သံလွင်ခက်
စက်တင်ဘာ ၂၀ ၊ ၂၀၂၃ ။
ထိုင်း-ကရင်နယ်စပ်ကို နိုင်ငံရေးအရ လာရောက်ခိုလှုံနေကြသူတွေဟာ တော်လှန်ရေးကာလကြာလာတာနဲ့အမျှ စားဝတ်နေရေး အဆင်မပြေမှုအခက်အခဲတွေနဲ့ အကြီးမားဆုံးရင်ဆိုင်နေကြရပါတယ်။
နေ့စဥ်ကြုံတွေ့နေကြရတဲ့ အခက်အခဲတွေနဲ့ အဆင်မပြေမှုတွေကြောင့် စိတ်ဓာတ်ကျဆင်းနေကြတာ၊ စိတ်ကျန်းမာရေး သိသိသာသာထိခိုက်လာနေတာတွေအပြင် ကိုယ့်ကိုယ်ကိုသေကြောင်းကြံစည်တာတွေအထိ ရှိလာနေပါတယ်။
ဒါကြောင့် CDM တွေအပါအဝင် နယ်စပ်ကိုနိုင်ငံရေးအရ လာရောက်ခိုလှုံသူတွေရဲ့ စားသောက်ရေးအခက်အခဲတွေ ကို အတိုင်းအတာတစ်ခုထိ ဖြေရှင်းပေးနိုင်ဖို့ ” ထမင်းတစ်နပ် ၁၅ ဘတ်” အစီအစဥ်ကို ပြီးခဲ့တဲ့ သြဂုတ်လ ဒုတိယ အပတ်ထဲမှာပဲ စတင်ခဲ့ကြပါတယ်။
အမေရိကရောက် ၈၈ မျိုးဆက်တွေရဲ့ မ,တည်ပေးမှုနဲ့ ဗကသ ကျောင်းသားဟောင်းတွေဦးဆောင်ပြီး ထမင်းတစ်နပ်စာအတွက် ၁၅ ဘတ်နဲ့ အိမ်တိုင်ရာရောက် လိုက်လံရောင်းချပေးနေပါတယ်။
အစပိုင်းမှာ လူဦးရေ ၂၀၀ ၊ ၃၀၀ အတွက်သာ ပို့ဆောင်ပေးနေရပေမယ့် နောက်ပိုင်းမှာတော့ လိုအပ်ချက်တွေများလာတာမို့ ၅၀၀ လောက်အထိဖြစ်လာပြီး တခါတလေ လူဦးရေ ၈၀၀ လောက်အထိ စီစဥ်ပေးနေရတယ်လို့ ပါဝင်သူတစ်ဦးဖြစ်တဲ့ ကိုမင်းသွေးသစ် က ပြောပါတယ်။
လက်ရှိမှာ ” ထမင်းတစ်နပ် ၁၅ ဘတ်” အစီအစဥ်ကို တစ်ပတ်မှာ တနင်္လာ နဲ့ ကြာသပတေး ၂ ရက်ထဲသာ ပို့ဆောင်ပေးနိုင်ပြီး လိုအပ်ချက်တွေများလာတဲ့ အခြေအနေတွေကြောင့် ထပ်တိုးပြီးပို့ဆောင်ပေးနိုင်အောင် ဘာသာပေါင်းစုံကွန်ရက်ကလည်း ပူးပေါင်းပါဝင်လာတာတွေ့ရပါတယ်။
ဒီကနေ့ စက်တင်ဘာလ ၂၀ ရက်မှာ ဘာသာပေါင်းစုံကွန်ရက်နဲ့ “ထမင်းတစ်နပ် ၁၅ ဘတ်” အစီအစဥ်တို့ရဲ့ မိတ်ဆက်တွေ့ဆုံပွဲကို ပြုလုပ်ခဲ့ပြီး လိုအပ်သူတွေကို ပိုပြီးကူညီနိုင်အောင် ကြိုးစားသွားမယ်လို့ ဘာသာပေါင်းစုံကွန်ရက်က တာဝန်ရှိသူ ဦးထွန်းကြည် က ပြောပါတယ်။
