လွတ်လပ်ရေးနေ့တွင် ကညွတ်ကွင်းမြို့ရှိ ကာကင်းစခန်း ၈ ခု ချေမှုန်းခံရ
***************************
သံလွင်ခက်
ဇန်နဝါရီ ၄၊ ၂၀၂၄။
ပဲခူးတိုင်း၊ ဖြူးမြို့နယ်၊ ရန်ကုန်-မန္တလေးလမ်းဟောင်း၊ ကညွတ်ကွင်းမြို့အနီးရှိ စစ်ကောင်စီတပ်အတွက် ရိက္ခာသယ်ယူပို့ဆောင်ရေးတွင်အရေးကြီးသည့် တံတားတစ်ခုအပါအဝင် ကာကင်းစခန်း ၈ ခုကို ချေမှုန်းခဲ့သည်ဟု ကရင်အမျိုးသားအစည်းအရုံး KNU က ယနေ့တွင် ထုတ်ပြန်သည်။
ကညွတ်ကွင်းမြို့အနီး တောင်ဂုန်းတဲရွာအနီးရှိ စစ်ကောင်စီတပ်၏ ကာကင်းစခန်း ၈ ခု ဖြစ်သည့်
(၁) သံလမ်းတံတားကင်း
(၂) စာသင်ကျောင်းကင်း
(၃) ဘုန်းကြီးကျောင်းကင်း
(၄)နတ်စင်ကင်း
(၅)အုတ်ဖိုကင်း
(၆)လင်းယောခင်ရွာကင်း
(၇)အောင်မင်္ဂလာဘုန်းကြီးကျောင်းကင်း
(၈)ကညွတ်ကွင်းနှင့်တောကျွဲအင်းကြားရှိ တံတားကင်းစခန်းနှင့် တံတားတို့ တိုက်ခိုက်ခံခဲ့ရခြင်း ဖြစ်သည်။
ကရင်အမျိုးသားလွတ်မြောက်ရေးတပ်မတော် (K.N.L.A) နှင့် ကာကွယ်ရေးပူးပေါင်းတပ်များက ယနေ့ ဇန်နဝါရီ ၄ ရက် လွတ်လပ်ရေးနေ့ နံနက် ၄ နာရီခွဲမှ ၅ နာရီခွဲအထိ ၁ နာရီအချိန်အတွင်း အဆိုပါနေရာများကို ချေမှုန်းနိုင်ခဲ့ခြင်းဖြစ်သည်ဟု ထုတ်ပြန်ချက်တွင် ဖော်ပြထားသည်။
ထိုသို့ တိုက်ခိုက်ချေမှုန်းရှင်းလင်းစဉ်အတွင်း လက်နက်ခဲယမ်းများလည်း သိမ်းဆည်းရမိခဲ့ပြီး စစ်ကောင်စီတပ် ၏ ထိခိုက်သေဆုံးမှုစာရင်းများကိုမူ စစ်ဆေးအတည်ပြုနေဆဲ ဖြစ်သည်ဟု KNU က ဖော်ပြထားသည်။
အဆိုပါတိုက်ပွဲများတွင် ကင်းစခန်းများရှိ စစ်ကောင်စီတပ်သားအများအပြားထွက်ပြေးခဲ့ပြီ တပ်သား ၂၀ ဦးခန့် သေဆုံးခဲ့သည်ဟု ဖြစ်စဉ်အတွင်းပါဝင်ခဲ့သည့် တော်ဝင်ဒေါင်းစစ်ကြောင်းက ထုတ်ပြန်ထားသည်။
တိုက်ပွဲအတွင်း စစ်ကောင်စီတပ်ဘက်က သေဆုံးမှုများအပြင် ထိခိုက်ဒဏ်ရာရရှိမှုအခြေအနေများနှင့်ပတ်သက်၍ သံလွင်ခက်သတင်းဌာနအနေဖြင့်သီးခြားအတည်ပြုနိုင်ခြင်းမရှိသေးပေ။
တိုက်ပွဲဖြစ်ပွားခဲ့ချိန်တွင် ရန်ကုန် – မန္တလေးကားလမ်း
ဟောင်းဖြစ်သည့် ကညွတ်ကွင်းနှင့် တောကျွဲအင်းကြား ကွင်းချောင်းတံတားကိုဖြတ်ထားသည့် ကညွတ်ကွင်းမြို့အဝင်ရှိ သံတံတားကျိုးကျခဲ့သည့်အတွက် ယာဉ်လမ်း ကြောင်းပိတ်ဆို့မှုများ ယာယီဖြစ်ပေါ်ခဲ့ကြောင်း ယာဉ်
မောင်းများထံက သိရသည်။
လက်ရှိတွင် ရန်ကုန် – မန္တလေးလမ်းဟောင်းပေါ် သွားလာနေသည့်ကားများကို အမြန်လမ်းကတဆင့် ဖြတ်သန်းသွားလာခွင့်ပြုထားသည် ယာဉ်မောင်း ၁ ဦးက သံလွင်ခက်သတင်းဌာနကိုပြောသည်။
၎င်းက ” တိုက်ပွဲဖြစ်ဖြစ်ခြင်းမှာတော့ ခနပိတ်သွားတယ်။ အခုတော့ သွားလို့ရပါပြီ။ ကညွတ်ကွင်းအဝင်က တံတားကျိုးသွားတော့ ရန်ကုန်ဘက်ကလာတဲ့ ကားတွေဆို တောကျွဲအင်းနဲ့ ကညွတ်ကွင်းကြားမှာရှိတဲ့ သရက်စိန်လမ်းကနေ အမြန်လမ်းကိုတက်ပြီး သွားခိုင်းတယ်။ မန္တလေးဘက်ကလာတဲ့ ကားတွေဆို အုတ်တွင်းကနေ အမြန်လမ်းကို တက်ပြီးသွားခိုင်းတယ် ” ဟုဆိုသည်။
ပြီးခဲ့သည့် နှစ် ဧပြီလ ၄ ရက်ကနေ ၁၇ ရက်အထိ ကညွတ်ကွင်းမြိုအနီး ရန်ကုန်-မန္တလေးအမြန်လမ်း၊ ရန်ကုန် – မန္တလေးလမ်းဟောင်းနှင့် ကညွတ်ကွင်းတံတားဝန်း ကျင်နေရာများတွင် စစ်ကောင်စီတပ်နှင့် ကာကွယ်ရေးပူးပေါင်းတပ်များကြား တိုက်ပွဲ ၄ ကြိမ်ဖြစ်ပွားခဲ့ပြီး စစ်ကောင်စီတပ်သား ၁၂ ဦးသေဆုံးခဲ့ကာ ၆ ဦးထက်မနည်းဒဏ်ရာရရှိခဲ့သည်ဟု Bago Region PDF က ထုတ်ပြန်ခဲ့သည်။
ပုံစာ ၁ – တော်ဝင်ဒေါင်းစစ်ကြောင်းမှ တပ်ဖွဲ့ဝင်များ။
ပုံစာ ၂ ၊ ၃ – ကျိုးကျခဲ့ပြီးနောက် မြင်တွေ့ရသည့် ကညွတ်ကွင်းသံတံတား။
