“သူတို့ကအော်တယ်။ မလုပ်ပါနဲ့ ။မပစ်ပါနဲ့။ ချမ်းသာပေးပါပေါ့ ။အဲလို ပြောနေတဲ့အချိန်မှာ သေနတ်သံတွေကြားရတာ “
ပင်လောင်းမြို့နယ် နမ်းနိန်းဘုန်ကြီးကျောင်းတွင် ပအိုဝ်းသံဃာတော်များနှင့်ပြည်သူများ သတ်ဖြတ်ခံရသည့်ညတွင် ကြားရသည့်အသံများကို KRU တာဝန်ခံကိုလင်းလင်းက ပြောသည်။
ရှမ်းပြည်နယ်တောင်ပိုင်း၊ ပင်လောင်းမြို့နယ်၊ ဆောင်းပြောင်းဒေသ ၊ နမ်းနိန်းကျေးရွာအတွင်းကို စစ်ကြောင်းထိုးလာသည့် စစ်ကောင်စီတပ်က မတ်လ ၁၁ ရက်တွင် ကျေးရွာနေအိမ်များကို မီးရှို့ဖျက်ဆီးပြီးဘုန်းကြီးကျောင်းအတွင်း ခိုလှုံနေသော သံဃာတော်များနှင့် စစ်ဘေးရှောင်များကို ဖမ်းဆီး၍ ညပိုင်းတွင်ဖြတ်သတ်ခဲ့ခြင်းဖြစ်သည်။
” ညဘက် ၇ နာရီခွဲ၊ ၈ နာရီလောက်မှာ အသံတွေစကြားရတာ ။ အဲ့ဘုန်းကြီးကျောင်းနဲ့ မနီးမဝေးတစ်နေရာမှာကျွန်တော်တို့ကရှိနေတာ ။ လူအဲလောက်အများကြီးကို ပစ်သတ်မယ်လို့ မထင်ထားဘူး။ နယ်မြေရှင်းလင်းရေးလုပ်တဲ့အချိန်မှပဲ အပြုံလိုက်ပစ်သတ်ထားတာတွေ့တာပေါ့ ” ဟု ကိုလင်းလင်းကပြောသည်။
စစ်ကောင်စီတပ်များသည် ဘုန်းကြီးကျောင်းအတွင်းရှိ သံဃာတော်နှင့်စစ်ဘေးရှောင်ပြည်သူများကိုသတ်ဖြတ်ပြီးနောက် နောက်နေ့ နံနက်ပိုင်းတွင်တပ်ပြန်ဆုတ်သွားခဲ့သည်။
ထို့နောက် ကာကွယ်ရေးမဟာမိတ်တပ်များက နယ်မြေရှင်းလင်းရေးများပြုလုပ်ခဲ့ရာတွင် ဘုန်းကြီးကျောင်းဘေးတွင် သေနတ်များဖြင့် အနီးကပ်ပစ်ခတ်ခံရပြီး သေဆုံးနေသည့် သံဃာ၃ ပါး၊ အမျိုးသား ၁၈ ဦးနှင့်အမျိုးသမီးတစ်ဦး တို့၏အလောင်းများကို တွေ့ရှိခဲ့ရသည်။
” တစ်နေရာထဲမှာ ကျွန်တော်တို့တွေ့တာက ၂၂ လောင်းပေါ့ ။ အဲအလောင်းတွေကို သယ်ပြီးတော့ မနေ့ကပဲကောင်းကောင်းမွန်မွန် သင်္ဂြိုဟ်ပေးလိုက်တယ် “ဟု ကရင်နီတော်လှန်ရေးတပ်ပေါင်းစု KRU တာဝန်ခံ ကိုလင်းလင်းကပြောသည်။
နမ်းနိန်းရွာကိုစစ်ကောင်စီတပ်က စစ်ကြောင်းထိုးခဲ့ချိန်တွင် ဘုန်းကြီးကျောင်း၌ အစုလိုက်သတ်ဖြတ်ခံရမှုအပြင် အခြားနေရာများတွင်လည်း ပြည်သူအလောင်း ၇ လောင်းထပ်မံတွေရှိရသဖြင့် ပြည်သူ ၃၀ ဦးဝန်းကျင်အထိသတ်ဖြတ်ခံလိုက်ရသည်ဟု ပအိုဝ်းပြည်သူ့ကာကွယ်ရေးတပ် PNDF-KK တာဝန်ရှိသူက သံလွင်ခက်ကိုပြောသည်။
သတ်ဖြတ်ခံလိုက်ရသည့် ပြည်သူများသည် ပအိုဝ်းတိုင်းရင်များ အများစုဖြစ်ပြီး စစ်ကြောင်းထိုးလာချိန်ဘုန်းကြီးကျောင်းတွင် ရှောင်ပုန်းနေသူများဖြစ်သည်ဟု ၎င်းကဆက်လက်ပြောကြားသည် ။
ဆောင်းပြောင်းဒေသတွင် ပြီးခဲ့သည့်ဖေဖော်ဝါလ နောက်ဆုံးအပတ်ကတည်းကဖြစ်ပွားနေခဲ့သော တိုက်ပွဲများကြောင့် ဒေသခံပြည်သူများမှာ ဘေးလွတ်ရာရှောင်တိမ်းနေပြီး ကျေးရွာ၌ အနည်းငယ်ကျန်ခဲ့သော ဒေသခံများမှာဘုန်းကြီးကျောင်း၌ ပုန်းရှောင်နေစဥ် စစ်ကောင်စီတပ်၏ ဖမ်းဆီးသတ်ခြင်းကို ခံလိုက်ရခြင်းဖြစ်သည်ဟု PNDF-KK တာဝန်ရှိသူက သံလွင်ခက်ကိုပြောသည်။
ဘုန်းကြီးကျောင်းတွင် အစုလိုက်သတ်ဖြတ်ခံလိုက်ရသည့် ဒေသခံများ၏ အလောင်းဘေးတွင် လက်လုပ်သေနတ်များဖြင့် ရိုက်ထားသည့်ပုံများကို စစ်ကောင်စီဝါဒဖြန့် ချန်နယ်များတွင် ဦးစွာဖော်ပြထားကြပြီး PDF ၂၀ ဦးကျော်ကို စစ်ကောင်စီတပ်က ရှင်းလင်းနိုင်ခဲ့သည်ဟု ရေးသားထားကြသည်။
ပုံစာ–မတ်လ ၁၁ ရက်တွင် နမ်းနိန်းကျေးရွာကိုစစ်ကောင်စီတပ်က မီးရှို့ဖျက်ဆီးမှု ။
