သံလွင်ခက်။
မတ် ၂၈ ၊ ၂၀၂၃။
စစ်ကောင်စီ စစ်ရေးပြကွင်းကို အဝေးပစ် ရှော့တိုက်ဒုံးများဖြင့် ပစ်ခတ်ရန် လုပ်ဆောင်နေစဉ် နေပြည်တော် ပြည်သူ့ကာကွယ်ရေးတပ်ဖွဲ့ဝင် ၂ ဦးဖမ်းဆီးခံခဲ့ရသည်ဟု ယင်းအဖွဲ့ထံမှ သိရသည်။
မတ်လ ၂၄ ရက်နေ့က စစ်ရေးပြကွင်းကို အဝေးပစ် ရှော့တိုက်ဒုံးများဖြင့် ပစ်ရန် ကြိုးပမ်းသည့် ကာကွယ်ရေးတပ်ဖွဲ့ဝင် ဦးစိန်လွင်နှင့် ကိုဝင်းမျိုးထက်တို့ အဖမ်းခံရခြင်းဖြစ်သည်ဟု နေပြည်တော် ပြည်သူ့ကာကွယ်ရေးအဖွဲ့စစ်ရေးတာဝန်ခံ ဗိုလ်တေဇက သံလွင်ခက်ကို ပြောသည်။
၎င်းက ” ဖုန်းပြောတာကနေ သတင်းပေါက်ကြားတဲ့ သဘောရှိတယ်။ တလကျော်လောက် ကြိုးစားထားတာအောင်မြင်ခါနီးမှဖြစ်ရတာဆိုတော့ စိတ်ထဲ တော်တော်ခံရ ခက်တာပေါ့။ ဒါပေမယ့် ဒီထက်မက ကြီးတဲ့ မစ်ရှင်မျိုးတွေ ဆက်ကြိုးစားသွားမှာပါ ” ဟုဆိုသည်။
၇၈ နှစ်မြောက် တပ်မတော်နေ့အထိမ်းအမှတ် နေပြည်တော်အတွင်းပြုလုပ်မည့် ပျော်ပွဲရွှင်ပွဲနေရာများ၊စစ်ရေးပြကွင်း (ရှမ်းစု)နေရာများကို ၁၀၇ မမ ရှော့တိုက်ဒုံးများဖြင့် ပစ်ရန် ကာကွယ်ရေးတပ်ဖွဲ့ဝင်များက စီစဉ်ခဲ့ခြင်းဖြစ်သည်။
နေပြည်တော် PDF အဖွဲ့ဝင်များဖြစ်သည့် ဦးစိန်လွင်(ခ) မောင်စိန်(ခ)ခရေကို ပျဉ်းမနားမြို့နယ်၊ဇီးဖြူပင်ကျေးရွာ၊အဝေရာဆည်အနီးရှိ သရက်ခြံအတွင်းတွင်လည်းကောင်း ကိုဝင်းမျိုးထက်(ခ)ဝင်းနိုး(ခ)ဘီလား အား ပျဉ်းမနားမြို့နယ်၊ဇီးဖြူပင်ကျေးရွာအဝင်လမ်းအရှေ့ဘက်ရှိ တောင်ယာတဲ၌ လက်နက်ခဲယမ်းများနှင့်အတူ ဖမ်းဆီး ရမိခဲ့သည်ဟု စစ်ကောင်စီလက်အောက်ခံ တယ်လီဂရမ်ချန်နယ်များက ဖော်ပြသည်။
၎င်းတို့နှင့်အတူ ၁၀၇ မမရှော့တိုက်ဒုံး ၂ လုံး၊ ၁၀၇ မမရှော့တိုက်ဒုံးထိပ်ဖူး ၂ ခု၊ ဆားကစ်ပြား ၂ ခု၊ Remote ၁ ခု၊ပစ္စတိုအပစ်လက်ကိုင် ၁ ခု၊ စနိုက်ပါမှန်ပြောင်း ၁ ခု၊ MG-1 လက်ပစ်ဗုံး ၁ လုံး၊ လက်ပစ်ဗုံးစနက်တံ ၄ ခု၊ PVC ပိုက်ဖြင့်ပြုလုပ်ထားသည့် လက်လုပ်မိုင်း ၁ လုံး၊ ၁၂ ဗို့ကျည် ၁၄၆ တောင့်၊ လျှပ်စစ်ဒီတိုနေတာ ၁၆ ခု၊ ယမ်းပျော့ ၅ချောင်း၊ ယမ်းမှုန့် ၅၀ ကျပ်သား၊ အစိမ်းရောင် ကျောပိုး အိတ် ၁ လုံး၊ ပြောက်ကျားပုခက် ၄ ခု၊ သေနတ်လွယ်ကြိုး၁ ချောင်းနှင့်ဖောက်ခွဲရေးဆက်စပ် ပစ္စည်းများနှင့်အတူ ဖမ်းဆီးရမိခဲ့သည်ဟု စစ်ကောင်စီထိန်းချုပ် မီဒီယာများကထုတ်ပြန်သည်။
