ခေါင်းဆောင်အချင်းချင်းညှိနှိုင်းရမယ်

ကရင်အမျိုးသားအစည်းအရုံး တပ်မဟာ ၄ နယ်မြေက ကရင်အမျိုးသားလွတ်မြောက်ရေးတပ်မတော် (KNLA)နှင့် ကော်သူးလေတပ်မတော် (KTLA) တို့အကြား စစ်ရေးတင်းမာမှုများ ပြေလျော့စေရန် နှစ်ဘက်ဆောင်ရွက်နေမှု နှင့်လိုလားချက်များကို သံလွင်ခက် သတင်းထောက် နန်းဆုပန်ခန့်က ဆက်သွယ်မေးမြန်းထားပါသည်။

သံလွင်ခက်။ ။ KNU အနေနဲ့ တပ်မဟာ ၄ နယ်မြေက စစ်ရေးတင်းမာမှုတွေ ပြေလျော့အောင် ဘာတွေဆောင်ရွက်နေပါသလဲရှင်။

KNU တပ်မဟာ ၄ ပြောခွင့်ရ။ ။ခေါင်းဆောင်အချင်းချင်းညှိနှိုင်းမှရမယ်။ လက်အောက်ငယ်သားတွေညှိနှိုင်းလို့မရဘူး။ ကျွန်တော်တို့ဘက်ကညှိနှိုင်းဆွေးနွေးဖို့ တောင်းဆိုပေမယ့် သူတို့ဘက်ကတော့ တစ်ခါမှအကြောင်းပြန်တာမရှိဘူး။

သံလွင်ခက်။ ။အခုလို တင်းမာမှုတွေက ဘယ်ကနေအစပြုခဲ့တာလဲရှင်။KNU ရဲ့သဘောထားလည်း သိချင်ပါတယ်။

KNU တပ်မဟာ ၄ ပြောခွင့်ရ။ ။ ကျွန်တော်တို့အနေနဲ့က စည်းလုံးညီညွတ်ဖို့လိုချင်တာပဲ။ အခုလောလောဆယ် ကျွန်တော်တို့နေတဲ့နေရာကို အကာအကွယ်ယူဖို့ပဲ။ ကျွန်တော်တို့ကို သူတို့ဘက်က စီးပွါးရေးလုပ်တာတွေ၊ စစ်ကောင်စီနဲ့ပူးပေါင်းတာတွေ၊ ရန်သူနဲ့ပေါင်းတာတွေ လို့သူတို့မီဒီယာတွေမှာအမျိုးမျိုးပြောတယ်လေ။

သံလွင်ခက် ။ ။ဒေသခံတွေနဲ့လူငယ်တွေကလည်း ကရင်လက်နက်ကိုင်အချင်းချင်း ထိပ်တိုက်တွေ့တာတွေ ရှောင်ဖို့ဆိုတာကို ဆက်တိုက်ပြောလာတော့ ဒါတွေကိုရော KNU က အလေးအနက်ထားပါသလားရှင်။

KNU တပ်မဟာ ၄ ပြောခွင့်ရ။ ။ နိုင်ငံတကာက ကရင်လူငယ်အဖွဲ့အစည်းတွေလည်း သူတို့ကို တောင်းပန်တာပဲ။ သူတို့ကဒီလိုပြောဆိုချက်တွေကိုလေ့မှမလေ့လာတာ။ သူတို့ကလုပ်ချင်သလိုလုပ်ပေမယ့် ကျွန်တော်တို့က ခုခံဖို့ပဲလုပ်တာပါ။အခုစစ်ရေးအခြေအနေကတော့ ရှိတော့ရှိဦးမယ်ထင်တာပဲ။ ဒီအခြေအနေက သူတို့ကလျှော့မှမလျှော့တာ။

သံလွင်ခက် ။ ။နှစ်ဖက် ပြေလည်အောင်ဘယ်လို ပုံစံနဲ့ ဖြေရှင်းနိုင်မယ်လို့ ထင်ပါသလဲရှင်။

