ကလေး ၅ ဦးမိခင် PDF တပ်သားအား KIA က တပ်ကြပ်ကြီးရာထူးတိုးမြှင့်ပေး
****************
သံလွင်ခက်
ဇန်နဝါရီ ၂၃၊ ၂၀၂၄။
ကချင်ပြည်နယ်၊ ဖားကန့်မြို့နယ်၊ ဝှေခါကျေးရွာရှိ စစ်ကောင်စီတပ်စခန်းသိမ်းတိုက်ပွဲ၌ ရွပ်ရွပ်ချွံချွံပါဝင်ခဲ့သည့် PDF အမျိုးသမီးတပ်သား မစု အား ကချင်လွတ်မြောက်ရေးတပ်မတော် – KIA က တပ်ကြပ်ကြီးရာထူး တိုးမြှင့်ခန့် အပ်ခဲ့သည်။
ကချင်အမည် ဂျန်မော်ခေါန်ရှောင် ဟုခေါ်သည့် မစုသည် KIA လက်အောက်ခံ KPDF တပ်ဖွဲ့ဝင် ၁ ဦးဖြစ်ပြီး ၎င်းအား တပ်ကြပ်ကြီးရာထူးတိုးမြှင့်ခန့်အပ်ခဲ့သည်ကို ယမန်နေ့တွင် KIA ၏ သတင်းပြန်ကြားရေးဌာနတစ်ခုဖြစ် သည့် The Kachin Net က ကချင်ဘာသာဖြင့် ဖော်ပြခဲ့သည်။
အဆိုပါ ဆုချီးမြှင့်ပွဲ၌ ကချင်လွတ်မြောက်ရေးတပ် KIA ၏ တပ်မဟာ အမှတ် (၉)ကနေ မစုကို တပ်ကြပ်ကြီး ရာထူးခန့်အပ်ခဲ့ပြီး ဥရုခရိုင်အုပ်ချုပ်ရေးကော်မတီကလည်း ရွှေဆွဲကြိုး၊ ငွေသားနှင့်အခြားပစ္စည်းများ ချီးမြှင့်ခဲ့သည် ဟု သိရသည်။
စစ်ကောင်စီတပ်က အာဏာမသိမ်းမီကာလများတွင် PDF အမျိုးသမီးရဲမေ မစု သည် နေအိမ်၌အဝတ်အထည်ချုပ် လုပ်ငန်းလုပ်ကိုင်ပြီး သား၊ သမီး ၅ ယောက်ကို ကျွေးမွေးစောင့်ရှောင်နေသည့် မိခင် ၁ ဦးဖြစ်သည်ဟု သိရသည်။
အာဏာသိမ်းကာလမှာတော့ PDF တပ်ဖွဲ့ဝင်ဖြစ်လာသည့် မစု သည် ဖားကန့်မြို့နယ်၊ ဝှေခါကျေးရွာတိုက်ပွဲ တွင် ရဲရဲရင့်ရင့် ပါဝင်တိုက်ခိုက်ခဲ့သည်။
ဝှေခါရှိ စစ်ကောင်စီတပ်စခန်းများကို KIA နှင့် PDF ပူးပေါင်းတပ်များက ဇန်နဝါရီလပထမအပတ်ကတည်းက ထိုးစစ်ဆင်တိုက်ခိုက်နေခဲ့ပြီး ဇန်နဝါရီ ၂၀ ရက်တွင် စစ်ကောင်စီ၏ ခြေလျင်တပ်ရင်း၊ ခလရ – ၄၂ ဗျူဟာ စခန်း ကုန်းတစ်ခုလုံးကို တိုက်ခိုက်သိမ်းပိုက်နိုင်ခဲ့သည်။
ဓာတ်ပုံ- The Kachin Net
*****************
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/3116
YouTube – > https://youtu.be/cZ9bsHWX2EU
Website – > https://thanlwinkhet.net/?p=5746&mibextid=xfxF2i
