ညီညီသူ
ဒီဇင်ဘာ ၁၃ ၊ ၂၀၂၃။
Covid – 19 နှင့် စစ်အာဏာသိမ်းမှုကြောင့် မြန်မာနိုင်ငံတွင်ကျင်းပလေ့ရှိသော ဖျော်ဖြေရေးပုံစံများပြောင်းလဲလာ ခဲ့သည်။ ဘီယာဘားလိုနေရာတွေမှာ မြန်မာနိုင်ငံက အဆိုတော် ကြီး၊ လတ်၊ ငယ်မရွေးဖျော်ဖြေလာကြသည်။ နိုင်ငံရဲ့နိုင်ငံရေးအပြောင်းအလဲနဲ့အတူ လိုက်ပါပြောင်းလဲလာခဲ့သော Trendတစ်ခုဟုလည်း ဆိုနိုင်ပေလိမ့်မည်။
ပြီးခဲ့သော ဒီဇင်ဘာ ၁၁ ရက်ကလည်း ရန်ကုန်မြို့ရှိ The Heart of Rangoon – THOR တွင်မြန်မာနိုင်ငံ၏ အဆိုတော်၂ ဦးဖြစ်သော လေးဖြူနှင့် အငဲတို့ဖျော်ဖြေခဲ့ကြသည်။ Onlineပေါ်ပျံ့နှံ့နေသောဗီဒီယိုဖိုင်များအရ အငဲ က ယခုကဲ့သို့ပြောဆိုခဲ့ပါသည်။
”ကိုဗစ်ကတည်းက အစာငတ်ခံရသလိုဖြစ်နေတယ်။ ဒီညမှာ ဆန်ပြုတ်တိုက်ဖို့ကမ်းလှမ်းတဲ့သူတွေရယ်၊ဆန်ပြုတ်လာတိုက်တဲ့ခင်ဗျားတို့ကို ကျေးဇူးတင်ပါတယ်”
**************
လေးဖြူနှင့် အငဲတို့၏ ဘားတွင်းဖျော်ဖြေပွဲကိုမြင်ရတော့ System of A Down ကို သတိရမိသည်။
ပြီးခဲ့သော စက်တင်ဘာလအတွင်း အဇာဘိုင်ဂျန်နိုင်ငံ၏မြို့တော် ဘာကူးမြို့တွင် Imagine Dragons ကဂီတ ဖျော်ဖြေပွဲကျင်းပဖို့ စီစဥ်ခဲ့သည်။ သို့သော် ယင်းဂီတဖျော်ဖြေပွဲမကျင်းပဘဲ ဖျက်သိမ်းပေးရန်System of A Down ၏ ပင်တိုင်အဆိုရှင် Serj Tankian က စာတစ်တန်ပေတစ်တန်ဖြင့်တောင်းဆိုခဲ့ဖူးသည်။ ပထမတော့ ထို တောင်းဆိုမှုက တိုးတိုးတိတ်တိတ်သာဖြစ်သော်လည်းနောက်ပိုင်းမှာတော့ လူသိရှင်ကြားဖြစ်လာခဲ့သည်။ Srej Tankian ကိုယ်တိုင်ဂီတပွဲဖျက်သိမ်းပေးရန်တောင်းဆိုမှုအတွက် အွန်လိုင်းကဦးဆောင်ပြီး လက်မှတ်များတောင်း ခံခဲ့သည်။
Srej Tankian သည် လက်ဘနွန်နိုင်ငံတွင်မွေးဖွားခဲ့ပြီး အာမေးနီးယန်း -အမေရိကန်တစ်ယောက်ဖြစ်သလို System of A Down ကို တည်ထောင်ခဲ့သူလည်းဖြစ်သည်။တချို့ကတော့ သူ့ကို နိုင်ငံရေးကဲသော ဂီတပညာရှင် တစ်ယောက်ဟူ၍လည်း ဆိုကြသည်။ System of A Down ၏ ကျန်ဝိုင်းတော်သားများသည်လည်း အာမေးနီးယန်း – အမေရိကန်များဖြစ်ကြသည်။
