စစ်ကိုင်းတိုင်း၊ ခင်ဦး အရှေ့ဘက်ခြမ်း မြေနီလျှိုကျေးရွာအနီးကို ဒီဇင်ဘာ ၂၇ ရက်က စစ်တပ် လေကြောင်းတိုက်ခိုက်မှုကြောင့် အရပ်သား ၉ ဦး သေဆုံးကြောင်း မြို့နယ်ပြည်သူ့အုပ်ချုပ်ရေးအဖွဲ့က ထုတ်ပြန်သည်။
ဂျက်တိုက်လေယာဉ်နှင့် Mi-35 ရဟတ်ယာဉ်တို့ဖြင့် နေ့လယ် ၁၂:၄၀ နာရီခန့်က တိုက်ခိုက်ခဲ့ခြင်းဖြစ်ပြီး ၁၀ ဦးထက်မနည်းလည်း ဒဏ်ရာရရှိခဲ့သည်ဟု သိရသည်။
တိုက်ခိုက်မှုကြောင့် အင်တာနက်စတားလင့်ဆိုင်၊ အစားအသောက်ဆိုင်များ၊ လမ်းပိတ်ဆို့မှုကြောင့် ရပ်နားထားသည့် ကုန်စည်ယာဉ်များ၊ ဆီတင်ယာဉ်များ ထိခိုက်ပျက်စီးခဲ့ကြောင်း ထုတ်ပြန်ချက်တွင် ဖော်ပြထားသည်။
ထို့အပြင် ခင်ဦးမြို့ မြေနီသျှိုလမ်းဆုံအနီးကို ဒီဇင်ဘာ ၁၈ ရက် နေ့လယ်ပိုင်းကလည်း စစ်တပ်က အလားတူတိုက်ခိုက်ခြင်းကြောင့် ပြည်သူ ၆ ဦးထက်မနည်း သေဆုံးကာ ဒဏ်ရာအများအပြားရရှိခဲ့သည့် ဖြစ်စဉ်ရှိခဲ့သည်။
မြို့နယ်ပြည်သူ့အုပ်ချုပ်ရေးအဖွဲ့ကလည်း ဒေသခံပြည်သူများအား လုံခြုံရေးဆိုင်ရာ သတိပြုရန်နှင့် ကြိုတင်ကာကွယ်မှုများ ပြုလုပ်ရန် သတိပေးထားသည်။
#ခင်ဦး #လေကြောင်းတိုက်ခိုက်မှု #ThanLwinKhetNews