” ကျွန်တော်တို့ မဲဆောက်မှာက နိုင်ငံရေးအရ လာခိုလှုံလာတဲ့သူတွေက အခက်အခဲအကျပ်အတည်းစိန်ခေါ်မှုတွေနဲ့ရင်ဆိုင် ကြုံတွေ့နေရတယ်။ အဲ့အထဲမှာ စိတ်ပိုင်းဆိုင်ရာ Trauma (စိတ်ဒဏ်ရာ)ရထားသူတွေလည်း ပါတယ်ပေါ့နော်။ အခုဆိုရင် ဗူးပလုံးကောက်နေရတဲ့သူတွေ ၊ ပြောင်းဖူးချိုးနေရတဲ့သူတွေ ၊ နောက်တစ်ခု ဆောက်လုပ်ရေးလုပ်ငန်းခွင်မှာ ပန်းရန်လုပ်နေရတဲ့သူတွေ၊ ဂေါ်ဖီထုပ်ပေါ့ဗျာ ခုတ်နေရတဲ့သူတွေ၊ အဲ့လိုမျိုး အောက်ခြေသိမ်းအလုပ်မျိုး လိုက်လုပ်နေရတဲ့ အခြေအနေမျိုးမှာ ကျွန်တော်တို့က တစ်ထောင့်တစ်နေရာကနေ “ထမင်းတစ်နပ် ၁၅ ဘတ်” လေးကို ပိုတိုးချဲ့ပြီးလုပ်နိုင်ဖို့ ဒီနေ့ပွဲကို ကျင်းပရတာဖြစ်ပါတယ် “လို့ ပြောပါတယ်။
စားသောက်ရေးအတွက် လိုအပ်နေသူတွေကို ပိုပြီးထောက်ပံ့နိုင်ဖို့ ဒီကနေ့ တွေ့ဆုံပွဲမှာ အလှူငွေတွေလည်း ရရှိခဲ့ပြီး ဘာသာပေါင်းစုံကွန်ရက်က ဘတ် ၅၀၀၀ ၊ နွေဦးတော်လှန်ရေးသံဃာကွန်ရက်က ဘတ် ၅၀၀၀ ၊ ခရစ်ယာန်ကွန်မြူနတီက ဘတ် ၂၀၀၀ ပါဝင်လှူဒါန်းခဲ့တဲ့အပြင် လစဥ် ဘတ် ၂၅၀၀ ပါဝင်လှူဒါန်းဖို့ ပြောဆိုထားသူတွေလည်းရှိနေတယ် လို့ ဦးထွန်းကြည် က ပြောပါတယ်။
အစားအသောက်လိုအပ်နေသူတွေကို အရေအတွက်များများနဲ့ နေ့တွေထပ်တိုးပြီးပို့ပေးနိုင်ဖို့အတွက် ပုံမှန်အလှူရှင်တွေအပြင် လုပ်အားပေးလူငယ်တွေလည်း ထပ်မံလိုအပ်နေတယ်လို့ အပတ်စဥ် ကူညီပေးနေတဲ့ ၈၈ ကျောင်းသားဟောင်း ကိုညီညီကပြောပါတယ်။
“ထမင်းတစ်နပ် ၁၅ ဘတ် “အစီအစဥ်ကို အစားအသောက် လိုအပ်နေသူတွေသာမကပဲ တချို့ပါဝင်လှူဒါန်းချင်သူတွေကပါ မှာယူနေကြတာလည်းရှိပြီး နှစ်ယောက်စာအတွက်မှာပေမယ့် ဆယ်ယောက်စာအတွက်ပေးတာမျိုးတွေနဲ့ ပုံမှန်လှူဒါန်းနေသူတွေလည်းရှိတယ်လို့ ထမင်းဗူးတွေ လိုက်လံပို့ဆောင်ရာမှာကူညီပေးနေတဲ့ လူငယ် ၁ ဦး က ပြောပါတယ်။
“ထမင်းတစ်နပ် ၁၅ ဘတ်” အစီအစဥ်ကနေ အခက်အခဲဖြစ်နေသူတွေကို အချိန်ဘယ်လောက်ကြာကြာ ကူညီပေးသွားနိုင်မလဲဆိုတာ မသိနိုင်သေးတဲ့အတွက် တော်လှန်ရေးတပ်ဦးမှာရှိနေတဲ့ တာဝန်ရှိသူတွေ အနေနဲ့လည်း ဒါတွေကိုလျစ်လျူမရှုထားဖို့လိုပါတယ်လို့ ဦးထွန်းကြည်ကပြောပါတယ်။