KNU တပ်မဟာ ၄ ပြောခွင့်ရ။ ။ ဒီပြဿနာကိုကျွန်တော်တို့ရုံးဘက်ဆိုင်ရာနဲ့ လူငယ်တွေ​ဖြေရှင်းလို့မရဘူး။ အထက်လူကြီးတွေပဲဖြေရှင်းလို့ရတယ်။ အဲ့လိုညှိနှိုင်းနိုင်ဖို့ လမ်းစတွေရှိလာဖို့ ကျွန်တော်တို့မျှော်လင့်တယ်။ကျွန်တော်တို့ တစ်ဖွဲ့နဲ့တစ်ဖွဲ့က လူငယ်တွေအချင်းချင်းကတော့ တွေ့ရင်လည်း ဖြေရှင်းနိုင်အောင် တိုင်ပင်တာပဲ။ လူကြီးတွေအချင်းချင်းလုပ်မှရမယ့်ကိစ္စလေ။
အရင်ကတော့ပြဿနာမရှိဘူး။ သူတို့ဘက်က အင်အားရှိလာတဲ့အခါမှာတော့ တပ်မဟာ ၄ မှာ လာပြီးမြိတ်-ထားဝယ် ရုံးအခြေစိုက်နေရာမှာ သူတို့ဌာနချုပ် KTLA ဆာ့ကဆော ကိုဒီမှာထားပြီး ဗိုလ်ချုပ်တွေပါထားဖို့ ပြောတော့ ပြဿနာကဖြစ်လာတာ။ ဒါပေမယ့်ကျွန်တော်တို့က ခုခံကာကွယ်ဖို့ပဲလုပ်တာ။ အဲ့ဒီကနေစပြီး နောက်ပိုင်းတော့ သူတို့ကိုကြည့်ရတာ ရန်လိုချင်မှုနဲ့ နယ်မြေစိုးမိုးချင်လိုမှုမျိုးဖြစ်လာတာ။

သံလွင်ခက် ။ ။ဖြည့်စွက်ပြောချင်တာများရှိရင် ပြောပေးပါဦး။

KNU တပ်မဟာ ၄ ပြောခွင့်ရ။ ။ဒီလောက်ပါပဲ မရှိတော့ပါဘူး။

ပြီးမြောက်တဲ့ဆွေးနွေးမှုဖြစ်အောင် ကြိုးစားမယ်(KTLA ပြောရေးဆိုခွင့်ရှိသူ)
********************

သံလွင်ခက်။ ။ တပ်မဟာ ၄ နယ်မြေက လက်ရှိ စစ်ရေးအခြေအနေ ဘယ်လို ရှိနေပါသလဲရှင်။

KTLA ပြောခွင့်ရ ။ ။ ကျွန်တော်တို့ပြောချင်တာကတော့ ကိုယ့်အချင်းချင်းဒီလိုဖြစ်တဲ့ပြဿနာကိုကျွန်တော်တို့လည်း မဖြစ်ချင်ဘူး။ အခုဖြစ်နေတာက တပ်မဟာ ၄ ကိုပဲပြောလို့မရဘူး။ ပြဿနာဖြစ်နေတာက KNU တပ်မဟာ ၄ တပ်ရင်း ၁၀ ဆိုတော့ သူတို့ကို သေသေချာချာပြောရမယ် ။ အခုပစ်နေတာ ၃၊ ၄ ရက်လောက်ရှိနေပြီး တစ်ဖက်နဲ့တစ်ဖက်ညှိနှိုင်းလို့မရဘဲ စစ်ရေးတင်းမာနေတုန်းပဲ။

သံလွင်ခက်။ ။နှစ်ဖက်ညှိနှိုင်းဆောင်ရွက်ဖို့အတွက် KTLA ဘက် က ဘာတွေ ဆောင်ရွက်ထားပါသလဲရှင်။

