ကာကွယ်ရေးရဲဘော် ၁ ဦး ကျဆုံးသော်လည်း ဆီဆိုင်မြို့ကို တော်လှန်ရေးတပ်ဖွဲ့များဆက်လက်ထိန်းချုပ်ထား

ကာကွယ်ရေးရဲဘော် ၁ ဦး ကျဆုံးသော်လည်း ဆီဆိုင်မြို့ကို တော်လှန်ရေးတပ်ဖွဲ့များဆက်လက်ထိန်းချုပ်ထား

***************

ယမင်းဖူးပွင့်အောင်

ဇန်နဝါရီ ၃၀၊ ၂၀၂၄။

ရှမ်းပြည်နယ်တောင်ပိုင်း ဆီဆိုင်မြို့နယ်တွင်ဖြစ်ပွားခဲ့သည့် စစ်ကောင်စီနှင့် ပအိုဝ်းအမျိုးသားလွတ်မြောက်ရေး တပ်မတော် – PNLA၊ KNDF၊ ပြည်သူ့ကာကွယ်ရေးတပ် – PDF ပူးပေါင်းတပ်ဖွဲ့တို့၏တိုက်ပွဲအတွင်း ပြည်သူ့ကာကွယ်ရေးတပ်ဖွဲ့ဝင်ရဲဘော် ၁ ဦးကျဆုံးခဲ့သည်ဟု သိရသည်။

ဇန်နဝါရီ ၂၃ ရက်ကစတင်၍ ဆီဆိုင်မြို့နယ်တွင် စစ်ကောင်စီတပ်ဖွဲ့အပါအဝင် ပအိုဝ်းပြည်သူ့စစ် – PNA နှင့် PNLA ပူးပေါင်းတပ်ဖွဲ့တို့ကြား ထိတွေ့တိုက်ပွဲများပြင်းထန်နေခြင်း ဖြစ်သည်။

ပအိုဝ်းဒေသတည်ငြိမ်အေးချမ်းရေးအတွက် ပအိုဝ်းစော်ဘွား ခွန်ကြည် နောက် ဆုံးအုပ်ချုပ်ခဲ့သည့် ဆီဆိုင်မြို့ကို ပအိုဝ်းအမျိုးသားလွတ်မြောက်ရေးတပ်မ တော် – PNLA က နယ်မြေတည်ငြိမ်ရေးအတွက် ဝင်ရောက်ထိန်းချုပ်လိုက်ပြီး ပအိုဝ်းအမျိုးသားအလံတော် စတင်လွှင့်ထူနိုင်ခဲ့သည်ဟု PNLA က ဇန်နဝါရီ ၂၈ ရက်တွင် တရားဝင် သတင်းထုတ်ပြန်ထားသည်။

ယမန်နေ့တွင် စစ်ကောင်စီတပ်ဖွဲ့ဝင်အင်အား ၅၀ ဝန်းကျင်ဖြင့် ဆီဆိုင်မြို့ကို လာရောက်ထိုးစစ်ဆင်တိုက်ခိုက်ခဲ့ရာ ကာကွယ်ရေးတပ်ဖွဲ့ဝင်များက စစ်ကောင်စီတပ်ဖွဲ့ဝင်များကို တိုက်ထုတ်နိုင်ခဲ့သော်လည်း NUG အမှတ်၂ စစ်ဒေသ၊ တပ်ရင်း ၁၁၀၁ က တပ်ဖွဲ့ဝင် ပါကျဲ သေဆုံးခဲ့သည်ဟု ကာကွယ်ရေးတပ်ဖွဲ့ဝင် ၁ ဦးကပြောသည်။

“စစ်ကောင်စီက ဆီဆိုင်ကို မနေ့ကတက်လာတာ။ မနေ့ညနေကပဲ ပြန်မောင်းထုတ်လိုက်ပြီ။ ကျွန်တော်တို့ဘက် ၁ ယောက်ကျတယ်။ မနေ့ကပဲကျသွားတာ ပါကျဲ က” ဟုဆိုသည်။

ဆီဆိုင်မြို့ကို စစ်ကောင်စီက ပြန်လည်သိမ်းပိုက်ထားနိုင်ပြီဟု ဖော်ပြရေးသားနေကြသော်လည်း ဆီဆိုင်မြို့ကို တော်လှန်ရေးတပ်ဖွဲ့ဝင်များက ထိန်းချုပ်ထားဆဲဖြစ်သည်ဟု ကာကွယ်ရေးတပ်ဖွဲ့ဝင် ၁ ဦးက ယနေ့မွန်းလွဲပိုင်း ၃ နာရီအချိန်တွင်အတည်ပြုပြောဆိုသည်။

“သတင်းဌာနတချို့တွေမှာ ကျွန်တော်တို့ဆုတ်သွားပြီလို့ ရေးနေကြတာတွေရှိတယ်။ ကျွန်တော်တို့ပြန်မဆုတ်သေးဘူး။ ဆီဆိုင်မြို့ထဲမှာပဲ ရှိနေသေးတယ်။ စစ်တပ်က ဟောင်ဝှစ်ဇာနဲ့ပစ်တယ်။ အတွဲလိုက်လည်း ပစ်တယ်။ Suicide Drone တွေနဲ့ပစ်နေတယ်။ ကျွန်တော်တို့ ပြန်ဆုတ်တယ်ဆိုတာမဟုတ်ဘူး” ဟုပြောသည်။

ယမန်နေ့တိုက်ပွဲတွင်ကျဆုံးသွားခဲ့သည့် ရဲဘော် ပါကျဲ ၏ ရုပ်အလောင်းအား နောက်တန်းစခန်းသို့ပြန်သယ်သွားခဲ့ပြီဟုလည်း ၎င်းကပြောသည်။

ရှမ်း / တောင် ဆီဆိုင်မြို့တွင်ဖြစ်ပွားနေသည့်တိုက်ပွဲများကြောင့် တော်လှန်ရေးတပ်ဖွဲ့ဝင်များကို တန်ပြန်တိုက်ခိုက်ရန် စစ်ကောင်စီကာကွယ်ရေးပစ္စည်းစက်ရုံ – ကပစ ထုတ်လက်နက်များကို စစ်ကောင်စီလက်အောက်ခံပြည်သူ့ စစ်အဖွဲ့ PNA အား စစ်ကောင်စီက ဖြည့်တင်းပေးထားသည်ဟု သိရသည်။

ဓာတ်ပုံ – PNLA , Aung Khant’s Facebook

*****************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – > https://t.me/newstlk/3195

YouTube – > https://youtu.be/cZ9bsHWX2EU

Website – > https://thanlwinkhet.net/?p=7399