ဖမ်းဆီးခံထားရသည့် ဗန်းမော်စစ်ရှောင်စခန်းက စစ်ရှောင်များ ပြန်မလွတ်သေး

ဖမ်းဆီးခံထားရသည့် ဗန်းမော်စစ်ရှောင်စခန်းက စစ်ရှောင်များ ပြန်မလွတ်သေး
********************

ထွယ်
မတ် ၁၁၊ ၂၀၂၄။

စစ်ကောင်စီတပ်ကဖမ်းဆီးခဲ့သည့် ကချင်ပြည်နယ်၊ ဗန်းမော်မြို့ ရောဘတ်စစ်ရှောင်စခန်းက စစ်ရှောင်ပြည်သူ ၁၆ ဦးသည် ဖမ်းဆီးခံရပြီးနောက် ယနေ့အချိန်ထိ ပြန် လည်လွတ်မြောက်လာခြင်းမရှိသေးဟု ရောဘတ် စစ်ရှောင်ပြည်သူများထံကသိရသည်။

အင်အား ၁၅ ဦးခန့်ရှိ စစ်ကောင်စီလက်အောက်ခံ ရဲတပ်ဖွဲ့ဝင်များနှင့် စစ်သားများသည် မတ်လ ၉ ရက် ည ၁၁ နာရီခန့်တွင် အိမ်စီးကားများဖြင့် ရောဘတ်စစ်ရှောင်စခန်းနှင့် မိဘမဲ့အမျိုးသားဘော်ဒါဆောင်အပါအဝင် အမျိုးသမီး ဘော်ဒါဆောင်များသို့ဝင်ရောက်ပြီး အမျိုးသားများကို ဖမ်းဆီးခေါ်ဆောင်သွားခြင်းဖြစ်သည်ဟု စစ်ရှောင်အမျိုးသမီး ၁ ဦးက ပြောသည်။

၎င်းက “ သူတို့ဘာလို့လာတယ်ဆိုတာမျိုး မပြောဘူး။ သူတို့လာတဲ့အချိန် သေနတ်တွေလည်း မောင်းချိန်ပြတယ်။ ငါတို့က ယောကျ်ားလေးတွေကိုပဲ ကြိုက်တာလို့ ပြောနေကြတာ ကြားတယ်။ အမျိုးသမီးနဲ့ သက်ကြီးပိုင်းကို ပြန်လွတ်ပြီး ယောကျ်ားလေးတွေကို တက်တက်ဆိုပြီး ကားပေါ် ခေါ်တင်သွားတာ” ဟု ပြောသည်။

စစ်ကောင်စီတပ်ဖွဲ့ဝင်များသည် ထိုနေ့ညက အမှုတော်ဆောင်ဆရာ ၁ ပါး အပါအဝင် စစ်ရှောင်ပြည်သူ ၁၇ ဦးကို ဖမ်းဆီးခဲ့ပြီး ယမန်နေ့မွန်းလွှဲ ၂ နာရီခန့်တွင် အမှုတော်ဆောင်ဆရာကို ပြန်လွတ်ပေးခဲ့သည်ဟု စစ်ရှောင်ပြည်သူများထံက သိရသည်။

ဖမ်းဆီးထိန်းသိမ်းခံထားရသည့် စစ်ရှောင်ပြည်သူ ၁၆ ဦးတွင် အသက် ၁၇ နှစ်အရွယ် အမျိုးသား ၂ ဦး ပါဝင်ပြီး ဖမ်းဆီးထားသူများကို ဗန်းမော်မြို့အခြေစိုက် အမြောက် တပ် အမတ – ၃၆၆ ၌ ဖမ်းဆီးထားပြီး ၎င်းတို့ပြန်လည်လွတ်မြောက်ရန် စစ်ရှောင်စခန်းတာဝန်ရှိသူများက ကြိုးပမ်းလျက်ရှိသည်ဟု စစ်ရှောင်ပြည်သူ အမျိုးသမီးက ပြောသည်။

အဆိုပါ ရောဘတ်စစ်ရှောင်စခန်းတွင် နေထိုင်သည့် စစ်ရှောင်ပြည်သူများသည် ကချင်ပြည်နယ်တွင်း ကချင်လွတ်လပ်ရေးတပ်မတော် – KIA နှင့် စစ်ကောင်စီတပ်တို့ တကျော့ပြန်တိုက်ပွဲဖြစ်ပွားခဲ့သည့် ၂၀၁၁ ခုနှစ်တိုက်ပွဲများကြောင့် ထွက်ပြေးတိမ်းရှောင်လာသည့် ဗန်းမော်ခရိုင်အတွင်းက ဒေသခံများဖြစ်သည်။

ကချင်ပြည်နယ်တွင် ယခုနှစ် မတ်လ ၇ ရက်ကစတင်ပြီး ကချင်လွတ်လပ်ရေးတပ်မတော် – KIA နှင့် ပူးပေါင်းတပ်များက ဗန်းမော် – မြစ်ကြီးနားကားလမ်းတလျှောက်ရှိ စစ်ကောင်စီတပ်ဖွဲ့ဝင်များ၏ တပ်စခန်းများကို တိုက်ခိုက်သိမ်းပိုက်လျက်ရှိသည်။

အဆိုပါတိုက်ပွဲများကြောင့် ဗန်းမော်မြို့ရှိ စစ်ကောင်စီတပ်ဖွဲ့ဝင်များသည် မြို့တွင်း၊ မြို့ပြင် စစ်ဆေးရေးတင်းကြပ်နေပြီး မတ်လ ၇ ရက် ညကစတင်ပြီး တက္ကသိုလ်ကျောင်းဝင်းတွင်း တပ်စွဲလျက်ရှိသည်။

ထို့ပြင် ဗန်းမော်မြို့တွင်းနှင့် မြို့ပြင် အနီးတဝိုက်တွင် ညအချိန်အပါအဝင် နေ့အချိန်၌လည်း သေနတ်သံ၊ လက်နက်ကြီးသံများ နေ့စဉ်မကြာခဏ ကြားနေရသည်ဟု ဗန်းမော်ဒေသခံများထံက သိရသည်။