ထိုင်းနိုင်ငံရောက် မြန်မာရွှေ့ပြောင်းလုပ်သားများနှင့် အလုပ်ရှင်အကြား အငြင်းပွားနေသည့် ကြိုတင်အကြောင်းကြားခြင်းမရှိဘဲ အလုပ်ထုတ်ခံရသည့်အတွက် လုပ်အားခရလိုမှုအား အလုပ်သမားမဟာမိတ်အဖွဲ့ WAG အဖွဲ့မှ ညှိနှိုင်းဆောင်ရွက်ပေးရာ ပြေလည်မှု ရရှိသွားပြီဟု သိရသည်။
လက်ရှိတွင် အဆိုပါ အလုပ်သမားများအား အလုပ်သမားရှာဖွေရေးကုမ္ပဏီမှ တစ်ပတ်အတွင်း အလုပ်သစ်ရှာပေးရန်၊ လုပ်ခလစာများ အမြန်ဆုံးထုတ်ပေးရန်နှင့် အလုပ်သမားများနှင့် ပတ်သက်သည့် အခွင့်အရေးများ အပြည့်အဝပေးရန် အလုပ်ရှင်နှင့် အလုပ်သမားများကြား သဘောတူညီမှု ရရှိခဲ့သည်ဟု WAG မှ တာဝန်ရှိသူ တစ်ဦးက ပြောသည်။
ထိုင်းနိုင်ငံ၊ လယောင်မြို့ရှိ မီးသီးစက်ရုံတွင် အလုပ်လုပ်ကိုင်နေသည့် မြန်မာရွှေ့ပြောင်းလုပ်သား ၁၅၀ သည် အဆိုပါ စက်ရုံတွင် အလုပ်ရရှိရန် ဘတ်ငါးသန်းပွဲစားရုံးအား စမတ်ခ (အလုပ်ရရှိရန် ဝန်ဆောင်ခ) အဖြစ် တစ်ဦးလျှင် ဘတ် ၇၅၀၀ မှ ၈၅၀၀ နှုန်းအထိ ပေးခဲ့ရသည်ဟု သိရသည်။
ထိုသို့ အလုပ်လုပ်ကိုင်ပြီး လေးလကျော်အကြာ စက်တင်ဘာ ၂၁ ရက်တွင် စက်ရုံ သူဌေးမှ ဘတ်ငါးသန်းပွဲစားရုံးသို့ အဆိုပါ အလုပ်သမားများအား အလုပ်ရပ်နားလိုက်သည်ဟု အကြောင်းကြားခဲ့သည်။ ထိုကြောင့် စက်ရုံမှ ကြိုတင်အကြောင်းကြားခြင်း မရှိဘဲ အလုပ်ထုတ်ခြင်းကြောင့် ရသင့်ရထိုက်သည့် နစ်နာကြေးများ၊ အလုပ်ရှင်ထံ အပ်နှံထားရသည့် အလုပ်သမားများ၏ အထောက်အထား စာရွက်များနှင့် စက်တင်ဘာလအတွင်း အလုပ်လုပ်ကိုင်ခဲ့သည့် လုပ်အားခများ ပြန်လည် ရရှိရန် WAG အဖွဲ့မှ စက်တင်တာ ၂၄ ရက်တွင် ညှိနှိုင်းပေးခဲ့ခြင်း ဖြစ်သည်။
အဆိုပါ အလုပ်သမားများသည် စက်တင်ဘာလအတွင်း အလုပ်ဆင်းထားသည့် ၁၈ ရက်အတွက် လုပ်အားခ အလုပ်သမား တစ်ဦးလျှင် ၁၂၇၀၀ ဘတ်အား စက်ရုံဘက်မှ ပေးချေရန် WAG သို့ အလုပ်သမားများမှ တိုင်ကြားလာခြင်း ဖြစ်သည်။ လက်ရှိ ထိုင်းနိုင်ငံတွင် မြန်မာရွှေ့ပြောင်းလုပ်သား ၇ သန်းအထိ အလုပ်လုပ်ကိုင်နေသည်ဟု ရွေ့ပြောင်းအလုပ်သမားအရေးလုပ်ဆောင်နေသူများထံမှ သိရသည်။
ထိုင်းနိုင်ငံတွင် အလုပ်လုပ်ကိုင်နေသည့် မြန်မာရွှေ့ပြောင်းလုပ်သားများအနေဖြင့် အလုပ်သမားများနှင့် သက်ဆိုင်သည့် ဥပဒေများအား သိထားသင့်သည့်အပြင် အထောက်အထားများအား လုပ်ထားသင့်သည်ဟုလည်း အလုပ်သမားအရေးလုပ်ဆောင်သူများမှ အကြံပြုထားသည်။
