အိန္ဒိယနယ်စပ်ပလက်၀ရှိ တပ်စခန်းကုန်း ၂ ခုအား AA ထပ်မံသိမ်းပိုက်
********************
မိခိုင်
ဒီဇင်ဘာ ၃၀၊ ၂၀၂၃။
ရခိုင်ပြည်နယ်တွင် တကျော့ပြန်စစ်ဆင်ရေးစတင်သည့်နေ့ကစ၍ ရခိုင် နှင့် ပလက်ဝဒေသရှိ စစ်ကောင်စီတပ်စခန်းများအား ရက္ခိုင့်တပ်တော် – AA က သိမ်းပိုက်လျက်ရှိနေပြီး ယမန်နေ့ ဒီဇင်ဘာလ ၂၉ ရက်တွင်လည်း ပလက်၀ရှိ တပ်စခန်း ၂ ခုအား ထပ်မံသိမ်းပိုက်လိုက်ကြောင်း AA က ထုတ်ပြန်သည်။
” ဒီဇင်ဘာလ ၂၇ ရက်၊ နံနက် ၆ နာရီ ၁၀ မိနစ်အချိန်တွင် ပလက်ဝမြို့၊ ခဝဲဗျူဟာကုန်းအားလည်းကောင်း၊ ဒီဇင် ဘာလ ၂၈ ရက်၊ နံနက် ၉ နာရီ ၂၀ မိနစ်အချိန်တွင် အိန္ဒိယ-မြန်မာနယ်စပ်၊ ပလက်ဝဒေသအတွင်းရှိ ရန်သူ့ခြေကုပ်စစ်စခန်းတစ်ခုဖြစ်သော ပွိုင့် ၃၇၇ စစ်ဆင်ရေး အခြေကုပ်စခန်းကုန်းအားလည်းကောင်း ရက္ခိုင့်တပ်တော်က အပြီးသတ်သိမ်းပိုက် ရယူထားနိုင်ခဲ့သည်” ဟုဆိုသည်။
ပစ်မှတ်ထားသော စစ်ဆင်ရေးပစ်မှတ်များကို တစ်ခုပြီးတစ်ခု ထိုးစစ်ဆင်တိုက်ခိုက်၍ အပြီးသတ်သိမ်းပိုက်ရယူထားပြီးဖြစ်ကြောင်းလည်း ထုတ်ပြန်ချက်တွင် ဖော်ပြထားသည်။
“တချို့ပစ်မှတ်များမှာ တဝက်တပျက်နှင့် အနည်းငယ်သာကျန်ရှိတော့၍ အပြီးသတ်သိမ်းပိုက်ရယူနိုင်ရေးအတွက် ဆက်လက်ကြိုးစားလျက်ရှိသည်” ဟုလည်းထုတ်ပြန်ချက်အရ သိရသည်။
” ရက္ခိုင့်တပ်တော်အနေဖြင့် ၂၀၂၃ ခုနှစ်၊ ဒီဇင်ဘာလ (၂၆၊ ၂၇၊ ၂၈) ရက်များတွင်လည်း သတ်မှတ်ထားသော စစ်ဆင်ရေးပစ်မှတ်များထဲကတချို့ကို အပြီးသတ်သိမ်းပိုက်ရယူနိုင်ခဲ့သည်။ နောက်ထပ်ကျန်ရှိနေသေးသည့် စစ် ဆင်ရေးပစ်မှတ်များကိုလည်း ဆက်လက်တိုက်ခိုက် သိမ်းပိုက်ရယူရန်အတွက် ကြိုးပမ်းဆောင်ရွက်သွားမည်ဖြစ် သည်” ဟုဆိုထားပြီး ဒီဇင်ဘာလ ၂၆ ရက်၊ ည ၉ နာရီဝန်းကျင်တွင်လည်း မြောက်ဦးမြို့၊ ခရိုင်ရဲစခန်းအား သိမ်းပိုက်ခဲ့ကြောင်း ဖော်ပြထားသည်။
AA အနေဖြင့် သိမ်းပိုက်ရရှိထားသော ရန်သူ့စခန်းကုန်းများက ရန်သူ့အလောင်းအမြောက်အမြား၊ လက်နက် ခဲ ယမ်းများ၊ စစ်အသုံးအဆောင်ပစ္စည်းအမြောက် အမြားကို သိမ်းဆည်းရမိခဲ့သည်။ ပုပ်ပွပြီး အနံ့အသက်မကောင်းစွာဖြင့် နေရာအနှံ့ ပြန့်ကြဲသေဆုံးနေသော ရန်သူ့အလောင်းများစွာတို့အား ကောင်းစွာမြေမြှုပ်သင်္ဂြိုဟ်ထားပြီးဖြစ်သလို လက်နက်ချအညံ့မခံဘဲ ထွက်ပြေးလွတ်မြောက်နေသော ရန်သူများအား လိုက်လံချေမှုန်းလျက်ရှိသည်ဟု ထုတ်ပြန်ချက်က ဖော်ပြသည်။
” လက်နက်ချအညံ့ခံသောသူတိုင်း အသက်ချမ်းသာရာရမည်ဖြစ်ပြီး မိသားစု၊ ဆွေမျိုးများနှင့် တွေ့ဆုံခွင့်ရရန် အာမခံချက်ပေးကြောင်း ဤသတင်းထုတ်ပြန်ချက်နှင့်အတူ အာမခံကြောင်း ထပ်လောင်းအသိပေးအပ်ပါသည်” ဟု ထုတ်ပြန်ချက်အရသိရသည်။
ရှမ်းပြည်နယ်မြောက်ပိုင်းတွင် အောက်တိုဘာလ ၂၇ ရက်၌ ၁၀၂၇ စစ်ဆင်ရေးစတင်ခဲ့သာ်လည်း စစ်ဆင်ရေး စတင်ပြီး ၂ ပတ်ကျော်အကြာ ၂၀၂၃ ခုနှစ်၊ နိုဝင်ဘာလ ၁၃ ရက်တွင်မှ ရက္ခိုင့်တပ်တော်၏ စစ်ရေးလိုအပ်ချက်အရ ရခိုင်နှင့် ပလက်ဝဒေသစစ်မျက်နှာများအပြင် AA လှုပ်ရှားရာနယ်မြေများ၌ “စစ်ဆင်ရေး”ကို စတင်နိုင်ခဲ့သည်။ စစ်ဆင်ရေးစတင်သည့်နေ့ကစ၍ ယနေ့အထိ တစ်ရက်မပျက် စစ်ဆင်ရေးဆက်တိုက်ဆင်နွှဲနိုင်ခဲ့သည်။
ရက္ခိုင့်တပ်တော်သည် ညီနောင်မဟာမိတ်များဖြစ်ကြသော ကိုးကန့်၊ တအာင်းစသည့် လက်နက်ကိုင်အဖွဲ့အစည်းများနှင့် ၁၀၂၇ စစ်ဆင်ရေးကို ရှမ်းပြည်မြောက်ပိုင်းတွင် အတူတကွဆင်နွှဲနေသကဲ့သို့ ရခိုင်၊ ပလက်ဝဒေသ နှင့် အခြားသောဒေသများ၌လည်း AA တစ်ဖွဲ့တည်းက ဆင်နွှဲလျက်ရှိကြောင်း ထုတ်ပြန်ချက်တွင် ဖော်ပြထားပါသည်။
ဓာတ်ပုံ – AA Desk Info