KTLA ပြောခွင့်ရ ။ ။ကျွန်တော်တို့ကော်သူးလေဘက်က ဆာ့ကဆော အထိသွားပြီး သူတို့ကိုညှိနှိုင်းဖို့ပြောတဲ့အခါ သူတို့ဘက်က ဘာမှအကြောင်းပြန်မလာဘူး။ ကျွန်တော်တို့က အခုတော့တင်းထားရတယ်ပေါ့။ ဘာလို့လဲဆိုတော့ သူတို့ကကျွန်တော်တို့စခန်းကိုလည်းတက်သိမ်းထားပြီ။ အခုအဲ့ဒီစခန်းက ကလေးတွေလည်း တကွဲတပြားဖြစ်နေပြီ ။တွေ့ဆုံဆွေးနွေးပွဲကို ကျွန်တော်တို့ ၂ ကြိမ်လောက်ဖိတ်ထားပြီးပါပြီ။ ကျွန်တော်တို့ ကော်သူးလေကို ထူထောင်တာ စစ်ကောင်စီကိုတိုက်ဖို့ပဲဖြစ်တဲ့အတွက် ကိုယ့်အချင်းချင်းပြန်တိုက်ဖို့ (လုံးဝ) (လုံးဝ) မဖြစ်စေချင်ဘူးပေါ့။

သံလွင်ခက် ။ ။ကော်သူးလေဘက်က လိုလားချက်နဲ့ ရေရှည်အစီအမံကဘာပါလဲ။ဒါတွေကိုရော KNU ဘက်ကသူတွေ သိအောင်ကြိုးစားဖူးပါသလားရှင်။

KTLA ပြောခွင့်ရ ။ ။ ကျွန်တော်တို့ဘက်က စစ်ကောင်စီကို စုစုစည်းစည်းနဲ့တိုက်ထုတ်မယ်ပေါ့။ အဲ့လိုပြောတော့သူတို့ဘက်ကလက်မခံတော့ ဆွေးနွေးပွဲကမဖြစ်မြောက်ဘူး။ သူတို့လက်မခံရတဲ့အကြောင်းရင်းက သူတို့ကNCA လက်မှတ်ထိုးထားတဲ့အကြောင်းပြချက်နဲ့ပါ။

သံလွင်ခက် ။ ။အခုလက်ရှိဖြစ်နေတဲ့ တင်းမာမှုတွေကို ပြေလျော့ဖို့ နှစ်ဖက်စလုံးကဘယ်လိုမျိုး ဆောင်ရွက်သင့်တယ်လို့ ထင်ပါသလဲရှင်။

KTLA ပြောခွင့်ရ ။ ။ကျွန်တော်တို့က ၁၀၀ ရာခိုင်နှုန်းအပြည့်ညှိနှိုင်းစေချင်တာ။ အချင်ချင်းပြန်ပစ်နေတာ ကျွန်တော်တို့ကလိုလည်းမလိုလားဘူး။ ဒီတနင်္သာရီတိုင်းက ကရင်ပြည်သူတွေကလည်းညှိ နှိုင်းစေချင်တာ။ ကျွန်တော်တို့ကတော့ ပြည်သူတွေဖြစ်စေချင်တဲ့အတိုင်း ကျွန်တော်တို့ကဆွေးနွေးဖို့ဆောင်ရွက်ပေမယ့် တပ်မဟာ ၄ ဘက်ကတော့ ဘာမှအကြောင်းမပြန်တော့ ကျွန်တော်တို့ဘက်ကဘာလုပ်လို့ဘာကိုင်ရမှန်းမသိဖြစ်နေတယ်။နောက်တစ်ခုက ကျွန်တော်တို့ ပြီးမြောက်တဲ့ဆွေးနွေးမှုဖြစ်ဖို့ကြိုးစားရမယ်။ အချင်းချင်းပြဿနာမဖြစ်ချင်ဘူးလေ။ ဆွေးနွေးတဲ့အချိန်ကျရင် NUG(အမျိုးသားညီညွတ်ရေးအစိုးရ) ဘက်ကသူတွေ လည်းသိစေချင်တာပေါ့။ ဘာဖြစ်လို့လဲဆိုတော့ အကုန်လုံးသိတာတော့ပိုကောင်းတာပေါ့။

သံလွင်ခက် ။ ။ဖြည့်စွက်ပြောချင်တာများရှိရင် ပြောပေးပါဦး။

KTLA ပြောခွင့်ရ။ ။ဒီလောက်ပါပဲ မရှိတော့ပါဘူး။

သံလွင်ခက် ။ ။အချိန်ပေးဖြေကြားပေးတာကို ကျေးဇူးတင်ပါတယ်ရှင်။