နန်းဆုပန်ခန့်
မတ် ၃၁၊ ၂၀၂၃။
ကရင်ပြည်နယ်၊ ကေအဲန်ယူတပ်မဟာ၆နယ်မြေအတွင်း၌ ဖြစ်ပွားခဲ့သောတိုက်ပွဲများကြောင့်ပိတ်ထားခဲ့သည့် မြဝတီ–ကော့ကရိတ်အာရှလမ်းမကို ယခုရက်ပိုင်းအတွင်း၌ ပြန်ဖွင့်ပေးထားသော်လည်း စစ်ကောင်စီတပ်ဖွဲ့ဝင်များကအစစ်အဆေးများနေသည်ဟု သိရသည်။
မြဝတီ–ရန်ကုန်ခရီးသည်ပို့ဆောင်ပေးသည့်ကားသမားတစ်ဦးကတော့ သင်္ကန်းညီနောင်ရဲစခန်းနှင့်ပဲခူးဂိတ်တွင်လူကိုကြည့်ပြီးစစ်ဆေးချင်သလိုစစ်ဆေး၍ လူကိုကြည့်ပြီးပိုက်ဆံတောင်းတာတွေရှိသည်ဟုဆိုသည်။
“လူကြီးနဲ့ကလေးတွေကိုတင်ရင်တော့ စကားသိပ်မပြောရဘူး၊၊ လူငယ်တွေကိုတင်ရင်တော့ သူတို့ကမင်္သကာရင်မသင်္ကာသလိုစစ်တယ်၊၊စိတ်ရှိရင်ရှိသလိုပိုက်ဆံတောင်းတယ်၊ အနည်းဆုံး ၃၀၀၀ကျပ်တို့၊ ၅၀၀၀ကျပ်တို့ပေးရတာပေါ့ ” ဟု ၎င်းကဆက်ပြောသည်။
မတ်လ ၂၅ ရက်တွင် မြဝတီကုန်သွယ်ရေးဇုန်၊ ကျုံဒိုးနှင့်ကော့ကရိတ်စသည့် အာရှလမ်းမတစ်လျောက်နေရာအနှံ့ဖြစ်ပွားခဲ့သောတိုက်ပွဲကြောင့် မြဝတီမဲဆောက်လမ်းကိုတနေကုန်နီးပါးပိတ်ဆို့မှုရှိခဲ့သလို မေတ္တာလင်းမြိုင်မှသင်္ကန်းညီနောင်အထိလမ်းများပိတ်ဆို့ခဲ့သည်။
ထို့နောက်ရက်ပိုင်းအတွင်း လမ်းအချို့ပြန်လည်ဖွင့်လှစ်ပေးခဲ့သော်လည်း လမ်းသွားလမ်းလာကားများကိုစစ်ဆေးမှုပြုလုပ်ခဲ့သည်ဟု မြဝတီမြို့ဒေသခံများထံမှသိရသည်။
မြဝတီကုန်သွယ်ရေးဇုန်နှင့်ရဲစခန်းတိုက်ခိုက်ခံရသည့်နောက်တွင် မြဝတီမြို့ထဲအသွားအလာနည်းပါးပြီး သွားလာမှုအတွက်စိုးရိမ်နေရသည်ဟု ဒေသခံအမျိုးသမီးတစ်ဦးထံမှသိရသည်။
၎င်းက” အဲ့ဒီကုန်သွယ်ရေးဇုန်မီးရှို့ခံရတဲ့နောက်မှာ မြဝတီမြို့ထဲတောင်ဝေးဝေးသွားလို့မရဲတော့ဘူး။ တိုက်ပွဲထပ်ဖြစ်ရင်တစ်ခုခုဖြစ်မှာကြောက်လို့အသွားအလာသတိထားရတယ်” ဟုပြောသည်။
မြဝတီမြို့အနီးတွင်ဖြစ်ပွားခဲ့သောတိုက်ပွဲများကြောင့် မြို့ပေါ်ရှိဒေသခံများမှာ နောက်တစ်ကြိမ်ထပ်ဖြစ်မည်ကိုစိုးရိမ်နေကြသလို ရန်ကုန်မှ မြဝတီကိုလာရန်စီစဥ်ထားသူများကလည်း ခရီးစဥ်ကို သင်္ကြန်ပြီးအထိနောက်ဆုတ်ထားကြသည်။
” တိုက်ပွဲက အချိန်မရွေးဖြစ်နိုင်တော့ မလာရဲသေးဘူး။ အစက လကုန်ပြီး လာဖို့စီစဥ်ထားတာ။ ကလေးတွေလည်းပါတော့ လမ်းကြောင်းစိတ်ချရမှပဲသွားတော့မယ်။ သင်္ကြန်အပြီးလောက်မှ ဖြစ်မယ်ထင်တယ်“ဟု ရန်ကုန်မြို့မှခရီးသည်တစ်ဦးကပြောသည်။
စစ်ရေးမှာတင်းမာနေဆဲဖြစ်သောကြောင့် ဒေသခံများအနေဖြင့် ဗုံးခိုကျင်းများတူးထားရန်၊ လုံခြုံသည့်နေရာများသို့ရွေ့ပြောင်းနေထိုင်ရန်အတွက် မတ်၂၅ရက်နေ့တိုက်ပွဲတွင်ပါဝင်သည့်ပူးပေါင်းအဖွဲ့တစ်ဖွဲ့က သတိပေးစကားအား ပြောသည်။
ပြည်သူ့ကာကွယ်ရေးတပ်အနေဖြင့်ပြည်သူကိုပြည်သူလိုဆက်ဆံပြီး ရန်သူကိုရန်သူလိုဆက်ဆံသွားမှာပါဟု ၎င်းကဆက်ပြောသည်။
မြဝတီ–ကော့ကရိတ်အာရှလမ်းမသည် ပြီးခဲ့သော ၂၀၂၂ခုနှစ် မတ်လမှစ၍ ယခုအချိန်ထိ ကားလမ်းမကြီးပိတ်ဆို့မှု၆ ကြိမ်ထက်မနည်းရှိပြီး လမ်းမကြီးပိတ်ဆို့မှုကြောင့်ကုန်သွယ်စီးဆင်းမှုနှင့် ဒေသခံများသွားလာရေးအခက်အခဲများဖြစ်ပွားခဲ့သည်။
