စစ်ကိုင်းတိုင်း၊ ဗန်းမောက်မြို့ကို တော်လှန်ရေးပူးပေါင်းတပ်ဖွဲ့များက ယနေ့၊ စက်တင်ဘာလ ၂၀ ရက် ညနေပိုင်းတွင် အပြီးသတ်တိုက်ခိုက်သိမ်းပိုက်လိုက်ပြီဖြစ်သည်ဟု မြေပြင်စစ်ရေးဆိုင်ရာ သတင်းရင်းမြစ်များက အတည်ပြုသည်။
အဆိုပါမြို့သိမ်းအောင်မြင်သည့်နေ့မှာ အမျိုးသားညီညွတ်ရေးအစိုးရ(NUG)နှင့် တိုင်းရင်းသားလက်နက်ကိုင်အဖွဲ့များက ဗဟိုကွပ်ကဲရေးနှင့် ပေါင်းစပ်ညှိနှိုင်းရေးကော်မတီ (Central Command and Coordination Committee – C3C)ထူထောင်အပြီး အမှတ်(၁)စစ်ဒေသ ဖွဲ့စည်းခြင်း လေးနှစ်ပြည့်မြောက်သည့်နေ့ဖြစ်သည်။
စက်တင်ဘာလ ၁၅ ရက်တွင် စတင်ခဲ့သည့် ဗန်းမောက်မြို့သိမ်းတိုက်ပွဲ ခြောက်ရက်မြောက်နေ့တွင် အောင်မြင်ခဲ့ခြင်းဖြစ်ပြီး စစ်ကောင်စီတပ်နှင့် ရှမ်းနီအမျိုးသားများတပ်မတော် (SNA) တို့၏ နောက်ဆုံးခံစစ်စခန်းဖြစ်သော နတလကျောင်းကို ယနေ့ညနေ ၆ နာရီ ၄၀ မိနစ်တွင် တော်လှန်ရေးတပ်များက ဝင်ရောက်စီးနင်းနိုင်ခဲ့ပြီးနောက် စစ်ကောင်စီနှင့် ပူးပေါင်းတပ်များ ထွက်ပြေးသွားကြသည်ဟု သိရသည်။
အဆိုပါ မြို့သိမ်းစစ်ဆင်ရေးကို အမှတ်(၁)စစ်ဒေသ၏ တိုက်ရိုက်ကွပ်ကဲမှုဖြင့် တော်လှန်ရန်တပ်ဖွဲ့များဖြစ်သော ပြည်သူ့ကာကွယ်ရေးတပ်မတော် (PDF) ပူးပေါင်းတပ်များ၊ ကဒူးဒေသကာကွယ်ရေးတပ်ဖွဲ့၊ မြို့နယ်ပြည်သူ့ကာကွယ်ရေးအဖွဲ့များနှင့် ကချင်လွတ်လပ်ရေးတပ်မတော် (KIA)တို့ ပူးပေါင်းဆောင်ရွက်ခဲ့ခြင်းဖြစ်သည်။
ဗန်းမောက်မြို့သည် ခမ်းပါတ်၊ မြို့သစ်၊ ရွှေပြည်အေး၊ ပင်လည်ဘူး၊ မော်လူးနှင့် အင်းတော်မြို့များပြီးနောက် စစ်ကိုင်းတိုင်းအတွင်း တော်လှန်ရေးတပ်ဖွဲ့များက သိမ်းပိုက်ထိန်းချုပ်နိုင်ခဲ့သည့် သတ္တမမြောက်မြို့ ဖြစ်လာသည်။
ဓါတ်ပုံ – Indaw Revolution-IR