အဇာဘိုင်ဂျန်နိုင်ငံသည် အာမေးနီးယားနိုင်ငံနှင့် စစ်ဖြစ်ပွားနေသောနိုင်ငံဖြစ်ပြီးဂီတဖျော်ဖြေပွဲကျင်းပမည့် ပြီးခဲ့ သည့်စက်တင်ဘာလနှောင်းပိုင်းအထိ စစ်ဖြစ်နေတုန်းပင်ဖြစ်၏။
Srej Tankian ရေးခဲ့သောစာတွင် ”အဇာဘိုင်ဂျန်နိုင်ငံရဲ့ အာဏာရှင်အစိုးရက နာဂေါ်နို -ခါရာဘတ်ခ်ျဒေသက လူပေါင်းသိန်းချီကို ငတ်မွတ်ခေါင်းပါးခြင်းဘေးဆိုးကြီးဆီ တွန်းပို့နေတယ်။ဒါကိုပဲ ICC ရဲ့အစိုးရရှေ့နေဟောင်း တစ်ယောက်က လူမျိုးသုဥ်းသတ်ဖြတ်မှုလို့ သတ်မှတ်ခဲ့တယ်။Imagine Dragons အနေနဲ့ ဒီလိုအဖြစ်အပျက်တွေ ကို မသိထားဘူးဆိုတာသေချာတယ်”ဟုရေးသားခဲ့သည်။
တကယ်လို့သာ Imagine Dragons အနေဖြင့် အဇာဘိုင်ဂျန်နိုင်ငံတွင်ကျင်းပရန်စီစဥ်ထားသောဂီတဖျော်ဖြေပွဲကို သွားရောက်ဖျော်ဖြေခဲ့မည်ဆိုပါက အာဏာရှင်များကို ကူညီရာရောက်မည်ဖြစ်သလိုလူမျိုးသုဥ်းသတ်ဖြတ်မှုက ရသော အကျိုးအမြတ်များကို အမေရိကန် ဂီတဝိုင်းတစ်ဝိုင်းကရရှိသွားသည်နှင့်လည်း တူပေလိမ့်မည်ဟု Srej Tankian ၏ Facebook Page တွင်ဖော်ပြထားသည်။
( နိုင်ငံ့အရေးကြုံလာတိုင်း၊ ကမ္ဘာ့အရေးအခင်းတစ်ခုခုဖြစ်လာတိုင်း နေသာသလိုမနေခဲ့ကြသည်က SrejTankian တစ်ယောက်တည်းတော့မဟုတ်ပါ)
ကျွန်တော်တို့နိုင်ငံတွင် ဘာတွေလွဲချော်နေသလဲတော့ ကျွန်တော်မသိပါ။စစ်အာဏာသိမ်းပြီးနောက်ပိုင်း မြန်မာနိုင်ငံတွင် အိုးအိမ်စွန့်ခွာထွက်ပြေးနေရသူပေါင်း ၂သန်းကျော်ရှိနေသည်ဟု UNOCHA က ထုတ်ပြန်ထားပါသည်။ နိုင်ငံတဝန်းတိုက်ပွဲများကြောင့်ယင်းပမာဏထက် ဆက်လက်မြင့်တက်နေဦးမည်ကလည်း အသေအချာပင်ဖြစ်သည်။
နိဂုံးချုပ်ရမည်ဆိုလျှင်တော့ ကိုဗစ်နှင့် စစ်ဒဏ်ခံစားနေခဲ့ရသည်မှာ တစ်နိုင်ငံလုံးဖြစ်သော်လည်း Trendတစ်ခုဖြစ် လာသော ဘားတွင်းဂီတဖျော်ဖြေပွဲများကို တက်ရောက်ကြည့်ရှုအားပေးနိုင်သည်ကလက်တစ်ဆုပ်စာလူမျှသာရှိပါသည်။
ငွေကြေးအတော်အသင့်ပြေလည်သူများ ဆန်ပြုတ်သောက်ပြီး အားယူနေချိန်၌ဆန်ပြုတ်ပင်မသောက်နိုင်ကြတော့သောသူများ မြန်မာနိုင်ငံတွင် များစွာရှိနေသည်ကိုတော့ကျွန်တော်တို့သိနေကြပါသည်။
ဓာတ်ပုံ – Facebook
