NUG PDF များ ပိုမိုအားကောင်းဖို့ ညီနောင်၃ ဖွဲ့ကူညီပံ့ပိုးမည်
*************************
ယမင်းဖူးပွင့်အောင်
ဇန်နဝါရီ ၁၉ ၊ ၂၀၂၄ ။
လက်ရှိစစ်ဆင်ရေးအတွင်း စစ်လက်နက်ပစ္စည်းအမြောက်အများ သိမ်းဆည်းရရှိထားသည့် ညီနောင် ၃ ဖွဲ့အနေ ဖြင့် NUG လက်အောက်ရှိ PDF များ ပိုမိုအားကောင်းလာရန် ကူညီပံ့ပိုးနိုင်မည့်နည်းလမ်းများကို စဥ်းစားထား သည်ဟု တအာင်းအမျိုးသားလွတ်မြောက်ရေးတပ်မတော် – PSLF/TNLA ဒုဥက္ကဋ္ဌ ဗိုလ်ချုပ် တားဂျုတ်ဂျား က ပြောသည်။
မြန်မာပြည်သူများလိုလားနေသည့် စစ်အာဏာရှင်စနစ် အပြီးသတ်ချုပ်ငြိမ်းသွားရန် ရှမ်းမြောက်စစ်ဆင်ရေး တစ်ခုတည်းကို အားကိုးနေ၍မရဘဲ NUG လက်အောက်ရှိ PDF များလည်း အားကောင်းရန်လိုအပ်သောကြောင့် ဘက်ပေါင်းစုံက ဝိုင်းဝန်းပံ့ပိုးပေးရန် ဗိုလ်ချုပ် တားဂျုတ်ဂျား က မေတ္တာရပ်ခံသည် ။
” အထူးသဖြင့် NUG လက်အောက် PDF တွေအားကောင်းဖို့လိုတယ် ။ အားကောင်းဖို့လည်း ကျွန်တော်တို့ဘက်မှာ တတ်နိုင်သမျှ ကူညီပံ့ပိုးတယ်။ အရင်ကလည်း ကူညီပံ့ပိုးတယ် ။ အခုလက်ရှိလည်း ဘယ်လိုနည်း လမ်းကြောင်းနဲ့ ကူမလဲဆိုတာကိုလည်း ကျွန်တော်တို့ဘက်မှာ စဥ်းစားထားတယ်။ အဲတော့ ဗမာပြည် ပြည်သူလူထုအနေနဲ့ PDF တွေ ဒီထက် ဒီထက်အားကောင်းအောင် ဝိုင်းဝန်းပံ့ပိုးပေးဖို့ တောင်းဆိုလိုပါတယ် ။ မေတ္တာရပ်ခံတယ် “ဟု ၎င်းက ပြောသည်။
ပြီးခဲ့သည့် အောက်တိုဘာ ၂၇ ရက်၌စတင်ခဲ့သည့် “၁၀၂၇ စစ်ဆင်ရေး” သည် ၂ လကျော် ၃ လနီးပါးကာလ အတွင်း စစ်ကောင်စီ၏ စခန်းပေါင်း ၅၀၀ ကျော်နှင့် ရှမ်းမြောက်ရှိ မြို့ ၁၇ မြို့ ကို ညီနောင်မဟာမိတ် ၃ ဖွဲ့က သိမ်းပိုက်ထားနိုင်ခဲ့သည်။
လက်ရှိတွင် စစ်ကောင်စီ၏ အရှေ့မြောက်တိုင်းစစ်ဌာနချုပ်ရှိရာ လားရှိုးမြို့အပါအဝင် ရှမ်းမြောက်ရှိ မြို့အချို့ကို ဆက်လက်ထိုးစစ်ဆင်သိမ်းပိုက်ရန် ကျန်ရှိနေသော်လည်း တရုတ်နိုင်ငံ၏ ကြားဝင်စေ့စပ်ညှိနှိုင်းပေးမှုဖြင့် ရှမ်း မြောက်၌ ဇန်နဝါရီ ၁၂ ရက်ကစ၍ ယာယီအပစ်ရပ်စဲထားခဲ့သည်။
