စစ်ကောင်စီ၏ရမ်းကားပစ်ခတ်မှုကြောင့် မြောက်ဦးရှေးဟောင်းယဥ်ကျေးမှုပြတိုက်ရှိ ကျောက်စာများပျက်စီး
*****************************
မိခိုင်
ဒီဇင်ဘာ ၂၅ ၊ ၂၀၂၃။
ရခိုင်ပြည်နယ်၊ မြောက်ဦးမြို့တွင် စစ်ကောင်စီကပစ်ခတ်လိုက်သည့်လက်နက်ကြီးကျည်များ ရှေးဟောင်းယဥ်ကျေးမှုပြတိုက်သို့ကျ၍ ကျောက်စာများပျက်စီးသွားကြောင်း သိရသည်။
ယမန်နေ့ ဒီဇင်ဘာလ ၂၄ ရက်တွင် စစ်ကောင်စီတပ်နှင့် ရက္ခိုင့်တပ်တော် – AA တို့ ထိတွေ့တိုက်ပွဲဖြစ်ပွားပြီးနောက် စစ်ကောင်စီတပ်များက လက်နက်ကြီးများဖြင့် မြို့ပေါ် ရပ်ကွက်များသို့ ပစ်ခတ်နေခြင်းဖြစ်ကြောင်း ဒေသခံ ၁ ဦးက ပြောသည်။
“မနေ့ကတည်းက ရမ်းပစ်တာလေ။ မနက် ၃ နာရီလောက်မှာ လက်နက်ကြီးက မြို့ထဲကို တမင်ရည်ရွယ်ပြီးပစ်တယ်။ နန်းရာကုန်းဘက်ကို ကျသွားတယ်လို့ သိရတယ်။ လက်နက်ကြီးကျပြီးမှ ပျက်စီးသွားတာပေါ့။ ကျောက်စာနဲ့ အဆောက် အအုံတွေ ပျက်စီးသွားတယ်လို့ သိရတယ်” ဟု ၎င်းကပြောပြီး မြောက်ဦးတွင် လက်ရှိအချိန်ထိ လက်နက်ကြီးများဖြင့်ပစ်ခတ်လျက်ရှိကြောင်း ဆက်ပြောသည်။
ထို့ပြင် အိမ်စောင့်ကျန်နေခဲ့သည့် ဒေသခံများကိုလည်း စစ်ကောင်စီတပ်က လိုက်လံဖမ်းဆီးနေကြောင်း ဒေသခံများက ဆိုကြသည်။
” စစ်တပ်က မြို့လယ်မှာ အိမ်တွေကိုဝင်ပြီး လိုက်ဖမ်းနေတာရှိတယ်။ တိုက်ပွဲတော့ ဒီနေ့ ထပ်မဖြစ်သေးဘူး။ ဒါပေမယ့် လူတွေကိုတော့ မနေ့ကတည်းက သံသယနဲ့ ဖမ်းနေတာတွေ ကြားရတယ်။ ဒီနေ့လည်း ထပ်ဖမ်းတာတွေရှိတယ်လို့ သိရပါတယ် ” ဟု ပြောသည်။
မြောက်ဦးတွင် စစ်တပ်နှင့် ရက္ခိုင့်တပ်တော် – AA တို့ ထိတွေ့တိုက်ပွဲဖြစ်ပွားပြီးနောက် စစ်ကောင်စီ၏ ခမရ ၅၄၀ နှင့် ခမရ ၃၇၇ တပ်များက အနီးဝန်းကျင်ရှိကျေးရွာများကိုလည်း လက်နက်ကြီးများဖြင့် အကြိမ် ၁၀၀ ခန့် ရမ်းသမ်း ပစ်ခတ်ခဲ့သဖြင့် မြောက်ဦးမြို့၊ ဆင်ချဆိပ်ရပ်ကွက်တွင်း လက်နက်ကြီးကျရောက်ပေါက်ကွဲခဲ့၍ လင်မယား ၂ ဦးသေဆုံးပြီး ကလေးငယ် ၁ ဦး ထိခိုက်ဒဏ်ရာရရှိခဲ့သည်ဟု သိရသည်။
ယမန်နေ့ နေလယ် ၁ နာရီကျော်တွင်လည်း မြောက်ဦးအခြေစိုက် စစ်ကောင်စီလက်အောက်ခံ ခမရ – ၃၇၇ တပ်ရင်းက တပ်ဖွဲ့ဝင်အင်အား ၇၀ ကျော်သည် မြောက်ဦးမြို့၊ အောင်မင်္ဂလာရပ်ကွက်၊ ကုလားကန်တောင်ပိုင်း ရပ်ကွက်၊ ဗန္ဓုလရပ်ကွက် (ကျက်ပိတ်)ရပ်ကွက်များသို့ လက်နက်အင်အားအပြည့်အစုံဖြင့် ဝင်ရောက်လာကာ ရပ်ကွက်တွင်းက ဒေသခံ ၉ ဦးအား လူသားဒိုင်းကာအဖြစ် ဖမ်းဆီးခေါ်ဆောင်သွားခဲ့သည့်အပြင် စစ်ကောင်စီတပ်၏ လက်နက်ကြီးများဖြင့် ရမ်းကားပစ်ခတ်မှုများကြောင့် မြောက်ဦးမြို့ပေါ်ရှိ နေအိမ်အချို့ ပျက်စီးသွားခဲ့ကြောင်းလည်း သိရသည်။
ပုံစာ – လက်နက်ကြီးကျ၍ ပျက်စီးသွားသည့် ယဥ်ကျေးမှုပြတိုက်က ရှေးဟောင်းကျောက်စာများအားတွေ့ရစဥ်။
