စီ RCSS/SSA ဥက္ကဋ္ဌ ဗိုလ်ချုပ်ကြီး ယွက်စစ် က တာဝန်ယူပြီး မွန်ပြည်သစ်ပါတီ – MNSP က နိုင်အောင်မင်း က ဒုတိယအဖွဲ့ခေါင်းဆောင်အဖြစ် တာဝန်ယူမည် ဖြစ်သည်။
ယင်းအပြင် အတွင်းရေးမှူးအဖွဲ့တွင် RCSS မှ ဗိုလ်မှူးကြီးစိုင်းငင်း က အထွေထွေအတွင်းရေးမှူး၊ ကရင်အမျိုးသား လွတ်မြောက်ရေးတပ်မတော် – ငြိမ်းချမ်းရေးကောင်စီ – KNU/KNLA – PC မှ ဗိုလ်မှူးကြီး စောကျော်ညွန့် က တွဲဘက် အထွေထွေအတွင်းရေးမှူးအဖြစ်တာဝန်ယူထားပြီး အဖွဲ့ဝင်များအနေဖြင့် MNSP မှ နိုင်အောင်မငေး၊ ဒီမိုကရေစီအကျိုးပြု ကရင်တပ်မတော် – DKBA က ဗိုလ်မှူးချုပ် စောစိန်ဝင်း၊ လားဟူဒီမိုကရက်တစ် အစည်းအရုံး – LDU က ကျာယာကုပ်၊ ရခိုင်ပြည်လွတ်မြောက်ရေးပါတီ ALP မှ ဗိုလ်မှူးကြီး ခိုင်ကျော်လှိုင် နှင့် PNLO မှ အဖွဲ့ဝင် ၁ ဦးတို့ပါဝင်သည်ဟု သိရသည်။
************
Telegram– > https://t.me/newstlk/3877
YouTube – > https://youtu.be/6X9AvN2FnIw?si=BGNM7eyxs7ZtJG7d
Website – > https://thanlwinkhet.net/?p=8510