” ဗမာပြည်တစ်ခုလုံး ကျွန်တော်တို့ ၁၀၂၇ စစ်ဆင်ရေး ပေါ်မှာ အများကြီး အားကိုးအားထားပြီးတော့ တအားကြီး ထောက်ခံတယ်။ ဒါကိုလည်း ကျွန်တော်တို့ အများကြီးကျေးဇူးတင်တယ် ။ ဆက်ပြီးတော့ ဒီတော်လှန်ရေးတွေ လျော့မသွားအောင် ကျွန်တော်တို့ဘက်မှာလည်း စဥ်းစားတာရှိပါတယ် ” ဟု ဗိုလ်ချုပ်တားဂျုတ်ကျားက ပြောသည်။
ယာယီအပစ်ရပ်ထားသည့်ကာလအတွင်း စစ်ဆင်ရေးအရှိန် အနည်းငယ်ရပ်တန့်သွားသည်ဟု ထင်ရသော်လည်း မပြောင်းလဲသောကိန်းသေအလျင်နှုန်းဖြင့် မိမိတို့၏ “၁၀၂၇ စစ်ဆင်ရေး” ကြီးသည်လည်း ဆက်လက်ရွေ့လျား လျက်ရှိနေပြီး မြန်မာပြည်သူလူထုတစ်ရပ်လုံးလိုလားသော ဘုံရည်မှန်းချက်များအတွက် ပုံမှန်အလုပ်လုပ်လျက်ရှိ သည် ဟု ညီနောင်မဟာမိတ် ၃ ဖွဲ့က ယမန်နေ့၌ သတင်းထုတ်ပြန်သည်။
ရှမ်းမြောက်ပိုင်း၌ပေါ်ပေါက်လာသည့် စစ်ဆင်ရေးများကြောင့် ကရင်နီပြည်နယ်အတွင်းရှိ စစ်ရေးအရှိန်များကို ယခင်ကထက်ပိုမို လုပ်ဆောင်နိုင်ခဲ့သည်ဟု ကရင်နီတပ်တော် KA စစ်ရေးချုပ် ဗိုလ်မှူးကြီး ဘုန်းနိုင် က ပြော သည်။
ထို့ကြောင့် လွိုင်ကော်မြို့အပါအဝင် ကရင်နီပြည်ရှိ မြို့သိမ်းတိုက်ပွဲများကို ပြီးခဲ့သည့် နိုဝင်ဘာလ ၁၁ ရက်ကစ၍ “၁၁.၁၁ စစ်ဆင်ရေး” အဖြစ် ကရင်နီပူးပေါင်းတပ်များက ဆင်နွှဲလျက်ရှိနေသည်။
ကရင်နီစစ်ဆင်ရေး၊ ညီနောင်မဟာ ၃ ဖွဲ့စစ်ဆင်ရေးများနှင့်အတူ NUG PDF များ စုစုစည်းစည်းဖြင့် နိုင်ငံအနှံ့စစ် ဆင်ရေးများ ယခုထက်ပိုမိုကျယ်ပြန့်အားကောင်းလာလျှင် ပြည်သူအားလုံး လိုလားနေသည့်ရည်မှန်းချက်များ အမြန်ဆုံးဖြစ်လာမည်ဟု လက်ရှိစစ်ဆင်ရေးများဆင်နွှဲနေသည့် တိုင်းရင်းသားခေါင်းဆောင်တချို့က မှတ်ချက်ပြုသည်။
” တစ်နိုင်ငံလုံး ညီညီညွတ်ညွတ်နဲ့ စစ်ဆင်ရေးတွေလုပ်လာနိုင်ရင် ကျွန်တော်တို့ရဲ့ရည်မှန်းချက်က ပိုပြီးတော့ အောင်မြင်ဖို့ မြန်ဆန်မယ်ပေါ့နော် “ဟု ဗိုလ်မှူးကြီး ဘုန်းနိုင် က ပြောသည်။
ရှမ်းမြောက်၌ပေါ်ပေါက်လာသည့် စစ်ဆင်ရေးနှင့်အတူ NUG လက်အောက်ခံ PDF တပ်ရင်းများအနေဖြင့် မြို့ သိမ်းနှင့် စခန်းသိမ်းတိုက်ပွဲတချို့ဖော်ဆောင်ထားနိုင်သော်လည်း လက်ရှိအခြေအနေထက် စစ်ဆင်အရှိန်ပိုမိုမြင့် တင်နိုင်ရန် လက်နက်၊ ခဲယမ်းလိုအပ်ချက်စိန်ခေါ်မှု နှင့် အခက်အခဲများရှိနေသည်ဟု ပြည်သူ့ကာကွယ်ရေးတပ် PDF များထံကသိရသည်။
