ထိုင်းအစိုးရ မြန်မာရွှေ့ပြောင်းလုပ်သားများထပ်မံခေါ်ယူမည်

သဇင်

မတ် ၂၅၊ ၂၀၂၃။

မြန်မာ ရွှေ့ပြောင်းလုပ်သားများ ထပ်ခေါ်ရန် ထိုင်းအာဏာပိုင်များက စီစဉ်နေသည်ဟု ထိုင်းအခြေစိုက် မီဒီယာများက ဖော်ပြသည်။

ထိုင်းနိုင်ငံတွင် အခြေခံလုပ်သားလိုအပ်မှုကြောင့် အလုပ်အကိုင်ရှာဖွေရေးညွှန်ကြားရေးမှူးချုပ်နှင့် သက်ဆိုင်ရာဌာနများမှ တာဝန်ရှိသူများတွေ့ဆုံ ဆွေးနွေးကာ အလုပ်သမားသစ်များ ခေါ်ယူရန် စီစဉ်နေခြင်းဖြစ်သည်။

မတ်လ ၂၀ ရက်၊ နံနက် ၁၀ နာရီတွင် ကျင်းပပြုလုပ်ခဲ့သည့် အစည်းအဝေးတွင် လာအို ၊ မြန်မာ၊ ကမ္ဘောဒီးယားနဲ့ဗီယက်နမ် လေးနိုင်ငံမှ အလုပ်သမားသစ် ထပ်မံလက်ခံမည်ဟု ထိုင်းအလုပ်သမားရေးရာဝန်ကြီးဌာနကအတည်ပြုထားသည်။

တရားမဝင်ဝင်ရောက်လုပ်ကိုင်နေသည့် အလုပ်သမားအရေး စီမံခန့်ခွဲရန်နှင့် လုပ်သားသစ်ထပ်မံခေါ်ယူရန်ဆွေးနွေးထားသည်ဟု ထိုင်းရွှေ့ပြောင်းမြန်မာအလုပ်သမားအရေးကူညီသူ Migrants Monitoring Group-MMG တာဝန်ခံ ဦးအောင်မြတ်က ပြောသည်။

“အလုပ်သမားဝန်ကြီးဌာနက တရားဝင်စာထုတ်ထားတာမျိုးတော့မရှိသေးဘူး။အခြေခံလုပ်သားတွေအတွက်အောက်ခြေသိမ်းလုပ်ရမယ့် အလုပ်တွေအတွက်ခေါ်တာပါ ။ တကယ်လို့ အလုပ်လျှောက်မယ်ဆိုရင်တော့ အဲ့ဒီအလုပ်တွေကို တကယ်ရော လုပ်နိုင်လားဆိုတာ သေချာစဉ်းစားဖို့လိုပါတယ်“ဟု ၎င်းက ပြောသည်။

ထိုင်းနိုင်ငံတွင် လတ်တလောရှိနေသည့် ရွှေ့ပြောင်းအလုပ်သမားများစွာရှိသည့်အတွက် အလုပ်လျှောက်ထားသည့်အခါ သေချာစီစစ်ရန် လိုအပ်သည်ဟု အလုပ်သမားအရေးကူညီသူများက ပြောသည်။

ဦးအောင်မြတ်က “အလုပ်လျှောက်တဲ့ခါမှာတော့ ကိုယ့်လျှောက်မယ့်အေဂျင်စီက အတုလား၊အစစ်လားဆိုတာကိုစုံစမ်းဖို့လိုပါတယ်။ပိုက်ဆံချေပြီးရင်လဲ ချေပြီးကြောင်း မှတ်တမ်းဓာတ်ပုံရအောင်ရိုက်ထားပါ။ဒါမှသာ နောက်ဖြစ်လာမယ့် ပြဿနာတွေကို ဖြေရှင်းလို့ရမှာ ဖြစ်တယ်“ဟု ပြောသည်။

ထိုင်းနိုင်ငံတွင် မြန်မာနိုင်ငံမှ ရွှေ့ပြောင်းလုပ်ကိုင်နေသည့် အလုပ်သမားလေးသန်းခန့်ရှိပြီး အဆိုပါ အရေတွက်တွင်အထောက်အထားမရှိသည့် အလုပ်သမားများလည်းပါဝင်သည်။

ပုံစာ–ထိုင်းအာဏာပိုင်းများ အလုပ်သမားသစ်ခေါ်ယူရန် ဆွေးနွေးနေသည့်မြင်ကွင်း။

Photo-MT