ပိတ်မိနေသည့် ဝိုင်းမော်ဒေသခံအဘွားအို ၁ ဦး အောက်ဆီဂျင်ပြတ်၍သေဆုံး
*****************************
နန်းဆုပန်ခန့်
မတ် ၁၃၊ ၂၀၂၄။
ကချင်လွတ်လပ်ရေးတပ်မတော် – KIA နှင့် စစ်ကောင်စီတပ်ကြားဖြစ်ပွားခဲ့သောတိုက်ပွဲများကြောင့် ပိတ်မိနေသည့် ဝိုင်းမော်မြို့က အဘွားအို ၁ဦး အောက်ဆီဂျင်ပြတ်၍ ယမန်နေ့က သေဆုံးခဲ့သည်ဟု ဒေသခံများထံက သိရသည်။
အသက် ၇၀ ကျော်ရှိနေပြီဖြစ်သည့် အဆိုပါအဘွားအို သည် ယမန်နေ့ ညနေ ၆ နာရီအချိန်တွင် အသက်ရှုကြပ်ကာသေဆုံးခဲ့ရခြင်းဖြစ်သည်ဟု ဝိုင်းမော်ဒေသခံအမျိုးသမီး ၁ ဦးက သံလွင်ခက်ကိုပြောသည်။
၎င်းက “ သူနေတဲ့နေရာမှာ အသက်ရှုကြပ်သွားလို့ အဘွား ၁ ယောက် ဆုံးသွားပါတယ် ။ ဆုံးသွားတဲ့အဘွားကိုတော့ ဆုံးတာနဲ့ ရှေ့တန်းက စစ်သားတွေကို ခွင့်တောင်းပြီးတော့ ချက်ချင်း သူ့အိမ်မှာ သွားမြှုပ်ပေးခဲ့ပါတယ်“ ဟု ဆိုသည်။
ယခုမတ်လ ၇ ရက်က ဝိုင်းမော်မြို့အနီး ဖြစ်ပွားခဲ့သော တိုက်ပွဲများကြောင့် အောင်မြေ ၁၊ အောင်မြေ ၂ နှင့် ရွှေညောင်ပင်ကျေးရွာတို့ရှိ ဒေသခံ ၁,၀၀၀ ဝန်းကျင်သည် အောင်မြေ ၂ ကျေးရွာဘုန်းကြီးကျောင်း၌ ယနေ့အချိန်ထိ ပိတ်မိနေခြင်းဖြစ်သည်။
ယမန်နေ့ နံနက်ပိုင်းတွင် ဝိုင်းမော်မြို့မှ KIA တပ်များ ဆုတ်ခွာသွားသော်လည်း ပိတ်မိနေသည့်ဒေသခံများကို စစ်ကောင်စီတပ်များက ပိတ်ဆို့ထားဆဲဖြစ်ကာ ပိတ်မိနေသည့်ဒေသခံများအနေဖြင့် နေရာကျဉ်းခြင်း၊ ရွာပြင်ထွက်ခွင့်မရှိခြင်းများအပြင် စားနပ်ရိက္ခာနှင့် ဆေးဝါးများပြတ်တောက်မှု အခက်အခဲများပါ ကြုံတွေ့နေကြရသည်။
ဒေသခံအမျိုးသမီး ၁ ဦးကတော့ “ အခုက ဖျားတဲ့လူတွေကတော့ အကုန်လုံးလိုလိုဖျားနေကြပြီ။ ဆေးရုံမရှိဘူး။ ဆေးယူဖို့လည်း အပြင်ကိုထွက်ခွင့်မရှိဘူးရှင့်။ အစားအ သောက်တွေကလည်း ရိက္ခာတွေကလည်းပြတ်နေပြီ။ တချို့ကတော့ ဆန်နည်းနည်းပါးပါးရှိတယ်။ ကိုယ့်ဟာနဲ့ကိုယ်ချက်စားနေကြတာပဲရှင့်။ ရေလည်း ဒီမှာက ရေ တွင်း ၁ တွင်းပဲရှိတယ်။ ဒီရေတွင်းကလည်း ခမ်းနေပြီ။ သောက်ရေတွေ ဘာတွေမရှိဘူး” ဟု ဆိုသည်။
မတ်လ ၉ ရက်တွင်လည်း ဒေသခံများပိတ်မိနေသည့်နေရာကို လက်နက်ကြီးကျရောက်ခဲ့သောကြောင့် ၅ ဦးဒဏ်ရာရရှိခဲ့ပြီး ယင်းအနက်က အသက် ၅၀ ကျော် အမျိုးသမီး ၂ ဦးနှင့် အသက် ၈၀ ကျော် အမျိုးသမီး ၁ ဦး သေဆုံးခဲ့သည်ဟု ဒေသခံများထံက သိရသည်။
ယနေ့ မတ်လ ၁၃ ရက်အထိပိတ်မိနေသည့် ဒေသခံများ အား ကယ်ထုတ်နိုင်ရန်အတွက် ဝါရှောင်ဆရာတော်၊ ကချင်နှစ်ခြင်းခရစ်ယာန်အဖွဲ့ချုပ် – KBC ၊ ကချင်ငြိမ်းချမ်းရေးအကျိုးဆောင်အဖွဲ့ – PCG ၊ ရှမ်းလူငယ် ပရဟိတအဖွဲ့များ သွားရောက်ကယ်ထုတ်ရန်ကြိုစားနေဆဲဖြစ်သည်ဟု ဝါရှောင်ဆရာတော်က ၎င်း၏ လူမှုကွန်ရက်စာမျက်နှာတွင် ပြောဆိုထားသည်။
************
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/3732
YouTube – > https://youtu.be/VWUnOqS3CvY?si=v5aJiF7msrZh0BNt
Website – > https://thanlwinkhet.net/?p=8304
