မန္တလေးတိုင်း၊ မတ္တရာ၊ စဥ့်ကူးနှင့် သပိတ်ကျင်းမြို့နယ်များတွင် တိုက်ပွဲများ တစ်နေ့ထက်တစ်နေ့ ပိုမိုပြင်းထန်လာနေသဖြင့် ဒေသခံပြည်သူများ ဘေးအန္တရာယ်ကင်းရေး ကြိုတင်ပြင်ဆင်ထားကြရန် ပြည်သူ့ကာကွယ်ရေးတပ်မတော် (မန္တလေး) က ယနေ့ သတိပေး တိုက်တွန်းလိုက်သည်။
စစ်ကောင်စီက လာမည့် ၂၀၂၅ ဒီဇင်ဘာလနှင့် ၂၀၂၆ ဇန်နဝါရီလတို့တွင် တရားမဝင် အတုအယောင် ရွေးကောက်ပွဲ ပြုလုပ်ရန် ကြိုးပမ်းနေပြီး အဆိုပါ ရွေးကောက်ပွဲမတိုင်မီတွင် တော်လှန်ရေးတပ်ဖွဲ့များ၏ ထိန်းချုပ်နယ်မြေများကို စစ်အုပ်စုက သာလွန်အင်အား အလုံးအရင်းဖြင့် အပြင်းအထန် ထိုးစစ်ဆင် တိုက်ခိုက်နေသည်ဟု PDF (မန္တလေး) ၏ ထုတ်ပြန်ချက်တွင် ဆိုထားသည်။
ရွေးကောက်ပွဲ ပြုလုပ်ရန် လျာထားသည့် မြို့နယ်များစာရင်းတွင် PDF (မန္တလေး) လှုပ်ရှားစိုးမိုးရာ မတ္တရာ၊ စဥ့်ကူးနှင့် သပိတ်ကျင်းမြို့နယ်များလည်း ပါဝင်နေသောကြောင့် ယခုကဲ့သို့ အဆိုပါဒေသများတွင် တိုက်ပွဲများ ပိုမိုပြင်းထန်လာနေခြင်းဖြစ်သည်ဟု ဆိုသည်။
လက်ရှိတွင် မတ္တရာမြို့နယ်အရှေ့မြောက်ခြမ်းရှိ ဆည်တော်ကြီးစခန်းနှင့် အင်ကြင်းမြိုင် လေကြောင်းရန်ကာကွယ်ရေးတပ်စခန်းတို့ကို တော်လှန်ရေးအင်အားစုများက နိုဝင်ဘာ ၆ ရက်တွင် လက်လွှတ်ခဲ့ရသည်။ ထို့အပြင် စစ်ကော်မရှင်တပ်များက သပိတ်ကျင်းမြို့နယ်ကို ပြန်လည်ထိန်းချုပ်ထားပြီးနောက် စဥ့်ကူးမြို့နယ်အတွင်းသို့ပါ ထိုးစစ်များ ဆက်လက်ပြင်းထန်လာနေသည်ဟု ဒေသသတင်းရင်းမြစ်များထံမှ သိရသည်။
ယခုလအတွင်း မန္တလေးတိုင်းအတွင်း စစ်တပ်၏ ထိုးစစ်များတွင် လေကြောင်းတိုက်ခိုက်မှုများလည်း ပါဝင်ခဲ့သည်။ Burma News International (BNI) အစီရင်ခံစာအရ အောက်တိုဘာ ၃၀ ရက်က မတ္တရာမြို့နယ်၊ ဝန်တင်ကုန်းကျေးရွာရှိ စစ်ဘေးရှောင်များ ခိုလှုံနေသည့် စာသင်ကျောင်းတစ်ခုကို လေကြောင်းမှ ဗုံးကြဲခဲ့ရာ ၁၆ နှစ်အရွယ် မိန်းကလေးတစ်ဦး သေဆုံးခဲ့သည်။ ထို့အတူ နိုဝင်ဘာ ၇ ရက်ကလည်း စဥ့်ကူးမြို့နယ်၊ ရွှေပြည်ရွာရှိ စာသင်ကျောင်းတစ်ခုကို လေကြောင်းမှ တိုက်ခိုက်ခဲ့ရာ မတ္တရာမြို့နယ်မှ ထွက်ပြေးလာသော စစ်ဘေးရှောင် ပြည်သူ ၄ ဦး သေဆုံးခဲ့ရသည်။
ထိုသို့စစ်ရေးတင်းမာမှုများသည် တအာင်းအမျိုးသားလွတ်မြောက်ရေးတပ်မတော် (TNLA) အပေါ် တရုတ်နိုင်ငံ၏ ဖိအားပေးမှုကြောင့် ပေါ်ထွက်လာသော အပစ်ရပ်သဘောတူညီချက်အရ မိုးကုတ်မြို့မှ ယခု နိုဝင်ဘာလကုန်ပိုင်းတွင် ပြန်လည်ဆုတ်ခွာရန် ပြင်ဆင်နေမှုနှင့်လည်း ဆက်စပ်နေသည်ဟု ကျွမ်းကျင်သူများက သုံးသပ်ကြသည်။ အဆိုပါ အခြေအနေက ဒေသခံ PDF များအပေါ် စစ်ရေးအရ ဖိအားပိုမိုများပြားစေခဲ့သည်ဟု ဆိုကြသည်။
ထို့ကြောင့် လက်ရှိအခြေအနေများအရ ဒေသတွင်း ပြည်သူလူထုအနေဖြင့် တိုက်ပွဲတွင်း ကြုံတွေ့ရနိုင်သည့် အခြေအနေများနှင့်ပတ်သက်ပြီး ကြိုတင်ပြင်ဆင်ကြရန်နှင့် ဘေးအန္တရာယ်ကင်းနိုင်ရေးအတွက် လိုအပ်သည့် အစီအမံများ လုပ်ဆောင်ထားကြပါရန် PDF (မန္တလေး) က တိုက်တွန်းထားသည်။
PDF (မန္တလေး) အနေဖြင့်လည်း အာဏာသိမ်းစစ်အုပ်စု၏ လက်ရှိထိုးစစ်ကို ဆက်လက် ခုခံကာကွယ်သွားမည်ဟုလည်း ထုတ်ပြန်ချက်တွင် ဖော်ပြထားသည်။
ပုံစာ – အခြေခံစစ်သင်တန်းဆင်းပွဲမှ PDF (မန္တလေး) တပ်ဖွဲ့ဝင်များ။
ဓာတ်ပုံ- PDF (မန္တလေး)
